ისევ დაპირისპირება სხდომაზე და დასასრული აკორდით: “ხალხი მოგკითხავთ!”

31 იანვარს ოზურგეთის მუნიციპალიტეტის საკრებულოს მორიგი სხდომა გაიმართა, რომელსაც საკრებულოს თავმჯდომარე დავით დარჩია უძღვებოდა.

მან სხდომის დამსწრე საკრებულოს წევრებსა და სხვა სტუმრებს, დღის წესრიგით გათვალისწინებული რვა საკითხი გააცნო.

საკითხების განრიგის მიხედვით მოსმენამდე, ტრადიციულად, ნაციონალური მოძრაობის წარმომადგენელმა, საკრებულოს წევრმა, თათია ნიკოლაშვილმა უამრავი ფოტო ააფრიალა და დაიწყო იმ საკითხებისა და შესასრულებელი სამუშაოების ჩამოთვლა, რომლის განხილვა თუ გახორციელება ევალებოდა მუნიციპალიტეტის მერიას, მერს, მის გუნდს და მისი თქმით, არ შეასრულეს.

_ სოფელ ბაილეთში, გია მაჭარაშვილის ოჯახი ამ დრომდე საფრთხის ქვეშაა! ეს ფოტო კი ასახავს, სოფელ ბახვში როგორი უნდა ყოფილიყო საფეხბურთო მოედანი და ამ დრომდე ღორები დადიან იქ… ტალახია და გადათხრილია ყველაფერი. აქედან 20 მეტრში ადამიანებს გზა არ აქვთ… ეს არის ლაშეს სტადიონი, სადაც ტალახში ვარჯიშობენ ასე წარმატებული სპორტსმენები. ასე ასრულებს რვაპუნქტიან გეგმას ბატონი ავთანდილ თალაკვაძე. ის საუბრობდა, რომ ოზურგეთში იცხოვრებდა და თბილისიდან არ მართავდა ოზურგეთს. თუმცა, ყველამ იცის, რომ აქ თვეში რამდენჯერმე ჩამოდის და ისიც ოზურგეთის ბიუჯეტის ხარჯზე…

ასევე, თქვენ მიერ წარმოდგენილ დოკუმენტში, თქვენივე ხელით არის ჩაწერილი, რასაც მოგახსენებთ _ ეს არის გაეროს განვითარების პროგრამის მიხედვით გაკეთებული, თორემ თქვენ ამას თქვენი ხელით არ ჩაწერდით _ აქ, შავით თეთრზე წერია, რომ ოზურგეთის მოსახლეობის 50%-ს წყალი არ აქვს, კანალიზაცია არ აქვს 70%-ს, შიდა გზების 76% მოუწესრიგებელია და თქვენივე ხელით გიწერიათ ისიც, რომ ბევრგან საერთოდ ვერ მიდის სასწრაფო სამედიცინო თუ სახანძრო დახმარება.

ასევე, შიდა ტურიზმის მიმართულებით კატასტროფული მდგომარეობა გაქვთ _ 21%-დან 3%-ზე არის ჩამოსული ეს მაჩვენებელი.

სოციალურად დაუცველთა ბაზაშია მოსახლეობის 53%.

მიგრაციის მხრივ კატასტროფული მაჩვენებელია, იგივეა დემოგრაფიული მდგომარეობის მხრივ… თქვენ ამ დღის წესრიგით უნდა მსჯელობდეთ აქ… _ თქვა თათია ნიკოლაშვილმა.

ნიკოლაშვილმა, ეტყობა, სერიოზულად იმუშავა, რადგან გასული წლის მიწურულის ბოლო სხდომაზე, აშკარად მოუმზადებელი იყო ოპოზიციის გამოსვლა. ამჯერად კი მან უამრავი პრობლემის ირგვლივ ისაუბრა და აღსანიშნავია ისიც, რომ ცალკეული რეპლიკების გარდა (“ექვსი სტადიონია გაკეთებული, თვლა თუ იცით?”, “ილაპარაკე დილამდე, ეგ არ გიჭირს”), “ქართული ოცნების” წარმომადგენელ საკრებულოს წევრებს მისთვის ხელი არ შეუშლიათ.

ნიკოლაიშვილს უპასუხა მუნიციპალიტეტის მერის პირველმა მოადგილემ, გიორგი ღურჯუმელიძემ (ის დღის წესრიგით გათვალისწინებული პირველი საკითხის ირგვლივ, ისეც საუბრობდა და გადაერთო საპასუხოდ):

_ თათია, მაინც კითხულობ მაგ დაწერილს და გადმოგვეცი. ვნახავთ. ეს საკითხები აქ ისეც გვქონდა წარმოდგენილი. და კიდევ გაეროს მიზნები არაა ის, რაზეც საუბრობთ _ რადიკალების მიზნებია… საზომ ერთეულებში რომ არეულობა გჭირთ და არითმეტიკაში რომ ვერ ერკვევით, ვიცით. 273 ჰექტარი თქვენ რაოდენობაში და ცალობაში გადათვალეთ… ერთი რამ უნდა გითხრათ, რაც მომესმა _ ეს არის ლაშეს სტადიონი. ისე არც ერთ კითხვაზე არ დაგამადლით პასუხს. ზუსტად გეტყვით, რომ არაერთი სტადიონია აშენებული და შემიძლია, წაგიყვანოთ და დაგათვალიერებინოთ.

