შსს გურიის პოლიციის დეპარტამენტის შენობაში ინციდენტი მოხდა _ ოზურგეთის მუნიციპალიტეტის ერთ-ერთ სოფელში მცხოვრებ მამაკაცს, ჯ. წ.-ს და პოლიციის თანამშრომლებს შორის სიტყვიერი შეურაცხყოფა ფიზიკურ დაპირისპირებაში გადაიზარდა.
როგორც ფაქტის თვითმხილველები და ჯ. წ.-ს ახლობლები ამბობენ, ახალგაზრდა მამაკაცი, რომელიც ნასვამ მდგომარეობაში იმყოფებოდა და პოლიციელებმა ცემეს.
პოლიციის მიერ ბრალდებულზე ძალადობის ფაქტებს არც შსს პრესსამსახურში ადასტურებენ და არც ბრალდებულის უფლებების დამცველი პირები. ისინი “გურია ნიუსთან“ აღნიშნავენ, რომ ჯ. წ. ნასვამ მდგომარეობაში პოლიციის შენობაში შეიჭრა და დააზიანა კომპიუტერული ტექნიკა.
ჯ. წ. ოზურგეთის სამედიცინო ცენტრშია მოთავსებული. ჩვენ მისი ნახვის უფლება არც პოლიციელებმა დაგვრთეს და არც მისმა დამცველმა პირებმა მოგვცეს.
როგორც ახლობლებმა „გურია ნიუსთან“ საუბრისას თქვეს, ახალგაზრდა მამაკაცს სახეზე მრავალმხრივი დაზიანებები აღენიშნება.
სამედიცინო ცენტრში ფაქტთან დაკავშირებით შსს გენერალური ინსპექციაც იმყოფებოდა. მათ ჩვენთან კომენტარი არ გააკეთეს და გვიპასუხეს, რომ ექიმთან ჰქონდათ საქმე.
შსს პრესსამსახურში განმარტავენ, რომ აღნიშნულ ფაქტთან დაკავშირებით გამოძიება მიმდინარეობს სსკ-ის 187 მუხლით, რაც სხვისი ნივთის დაზიანებას ან განადგურებას გულისხმობს
ინციდენტში მონაწილე პირზე პოლიციის მხრიდან ძალადობას შსს კატეგორიულად უარყოფს:
_ გამთენიისას ეს ახალგაზრდა ნასვამ მდგომარეობაში შეიჭრა პოლიციის შენობაში. პოლიციის განყოფილების სამორიგეოში დააზიანა კომპიუტერის მონიტორი, პოლიციელებს აყენებდა სიტყვიერ შეურაცხყოფას. ის დააკავეს ადგილზევე. დაკავებიდან რამდენიმე საათში, ცუდად ვარო, _ განაცხადა და მოითხოვა სამედიცინო შემოწმება. შესაბამისი ოქმიც არსებობს იმისა, რომ აღნიშნულმა პიროვნებამ, ვიდრე შეიჭრებოდა პოლიციის შენობაში, სადღაც გარეთ, წაიქცა და სახის არეში დაზიანება მიიღო. ამის შემდგომ კიდევ, განმეორებით მოითხოვა შემოწმება და გადაიყვანეს საავადმყოფოში, სადაც ჩაუტარდა კომპლექსური გამოკვლევა, რის შედეგადაც დადგინდა, რომ გარდა იმ დაზიანებებისა, რომელიც პოლიციაში შეჭრამდე მიიღო, მას რაიმე სხვა სახის დაზიანება არ აღენიშნება.
თინათინ ბასილაშვილი: _ ჯ. წ.-ს უფლებების დამცველი ვარ. ახალგაზრდას აღენიშნება დაზიანება, რომლის შესახებ მან გენერალურ ინსპექციასთან ჩატარებულ დაკითხვაში განმარტა, რომ დაზიანება მიღებულია მის მიერ სახლში. არანაირი ფიზიკური ძალადობა პოლიციის მხრიდან მასზე არ გახორციელებულა.
ჯ. წ.-ს ოჯახის წევრებმა კომენტარი არ გააკეთეს.
