ეს ჩანაწერები ადასტურებს იმას, რაზეც ჩვენ მუდმივად ვსაუბრობთ, რომ ხელისუფლება ჩაფლულია კორუფციის ჭაობში _ ამბობს „ევროპული საქართველოს“ წევრი ირმა ნადირაშვილი. მისი თქმით, სახეზეა ელიტური კორუფცია და ის, რასაც ვხედავთ, მხოლოდ ნაწილია რეალურად არსებული უკანონობის.
მისი თქმით, „კურიერის“ მიერ გავრცელებულმა ჩანაწერებმა ცალსახად დაადასტურა, რომ კორუფციაში ჩართულია ბიძინა ივანიშვილი და მისი გარემოცვა.
ირმა ნადირაშვილის თქმით, ბევრს ამბობს თუნდაც ის ფაქტი, რომ შევარდნაძის დროინდელი კორუმპირებული ვანო ჩხარტიშვილი ალაგებს ბიზნესს.
„გვაქვს ასეთი სქემა, როდესაც ერთის მხრივ ამ ყველაფერზე ხელს ითბობენ ივანიშვილთან დაახლოებული ადამიანები და მეორეს მხრივ პარტიის დაფინანსება საკუთარი ჯიბიდან ამოღებული ფულითაც არ უნდათ. პოლიტიკური ნება არ არსებობს კორუფციის წინააღმდეგ ბრძოლის,“-ამბობს ნადირაშვილი.
საპარალამენტო უმცირესობის დეპუტატის თქმით, ქვეყანა ნაბიჯ-ნაბიჯ მიდის უკან და შექმნილი მძიმე მდგომარეობიდან გამოსვლის ერთადერთი ნაბიჯი საპრეზიდენტო არჩევნებია, რომელიც ფაქტობრივად რეფერენდუმის ტოლფასია.
შეგახსენებთ, რომ გუშინ, “რუსთავი 2”-მა გამოაქვეყნა ფოტო, რომელზეც ბიზნესმენი ვანო ჩხარტიშვილი თამბაქოს ბაზარზე წილების გადანაწილების სქემას ალაგებს.
ფოტოსთან ერთად გასაჯაროვდა აუდიოჩანაწერიც, რომლიდან ირკვევა, რომ თამბაქოს ეროვნული წარმოებიდან ნახევარი “ქართული ოცნებას” უნდა მისცენ. პარტიას ჩანაწერში ფონდად მოიხსენიებენ.
ჩანაწერის თანახმად, ივანიშვილის სახელით თამბაქოს ბაზრის წილებს მისი დეიდაშვილი უჩა მამაცაშვილი ანაწილებს.
საქმეში ჩართულები არიან ყოფილი ვიცე-პრემიერი დიმიტრი ქუმსიშვილი და ყოფილი მთავარი პროკურორი ოთარ ფარცხალაძე. ამ ჩანაწერით დგინდება, რომ ბიზნესს სწორედ ქუმსიშვილი უწესებდა კვოტებს, ვის რამდენი სიგარეტის გაყიდვა შეეძლო.
ჩანაწერში დიმიტრი ქუმსიშვილს ვანო ჩხარტიშვილი გამომძალველად მოიხსენიებს.
შეხვედრას ვანო ჩხარტიშვილი, “თბილისის თამბაქოს” აქციონერი ირაკლი ჩუბინიშვილი და “ომეგა ჯგუფის” დამფუძნებელი ზაზა ოქუაშვილი ესწრებიან.
