„ქართული ოცნების“ მიერ მხარდაჭერილმა საქართველოს პრეზიდენტობის კანდიდატმა სალომე ზურაბიშვილმა ბოლო დეკლარაცია 2018 წლის იანვარში, როგორც პარლამენტის წევრმა შეავსო.
დეკლარაციის თანახმად ზურაბიშვილი ფლობს, 126,33 კვ.მ. ფართის საცხოვრებელ სახლს თბილისში, კუფტინის # 5-ში. დეკლარაციაში მითითებულია, რომ სახლი 2006 წელს შეიძინა, თუმცა მისი ღირებულება მითითებული არ არის. დოკუმენტში დაკონკრეტებულია 2006 წელს, ამავე მისამართზე შეძენილი 235 კვ.მ. მიწის ფართის ღირებულება _ საქართველოს პრეზიდენტობის კანდიდატს მასში 160 000 დოლარი აქვს გადახდილი.
გარდა ამისა, სალომე ზურაბიშვილის საკუთრებაშია 1989 წელს შეძენილი 60 კვ.მ. ფართის ბინა საფრანგეთში, ქალაქ პარიზში. ამ ბინის ფასი 150 000 ევროა.
სალომე ზურაბიშვილმა 2016 წელს შეიძინა 2012 წელს გამოშვებული ავტომანქანა Hyundai, რომელშიც 17 000 დოლარი გადაიხადა.
პრეზიდენტობის კანდიდატმა 2013 წელს მემკვიდრეობით მიიღო საქართველოს ბანკის და თელიანის ფასიანი ქაღალდის ემიტენტი.
დეკლარაციის შევსების დროს ზურაბიშვილს საქართველოს ბანკის საანაბრე ანგარიშზე 5000 დოლარი ჰქონდა; ამავე ბანკის სახელფასო ანგარიშზე 3000 ლარი; ხოლო CIC Banque transatlantique Paris-ში მიმდინარე ანგარიშზე 7400 ევრო ჰქონდა.
სალომე ზურაბიშვილმა, როგორც პარლამენტის წევრმა, 2017 წელს 57645 ლარის ანაზღაურება მიიღო, რაც თვეში 4803 ლარს და 75 თეთრს შეადგენს.
