11 მარტი ქართული სპორტის ისტორიაში ოქროს ასოებით შევა და თავის ღირსეულ ადგილს დაიკავებს. საქართველოს ეროვნული გუნდისა და „ნაპოლის“ შემტევმა ხვიჩა კვარაცხელიამ „ატალანტას“ ალბათ მიმდინარე სეზონის ულამაზესი გოლი გაუტანა, ქართველმა მებრძოლმა მერაბ დვალიშვილმა კი რუსი პიოტრ იანი დამაჯერებლად დაამარცხა.
„ნაპოლიმ“ ბერგამოს „ატალანტას“ დამაჯერებლად სძლია 2:0 და იტალიის ჩემპიონის ტიტულს კიდევ უფრო მიუახლოვდა. ამ შეხვედრაში ანგარიში ქართველმა ფეხბურთელმა გახსნა, თან როგორ, ერთდროულად რამდენიმე მეტოქის „ტყვეობაში“ მყოფი არ დაიბნა, მისთვის ჩვეული დრიბლინგების კორიანტელი დააყენა და მართლაც რომ ულამაზესი და დაუვიწყარი გოლი გაიტანა.
მატჩის შემდეგ გამოცემა „Corriere Dello Sport“-ის ჟურნალისტმა ანტონიო ჯორდანომ ხვიჩა კვარაცხელიას შემდეგი სტრიქონები მიუძღვნა:
„ფე-ნო-მე-ნი! დანარჩენს მნიშვნელობა არ აქვს. ეს არის ცხელი ჰაერი, ეს არის კვარა, ეს არის ფეხბურთი, რომელიც დიდ სიხარულს ავრცელებს. კვარა წყალია, ჰაერია, სინათლეა, მზეა, ახალი ღმერთია, რომელიც ხალხს ფეხბურთს აყვარებს, მნიშვნელობა არ აქვს ვინ, ვისი გულშემატკივარია. ის არის 22 წლის ბიჭი, რომელიც გადის მოედნიდან და იღებს პასუხისმგებლობას, რომ საქართველოს მომავალზე ისაუბროს სოციალური ქსელის გამოყენებით. ის არის ოცნების კაცი, კარგი ბიჭი, რომელმაც ნეაპოლი მოაჯადოვა და შოკისმომგვრელ ფეხბურთს თამაშობს. ის კვარაა, ფე-ნო-მე-ნი!“.
ქართველის თამაშით საერთო აღტაცება გაიზიარა მეორე პოპულარულმა იტალიურმა გამოცემამ „Gazzetta Dello Sport“:
„არსებობს კადრი, რომელიც უკვე ვირუსული გახდა, შუაში კი არის ქართველი, რომელიც მთელ საფეხბურთო სამყაროს ატყვევებს. ის ბალეტის მოცეკვავის მოძრაობებით და ცენტრფორვარდის ძალით ურტყამს ბურთს მარჯვენა ფეხს. თუ თამაში არ გინახავთ და მხოლოდ ამ კადრს უყურებთ, ფიქრობთ: მაგრამ, ის ლურჯი მოთამაშე მარტოა რვა მეტოქის გარემოცვაში, როგორ გაიტანა? მან გაიტანა, როგორც ნამდვილმა ჩემპიონმა, რადგან ჩემპიონებისთვის ძალიან რთული მოქმედებაც მარტივია. ჩვენს ჩემპიონატში არიან ჩემპიონები, მაგრამ ასეთის პოვნა ძნელია“.
მატჩისშემდგომ პრესკონფერენციაზე ხვიჩამ ლუჩანო სპალეტის შექებაც დაიმსახურა:
„მინდა კვარაცხელია შევაქო მის მიერ ჩატარებული ხარისხიანი თამაშისთვის. ის საკუთარი მეკარისგან ერთ მეტრში ორჯერ გამოჩნდა და ორივე შემთხვევაში ბურთის დაბრუნებაში მიიღო მონაწილეობა, შემდეგ კი წავიდა და მეტოქე გუნდის მეკარეს შეუქმნა საფრთხე. შემიძლია ვთქვა, რომ მან მარადონას დონის გოლი გაიტანა. მას ბურთთან შეხების ისეთი თვისება აქვს, საიდანაც ვერავინ იწინასწარმეტყველებს, თუ საით გააგრძელებს მოძრაობას. ის ბურთს ძალიან მცირე ინტერვალებში ეხება.
როდესაც ის სახეში გიყურებს და შემდეგ შენს მოსატყუებლად მიდის, უბრალოდ განადგურებული რჩები. კვარაცხელიას ერთი-ერთზე თამაშისას ერთი მნიშვნელოვანი თვისება აქვს, როგორც კი ზურგს შეაქცევ, მაშინვე „მკვდარი“ ხარ. ახლა შეიძლება მასთან შედარებით მსოფლიოს საუკეთესო ფეხბურთელებიც შეაწუხოთ“.
ახლო წარსულში ლეგენდარულმა ფეხბურთელმა მარკო ვან ბასტენმა ნიდერლანდური ტელეკომპანიის „Ziggo Sport“-ის ეთერში, „ატალანტასთან“ ხვიჩა კვარაცხელიას საოცარ გოლზე ისაუბრა.
„სურათს თუ შეხედავთ, თქვენ უბრალოდ დაინახავთ რვა ადამიანს ერთის წინააღმდეგ, შემდეგ კი იფიქრებთ: შეუძლებელია სიმართლე იყოს, რომ ის აქ გოლს გაიტანს. ძირითადად, ის მხოლოდ ერთ კაცს ეთამაშება თავისი მოქმედებებით, მაგრამ მის გარშემო სულ 8 ფეხბურთელია. ეს ფანტასტიკური გოლია! მსუბუქად თამაშობს, ადვილად მოძრაობს მარჯვნივ და მარცხნივ, თანაც სწრაფად. მას აქვს თავისუფლება, კლასი და კარგად იცის, თუ სად და როდის რა გააკეთოს“.
