თურქეთში 51 ახალი და 1 გარდაცვალების შემთხვევა დაფიქსირდა. ძალიან მნიშვნელოვანია, თუ რა მდგომარეობაა ჩვენს მეზობელ ქვეყანაში, რადგან სარფის სასაზღვრო გამშვები პუნქტის ჩაკეტვამდე, ყველამ კარგად ვიცით, თუ რა ინტენსიურად გადაადგილდებოდნენ მოქალაქეები.
საზღვარზე, ძირითადად, ხდებოდა ტემპერატურის შემოწმება და კონტროლი, თუმცა, არიან მოქალაქეები, რომლებიც საპირისპირო შემთხვევის შესახებ გვაწვდიან ინფორმაციას.
თურქეთიდან 14 მარტს დაბრუნებული საქართველოს მოქალაქე ს.ჯ. „გურია ნიუსთან” საუბრისას ამბობს, რომ მოქალაქეთა ნაკადს, რომელმაც მასთან ერთად გადმოკვეთა საზღვარი, შემოწმება არ გაუვლია. ამას ადასტურებს მასთან ერთად მყოფი მისივე თანასოფლელი მ.ჯ-ც. მათი თქმით, მათთან ერთად, გერმანიის ორმა მოქალაქემაც გადმოკვეთა საზღვარი და მხოლოდ მათივე დაჟინებული მოთხოვნის შემდეგ შეამოწმეს ისინი.
„თურქეთიდან ვბრუნდებოდით, სარფის საზღვარზე კი ვირუსზე არ შეგვამოწმეს – არ გაგვიზომეს სიცხე. ვითხოვეთ, რომ შევემოწმებინეთ, რადგან გვაინტერესებდა, თუ რა მდგომარეობა გვქონდა… ამის შემდეგ, იძულებული გახდნენ, ტემპერატურა შეემოწმებინათ… ჩვენთან ერთად, ბევრმა ადამიანმა ისე გადაკვეთა საზღვარი, რომ შემოწმება არ გაუვლიათ,” – ამბობენ რესპონდენტები.
„ჩვენთან ერთად, გერმანიის ორი მოქალაქეც გადმოდიოდა საქართველოს ტერიტორიაზე. მათ ექიმებს მოთხოვეს, რომ აუცილებლად უნდა შეემოწმებინათ ვირუსზე; ისინი ამბობდენ, რომ აინტერესებდათ რამე ვირუსის რისკის ქვეშ ხომ არ იყვნენ, ამის შემდეგ მათი შემოწმება კი მოხდა, თუმცა იყვნენ ისეთებიც, რომლებსაც შემოწმება არ გაუვლიათ,” _ აცხადებს მ.ჯ.
აღნიშნულ საკითხთან დაკავშირებით ,,გურია ნიუსი” დაუკავშირდა ჯანდაცვის სამინისტროს. საზოგადოებასთან ურთიერთობის სამსახურის ხელმღვანელი, ნინო მამალაძე ამბობს, რომ მოქალაქეების მიერ მოწოდებული ინფორმაცია მცდარია.
„ჩვენი ინფორმაცით, ამოწმებდნენ ადამიანებს. თქვენ, არ ვიცი, რა მტკიცებულებებზე დაყრდნობით საუბრობთ. ახლა კი საერთოდ დაკეტილია საზღვარი,” _ ამბობს მამალაძე.
შეგახსენებთ, რომ მეზობელ თურქეთში, მხოლოდ დღეს, ვირუსის 51 ახალი შემთხვევა დადასტურდა (დაინფიცირებულთა საერთო რაოდენობა 98-მდე გაიზარდა) და გარდაცვალების პირველი შემთხვევაც დაფიქსირდა; სწორედ ამის გამო გამოთქვამენ წუხილს მოქალაქეები, რომლებიც ზემოთ აღნიშნულ ინფორმაციას გვაწვდიან და მიიჩნევენ, რომ მოქალაქეობრივი ვალდებულება აქვთ, საზოგადოებას მათ ხელთ არსებული ინფორმაცია მიაწოდონ.
