კაპროვანი ერთ-ერთი პოპულარული და დამსვენებლებისთვის მიმზიდველი ადგილია ოზურგეთის მუნიციპალიტეტში. რამდენიმე დღის წინ, „გურია ნიუსს“ ერთ-ერთი სასტუმროს მფლობელი აკაკი მიქაძე დაუკავშირდა და დახმარება გვთხოვა.
„დაახლოებით, 25 დღის წინ, ქარიშხალი იყო კაპროვანში და რამდენიმე ფიჭვის ხე წააქცია. ერთ-ერთი ხე დაეცა სასტუმროს ღობეს და დააზიანა. იყო საშიშროება, რომ მეორე ხე დაცემოდა სასტუმროს და თოკით გავამაგრეთ. იქნებ, დაინტერესდეთ ამ პრობლემით და გააშუქოთ. 112-ში დაახლოებით ათზე მეტი ზარი გვაქვს დაფიქსირებული და ვითხოვთ, ამ ხის მოჭრას, სანამ უბედურება დატრიალებულა და ვინმეს ჯანმრთელობა შეუწირავს. ვისაც შეიძლებოდა ყველას დავურეკე შედეგი ვერ მივიღე და ბოლოს, გადავწყვიტე მედიისთვის მეცნობებინა ეს ამბავი“, _ გვითხრა აკაკი მიქაძემ.
ადგილზე მისულებმა გადავიღეთ არსებული ვითარება, დაზიანებული საკომუნიკაციო ინფრასტრუქტურა, დაზიანებული ღობე და თოკით დაბმული ხეც. ადგილზე რამდენიმე ადამიანი ჩავწერეთ:
„მხოლოდ კაკოს სასტუმროს არ შემქნია პრობლემა _ ჩემს შენობასაც ორჯერ დაეცა ხე. ბოლო 25 დღის განმავლობაში რამდენიმე ხე წაიქცა ქარიშხალის დროს. მოდიან მაშველები და სხვა სამსახურის თანამშრომლებიб ასუფთავებენ ხეებისგან დაკეტილ გზას, მაგრამ ახლა საჭიროა დამუშავებული ხის ნარჩენების გატანა; ზოგადადაც, ადგილობრივმა ხელისუფლებამ უფრო მეტი ყურადღება უნდა გამოიჩინოს ჩვენი პრობლემების მოსაგვარებლად“, _ გვითხრა ერთ-ერთი მარკეტის მფლობელმა.
ჩვენ დავუკავშირდით ოზურგეთის მუნიციპალიტეტის მერის წარმომადგენელს სოფელ ნატანებში, ვალერიან ვაჩეიშვილს. მისი თქმით, კაპროვანის პრობლემებს იცნობს და ის ხე, რომელიც თოკით იყო მიმაგრებული, მოჭრეს.
„მოგვარებულია ეს საკითხი“, _ გვითხრა ვალერიან ვაჩეიშვილმა.
ჩვენს კითხვაზე, თუ რამდენად სწრაფად ხდება ადგილობრივების პრობლემების გადაჭრა, მან ამ კითხვაზე პასუხი აღარ ისურვა.
ა(ა)იპ „ოზურგეთის მუნიციპალური მომსახურების სერვისცენტრის“ დირექტორმა გია ანთაძემ გვითხრა, რომ მისი სამსახურის თანამშრომლებმა აღნიშნული პრობლემა მოაგვარეს და თოკით “დაბმული“ ხე მოჭრეს.
გია ანთაძის თქმით, როგორც კი ისინი იღებენ შეტყობინებებს მსგავსი პრობლემების შესახებ, მოსაგვარებლად მაშინმვე მიდიან ადგილზე.
„მივედით და მოიჭრა ის ხე, რომელზედაც თქვენ გვეუბნებით. უყურადღებოდ არავის ვტოვებთ. ასევე გავიტანეთ ნარჩენი მასალები“, _ გვითხრა გია ანთაძემ.
ავტორი