ესპანეთის „ლა ლიგის“ 25-ე ტურში კი გიორგი მამარდაშვილის „ვალენსიამ“ საკუთარ კედლებში „ოსასუნა“ დაამარცხა – 1:0 და ძალიან მნიშვნელოვანი გამარჯვება მოიპოვა. გიორგი მამარდაშვილს მიმდინარე სეზონში ალბათ ყველაზე იოლი თამაში ჰქონდა, რადგან „ოსასუნას“ კარში არ დაურტყამს, შესაბამისად, ქართველს სეივი არ ჰქონია.
გიორგიმ „ლა ლიგის“ მიმდინარე სეზონის 25 მატჩში 28 გოლი გაუშვა, კარის მშრალად შენახვა კი მეხუთედ მოახერხა.
„ვალენსიამ“ ამ გამარჯვებით 26 ქულა დააგროვა და გასავარდნი ზონა დატოვა. სანაკრებო პაუზამდე რუბენ ბარახას გუნდი ბოლო მატჩს 18 მარტს, მადრიდში „ატლეტიკოსთან“ ჩაატარებს.
11 მარტის უმთავრესი გმირი კი ქართველი მებრძოლი მერაბ დვალიშვილი აღმოჩნდა. ბრძოლა, რომელსაც მთელი საქართველო მოუთმენლად ელოდა, დვალიშვილის სრული დომინაციით წარიმართა და ისეთი გამარჯვებით დასრულდა, მცირე კითხვის ნიშანსაც რომ არ ტოვებდა. ქართველმა UFC-ის სუპერმსუბუქი წონის ყოფილი ჩემპიონი პიოტრ იანი უპრობლემოდ დაამარცხა.
პირველი ორი რაუნდი მერაბმა იანი აშკარად დაჩაგრა – ქართველი დგომშიც უკეთესი იყო და რუსზე მეტი თეიქდაუნიც შეასრულა. მესამე რაუნდიც დვალიშვილს დარჩა – იანს ისეთი ტემპი შესთავაზა, რომ პიოტრმა, ფაქტობრივად, ვერაფერი მოახერხა. საჩემპიონო რაუნდების წინ მერაბი რაუნდებში 3:0-ს იგებდა.
ქართველი მეოთხე რაუნდშიც უკეთესი იყო, მეხუთეში და ალბათ, კარიერის საუკეთესო ბრძოლა ჩაატარა, მეტოქეს გადაუარა, სტრაიკინგშიც აჯობა და ჭიდაობაშიც.
ჩხუბის დასრულების შემდეგ მერაბი პირველ კომენტარებში სპორტული ნაწილზე საუბრის გარდა, უკრაინაში მიმდინარე ომს შეეხო და ამასთანავე, ქართველებს მხარდაჭერისთვის მადლობა გადაუხადა.
„ძალიან ამაყი ვარ! მადლობა თითოეულ ქართველს, რომელიც ლას ვეგასში ჩემს საგულშემატკივროდ ჩამოვიდა და ყველას, ვინც ბრძოლას თვალს ეკრანებთან ადევნებდა. ქართველები მხოლოდ 5 მილიონი ვართ, მაგრამ ძალიან ძლიერები! ძალიან ბედნიერი გახლავართ, რომ UFC-ში ჩემს ქვეყანას წარმოვადგენ.
ჩხუბამდეც არაერთხელ ვთქვი, რომ ეს ბრძოლა ჩემთვის რიგითი მატჩი არ იყო და მას განსაკუთრებულად ვუდგებოდი. თუმცა მაინც ვცდილობდი პროფესიონალად დარჩენას, რაშიც ჩემი გუნდი მეხმარებოდა. მადლობა ღმერთს, ყველაფერი სწორად გავაკეთე.
პიოტრმა ჩემზე თქვა, ნულიაო. ვინ არის ახლა ნული?! ვინ არის ნულიიი? ჩემი საბრძოლო სტილი ყველას ანგრევს, მხოლოდ ალჯამეინ სტერლინგთან, ნამდვილ ჩემპიონთან მაქვს ხოლმე რთული რაუნდები. სხვა შემთხვევაში კი ყველამ იცის, ჩემმა გუნდმა იცის, ყველაფერი არ უნდა ვთქვა, მაგრამ ძალიან რთული სტილი მაქვს, თან გიგა ჭიკაძე მეძახდა პიოტრისთის ფეხებში ძლიერად დამერტყა, რამაც ძალიან კარგად იმუშავა. ნებისმიერს მივმართავ: ვისაც უნდა, იმას ვეჩხუბები, მე ისევ მოწყურებული ვარ!“
დაბოლოს: „მინდა ვთქვა, მე ომის წინააღმდეგი ვარ! დიდება უკრაინას, დიდება საქართველოს! დიდება თავისუფლებას! ჩვენ სწორედ ეს გვჭირდება. შეაჩერეთ ომი, ის უნდა დასრულდეს! და საქართველო, მიყვარხართ, ყველას ძალიან დიდი მადლობა!“ – დასძინა მერაბმა.
მერაბ დვალიშვილმა რუსი მებრძოლის დამარცხებით კარიერაში მე-16 გამარჯვება მოიპოვა, UFC-ში ზედიზედ მეცხრე მატჩი მოიგო და ამ მაჩვენებლით საკუთარ დივიზიონში ქართველი ლიდერი გახდა. სამშაბათს, 14 მარტს, მერაბი სუპერმსუბუქ წონაში რეიტინგის, მინიმუმ, მეორე ნომერი გახდება.
ავტორი
