ოზურგეთში, ქალაქის ცენტრში მდებარე, ყოფილი უნივერმაღის შენობა, რომელიც კომუნისტურ ეპოქაში დიდ სავაჭრო ცენტრს წარმოადგენდა, დღემდე კარგად არის შენარჩუნებული.
ამჟამად ამ შენობაში სააქციო საზოგადოება “იმედი” ფუნქციონირებს. ეს სივრცე ახლაც მრავალფუნქციური სავაჭრო ობიექტია, მცირედი განსხვავებით.
შენობის მთელ სიგრძეზე, წინა ფასადის გასწვრივ, ტროტუარის მიმდებარედ, აქ, როგორც ადგილობრივები ამბობენ, 50 წელზე მეტია, მარადმწვანე ტუიას გაზონი 30 მეტრის სიგრძეზე იყო გაშენებული. ლამაზად და ერთმანეთს გემოვნებით მორგებული ნარგავებისა და შენობის ერთიანი სივრცე, განსაკუთრებით, ქალაქის ცენტრალურ იერსახეს ამშვენებდა და ალამაზებდა.
გასულ კვირაში აქ, მოულოდნელად ოზურგეთის სერვისცენტრის თანამშრომლების ჯგუფი მოვიდა და ამ დიდი შენობის წინ მდებარე მწვანე გაზონის ზოლზე, ბუჩქოვანი კორომი ერთიანად, ძირში მოჭრეს.
_ ისე უცებ მოვიდნენ და ძირიდანვე ასხეპეს, ბუჩქი კი არა, ადამიანი რომ ყოფილიყო, დაყვირებას ვერ მოასწრებდა. აქ ამდენი ადამიანი მუშაობს. დაავადებულიაო, იძახდნენ. ვინ ნახა, ვინ გამოიკვლია, რომ დაავადებულია? ჩვენ არ დაგვინახავს, არ შეგვიმჩნევია, _ ბრაზობდნენ აქ დასაქმებული ადამიანები.
აქვე აღვნიშნავთ, რომ ბუჩქოვანი ზოლის აჭრის პროცესს ჩვენც შევესწარით. ამ ტერიტორიაზე, დღის განმავლობაში, მუდამ ბევრი ადამიანი მოძრაობს და უნებურად შეცბუნებულნი ცნობისმოყვარედ შესცქეროდნენ ასე სასწრაფოდ მოსული სერვისცენტრის თანამშრომლების ქმედებას.
_ ხომ ხედავთ, სულ გადაჭრეს, კითხვაც ვერ მოვასწარით, რატომ ჭრიან ძირში. რაღაცეებს იმიზეზებენ, _ გახმაო, სოკოვანი გაუჩნდაო, ახალი ამოიყრისო… რომ ამოიყაროს, ასე კი არ უნდა აჭრა ფესვამდე, _ ცხარობდნენ გამვლელ-გამომვლელები.
ასაკოვანი ადამიანები უფრო შორს წავიდნენ მოგონებებში
_ აქ, კომუნისტები რომ აშენებდნენ ამ ობიექტებს, ბიძინა ივანიშვილი, მგონი 17-იოდე წლის ასაკში ყოფილა ჩამოსული და მუშაობდა მუშად. ეს აქ ბევრმა იცის. ეს მარადმწვანე ბუჩქოვნებიც 50 წლის იქნება, მეტი თუ არა, მაშინდელი დარგულია. კომუნისტებს არ ეშლებოდათ ასეთი ამბები. ახლა მობრუნებაც ვერ მოვასწარით, მოვიდნენ და გადაჩეხეს. რომ ჰკითხო, საქმე იციან. დაელიათ საქმე, იციან კი არა… _ გვითხრა 74 წლის ქალბატონმა თინა ცერცვაძემ.
“გურია ნიუსის” კითხვაზე, თუ რატომ ჭრიდნენ ასე მოულოდნელად ამ მარადმწვანე წიწვოვნების მწკრივს, ოზურგეთის სერვისცენტრის თანამშრომლებმა გვითხრეს, რომ ასეთი დავალება აქვთ.
_ დავალება გაქვთ, ძირზე მოჭერითო?
_ დიახ, უნდა მოვჭრათ. სოკო გაუჩნდა და…
_ სად ხედავთ სოკოვან დაავადებას? ან რომც იყოს, შეიკრიჭება, შეიწამლება და მცენარე მალე ამოისუნთქავს. ძირში მოჭრა რა მეთოდია?
