არაფერი დგას ადამიანის სიცოცხლესა და თავისუფლებაზე მაღლა. უნდა გაგრძელდეს გამოძიება და ყველა დამნაშავე უნდა დაისაჯოს, _ ამის შესახებ პარლამენტის საფინანსო-საბიუჯეტო კომიტეტის თავმჯდომარემ ირაკლი კოვზანაძემ, კომიტეტის სხდომაზე განაცხადა.
მან გარდაცვლილი ოპერატორის, ლექსო ლაშქარავას ოჯახს მიუსამძიმრა და აღნიშნა, რომ განვითარებული მოვლენები არის არა მხოლოდ პოლიტიკური, არამედ მას ეკონომიკური მდგენელიც აქვს.
„ამ მოვლენების შემდეგ დაიწყო ტურისტული და სასტუმრო ჯავშნების გაუქმება. ტურიზმის მნიშვნელობაზე დამატებით რამის თქმა ზედმეტად მიმაჩნია, საკმარისია აღინიშნოს, რომ ტურიზმი ჩვენთან კურსწარმომქნელი ფაქტორი გახდა, ხოლო მომსახურების სექტორს ჩვენი მშპ-ის 70%-ზე მეტი უკავია. რომელი უცხოელი ჩადებს ქვეყანაში ფულს სადაც სიცოცხლის რისკები იქმნება, რომელი უცხოელი ჩამოვა სამუშაოდ, თუ აქ უცხოელებს სცემენ, რომელ ბიზნეს კონტაქტებზე შეიძლება საუბარი, თუ სტაბილურობის და დაცულობის განცდა არ იქნა. ჩვენ, პირველ რიგში, პარლამენტმა მთავრობასთან ერთად ყველაფერი უნდა გავაკეთოთ, რომ ეს განცდა აღდგეს და იყოს ქვეყანაში. მსგავსი მოვლენები აღარ უნდა განმეორდეს. ამ დროს კი ჩვენ პირდაპირი უცხოური ინვესტიციები სასიცოცხლოდ გვჭირდება და მისი დეფიციტი გვაქვს. ძალიან კარგია, რომ პარლამენტში მოვა შსს მინისტრი და ყველა კითხვას პასუხი გაეცემა“, _ განაცხადა ირაკლი კოვზანაძემ.
ავტორი: მერაბ ცაავა
