ისე გამოჰყავთ, თითქოს ასეთ სამარცხვინო მდგომარეობაში მიხეილ სააკაშვილი საზოგადოებამ პირველად ნახა, – ამის შესახებ „ქართული ოცნების“ თავმჯდომარე, ირაკლი კობახიძემ „პალიტრანიუსის“ გადაცემაში „360 გრადუსი“ განაცხადა, სადაც ყოფილი პრეზიდენტის, მიხეილ სააკაშვილის გლდანის #18 დაწესებულებაში გადაყვანის კადრების გასაჯაროებას გამოეხმაურა.
მისი თქმით, სამართალდამცავებმა ექსპრეზიდენტის გადასაყვანად იძულების მინიმალური ზომები გამოიყენეს.
როგორც კობახიძემ აღნიშნა, ყოფილი პრეზიდენტისა და „ერთიანი „ნაციონალური მოძრაობის“ მიზანია, მიხეილ სააკაშვილის ციხიდან გამოხსნა და სწორედ ამას ემსახურება მოთხოვნა, იგი სამოქალაქო სამედიცინო საავადმყოფოში გადაიყვანონ.
„ისე გამოჰყავთ, თითქოს ასეთ სამარცხვინო მდგომარეობაში მიხეილ სააკაშვილი საზოგადოებამ პირველად ნახა. როდესაც ის იყო პრეზიდენტი, გვახსოვს გორის ფაქტი, – სააკაშვილი არარსებულ თვითმფრინავებს გაექცა. ამასთან, უკრაინაში როგორ ავიდა სახურავზე, როგორ გამოათრიეს უკრაინელმა სამართალდამცავებმა თმებით, ეს ხომ არ არის ახალი. განსხვავება ის არის, რომ პრეზიდენტი არ შეიძლება ასე ნახოს ვიღაცამ, უკვე ნანახი ჰყავთ არაერთგზის, რა არის ამაში ახალი?! რაც შეეხება საქართველოში გამოქვეყნებულ კადრებს, აბსოლუტურად არის დაცული ადამიანის უფლებების სტანდარტი, იძულების ზომები არის გამოყენებული მინიმალურ ფარგლებში, იმ ყველაფრის გათვალისწინებით, რაც ვიხილეთ, მათ შორის შეურაცხყოფის და დაუმორჩილებლობის კონკრეტული ფორმის გათვალისწინებით.
ერთადერთი, რაც მას სურს, რამენაირად გავიდეს ციხიდან, რომ იქ მიეცეს გათავისუფლების შანსი. ბუნებრივია, სულელი არავინ არის ამ ქვეყანაში, არც ის არის სულელი და თავისი ჭკვიანური გათვლები აქვს, მაგრამ ჩვენ უფრო ჭკვიანები ვართ და არ მივცემთ მას ამის განხორციელების საშუალებას. პატიმრები რატომ არიან ციხეში და არა შუა ქალაქში რაღაც შენობაში? – რადგან უსაფრთხოების სტანდარტი უნდა იყოს დაცული, მით უმეტეს იმ პატიმრის მიმართ, რომლის მიმართაც მომეტებული რისკები არსებობს. აქციებს აწყობენ და პირდაპირ აანონსებენ მის გათავისუფლებას და ა.შ. რისკები მომეტებულია სააკაშვილთან მიმართებაში. შესაბამისად, როდესაც ის ცდილობს, რომ ვიღაცას ჭკუაში მოატყუოს და თავი გადააყვანინოს შუა ქალაქში, იგივე გორის ჰოსპიტალში, – ციხის უსაფრთხოების სტანდარტი და გორის სამხედრო ჰოსპიტალის თუ სხვა ნებისმიერი კლინიკის დაცულობის სტანდარტისგან ასმაგად განსხვავებულია. უნდა, რომ გავიდეს ციხიდან, გადავიდეს ისეთ სივრცეში, სადაც სივრცის დაცულობის ხარისხი ასჯერ ნაკლები, თანაც, არანაირი საჭიროება არ არსებობს“, – განაცხადა კობახიძემ.
რაც შეეხება სტრასბურგის სასამართლოს გადაწყვეტილებს, „ქართული ოცნების“ თავმჯდომარის განცხადებით, მიხეილ სააკაშვილს სურს, ევროპული სასამართლოს გადაწყვეტილება თავიდან აირიდოს.
„სააკაშვილს უნდა რამენაირად თავი დაიძვრინოს სტრასბურგის გადაწყვეტილებისგან. სტრასბურგის გადაწყვეტილებში, ყოველგვარი დათქმების და პირობის გარეშე, წერია მარტივი რამ: არის დაჟინებული მოწოდება იმასთან დაკავშირებით, რომ სააკაშვილმა უნდა შეწყვიტოს შიმშილობა, წერტილი. ეს არის მარტივად ნათქვამი სტრასბურგის გადაწყვეტილებაში. თუ მას აქვს მინიმალური პასუხისმგებლობა შერჩენილი, იგივე საერთაშორისო თანამეგობრობის წინაშე, რაც ბუნებრივია მას არ აქვს, მოეთხოვება შიმშილობის შეწყვეტა. ახლა მას უნდა თავი დაიძვრინოს ამისგან, მაგრამ ეს არის ცარიელი საბაბი და სპეკულაცია, მას მოეთხოვება სტრასბურგის სასამართლოს გადაწყვეტილების შესაბამისად, პირველ რიგში შეწყვიტოს შიმშილობა, რასაც არ ასრულებს, ისე როგორც არასდროს შეუსრულებია სტრასბურგის სასამართლოს გადაწყვეტილებები და უამრავი გადაწყვეტილება აქვს სტრასბურგის სასამართლოს გამოტანილი მის წინააღმდეგ, მათ შორის წამების, მკვლელობის, არაადამიანური მოპყრობის, ბიზნესის რეკეტის ნაწილში, რაშიც არის დადანაშაულებული“, – აღნიშნა ირაკლი კობახიძემ.