_ ამოიყრის, კი, ამოიყრის, _ თავისას ამტკიცებდნენ ისინი და მარადმწვანე ზოლი ერთ საათში უკვე აღარ იყო ადგილზე.
_ მე არაფერი ვიცი. მოვიდნენ და მოჭრა დაიწყეს. შეიძლებოდა გაკრეჭა. ისეთი არაფერი შეგვიმჩნევია ამ ბუჩქებისთვის, ხმობა რომ შეპარვოდა. ასე ძირში მაინც არ უნდა მიეჭრათ, _ გვითხრა აქ მომუშავე ქალბატონმა მარინა მეგრელაძემ.
“გურია ნიუსი” ოზურგეთის მუნიციპალიტეტის მერიის ინფრასტრუქტურის სამსახურის უფროსს ესაუბრა.
_ როგორც მე მითხრეს, აქ სოკოვანი დაავადება გაუჩნდა ბუჩქოვნებს. დაზუსტებით კი, სერვისცენტრში გეტყვიან, _ გვითხრა სამსახურის უფროსმა.
ოზურგეთის სერვისცენტრის უფროსის მოვალეობის შემსრულებელმა ირაკლი გაბედავამ ჩვენთან ასეთი კომენტარი გააკეთა:
_ კი, მართალია, რომ აქ ძალიან ლამაზი გაზონი იყო. ეს წიწვოვანი მცენარეები გასულ ზამთარში, დიდთოვლობისას ძალიან დაზიანდა. გადატეხილ იყო და ნაწილობრივ, ტროტუარისკენ გადაზნექილი. ქვეითად მოსიარულეებს ხელს უშლიდა. ამიტომ გადავჭერით. გაზაფხულამდე მიწა კარგად დამუშავდება, შეიწამლება ეს ბუჩქები და სულ მალე ამოიყრის. მასეთი გაგვიცოცხლებია? _ გვითხრა ირაკლი გაბედავამ.
ის ფაქტი, რომ ქალაქის მოსახლეობა, ადგილობრივები უკმაყოფილო არიან ნახევარსაუკუნოვანი მცენარეების მთლიანად გადაჭრით, გაბედავა გვეთანხმება, რომ არაა კარგი შესახედი, თუმცა ამ პრობლემას რამდენიმე თვეში მოაგვარებენ და ბუჩქოვან გაზონებს სასწრაფოდ გააცოცხლებენ.
_ რას გააცოცხლებენ? არ მოვკვდები გაზაფხულამდე და ასეთი სანახავი იქნება მაშინაც. ან არცოდნის ბრალია ასეთი ქმედება, ან სიზარმაცის. უფრო მეორეა. გაიადვილეს საქმე _ რომ გაეკრიჭათ, თითოეული ბუჩქი უნდა დაემუშავებინათ, მერე შეეწამლათ. ამას, სულ ცოტა ერთი კვირა მაინც დასჭირდებოდა. ახლა კი ერთ საათში აჭრეს და გადაყარეს სადღაც. ამას რა მიხვედრა უნდა? გასული ზამთრის მერე, ახლა გაახსენდათ, რომ თოვლმა გადატეხა? ხომ დადიოდით აქ, რა ნახეთ დამახინჯებული და გადატეხილი? ზამთარში რაც გადატყდა, ის მალევე მოჭრეს და გაასუფთავეს. იძახებენ ახლა, ამოიყრის და ამწვანდებაო, აბა, რას იტყვიან? ხომ იყო ამოყრილი და გაზრდილი, _ გვეუბნება ოზურგეთელი გრამიტო მამინაშვილი და ბრაზობს, პენსიის ასაღებად გამოვედი ქალაქში და სახტად დავრჩი აქაურობას რომ შევხედეო.
ბოლო პერიოდში, მარადმწვანე ხე-მცენარეების მოჭრა, არც ისე იშვიათია ოზურგეთის სივრცეში. კონკრეტულად კი, ორიოდე თვის წინ, ექადიის ტერიტორიაზე, ცენტრალურ გზასთან ახლოს, უზარმაზარი ნაძვის ხეები მოჭრეს, რომლის უნებართვო ქმედების გამო, ჯერჯერობით, არავინ დასჯილა. უფრო მეტიც, გაურკვეველია, ვინ რას აშენებს აქ. თითქმის უმოქმედოა მუნიციპალური პოლიცია, რომელიც, უპირველეს ყოვლისა, უნდა ამახვილებდეს ყურადღებას ასეთ ფაქტებზე.
ავტორი