როდესაც ჩვენ მერიაში დავიწყეთ მუშაობა და მოვახდინეთ ქონების ინვენტარიზაცია, სამწუხაროდ, აღმოჩნდა, რომ ის პროექტი, რომელიც გახორციელდა სამოქალაქო ბიუჯეტის ფარგლებში (აშენდა სამი შენობა _ ეს იყო გასახდელები, ადმინისტრაციის დარბაზი, ასევე, ბავშვებისთვის განკუთვნილი დარბაზი), სრულად განადგურებული დაგვხვდა. პატრონიც კი არ ჰყავდა. 2021 წელზე გესაუბრებით…. შესაბამისად, ჩვენ საკრებულოს სხდომაზე მივიღეთ გადაწყვეტილება და საფეხბურთო გუნდ “მერცხალს” დავავალეთ ბავშვთა ფეხბურთის განვითარება. გასულ წელს გამოცხადდა ტენდერი. საფეხბურთო გუნდმა “მერცხალმა” შეიძინა მასალები. როგორც კი კარგი ამინდები დადგება, დაიწყება ამ სექტორის მოწესრიგება. უფრო მეტსაც გეტყვით, მაგრამ თქვენ ამ ყველაფრის მოსმენა არ გინდათ… _ თქვა ღურჯუმელიძემ ოპოზიციური ფლანგის მისამართით.

ოპოზიციის წარმომადგენლებს ამჯერად დარბაზი არ დაუტოვებიათ და ღურჯუმელიძის საუბარს ბოლომდე უსმინეს.

31 იანვრის საკრებულოს სხდომაზე, დღის წესრიგით გათვალისწინებულ რვავე საკითხზე იმსჯელეს.

საკრებულოს გადაწყვეტილებით, დამტკიცდა შემდეგი განკარგულების პროექტები: “მუნიციპალიტეტის საკუთრებაში არსებული მერიის ადმინისტრაციულ ერთეულში მდებარე 429 კვ.მ. არასასოფლო-სამეურნეო დანიშნულების მიწის ნაკვეთის სახელმწიფოსთვის საკუთრებაში გადაცემის შესახებ” და “მუნიციპალიტეტის საკრებულოს 2024 წლის I კვარტლის სამუშაო გეგმის დამტკიცების თაობაზე”.

საჯარო ადმინისტრაციული წარმოება დაიწყო “მუნიციპალიტეტის საკუთრებაში არსებული უძრავი ქონების საპრივატიზაციო ობიექტების ნუსხისა და პრივატიზაციის გეგმის დამტკიცების თაობაზე” განკარგულებების მისაღებად.

აგრეთვე, საკრებულომ, მიიღო შემდეგი დადგენილება: “მუნიციპალიტეტის ტერიტორიაზე არსებული სახელმწიფო და მუნიციპალიტეტის საკუთრებაში არსებული არასასოფლო-სამეურნეო დანიშნულების მიწის ნაკვეთის ნორმატიული ფასის დადგენის შესახებ.” ასევე, ცვლილება შევიდა “მუნიციპალიტეტის ქონების საწყისი საპრივატიზებო საფასურისა და ქირის საწყისი საფასურის დადგენის თაობაზე” დადგენილების პროექტში.

საკრებულოს სხდომის დასრულებისთანავე, როცა უკვე ყველა წასასვლელად ემზადებოდა, საკრებულოს წევრმა ენმ-დან, გიორგი შილაკაძემ ითხოვა, მოესმინათ მისთვის.

მან ისაუბრა “პარვუს ჯგუფზე”, რომელსაც ოზურგეთის მუნიციპალიტეტის სოფელ შემოქმედში, მდინარე ბჟუჟზე, ჰესის მშენებლობა უკვე დაწყებული აქვს. თუმცა, ამის თაობაზე, როგორც სოფელში ბევრი აცხადებს და არაერთხელ გახმოვანდა მედიაშიც, ხალხისთვის არაფერი უკითხავთ.

_ მოსულიყო ეს ხალხი და ეთქვა, რას აშენებს, სად და რამდენს, რა მდგომარეობაა დღეისთვის… მინდა, ვკითხო გიორგი ღურჯუმელიძეს _ 2023 წლის 27 სექტემბერს მე დავწერე განცხადება და ვითხოვდი პასუხს… რაკი ასეა ცნობილი, რომ “პარვუს ჯგუფს” და ოზურგეთის მუნიციპალიტეტის მერიას გაფორმებული აქვთ მემორანდუმი… პასუხი არ ჩანს. ჩემი თხოვნაა, გამცეთ პასუხი, მაინტერესებს, თქვენ რა ზომები მიიღეთ… _ იკითხა შილაკაძემ.

_ კი, ბატონო, რაც შეეხება ამ ჯგუფთან შეხვედრას, როცა იქნება, შეგატყობინებთ ,_ უთხრა მას საკრებულოს თავმჯდომარემ, დავით დარჩიამ.

_ როდის, რომ დაამთავრებენ მუშაობას? მერე რა აზრი აქვს? _ კითხვა შეუბრუნა შილაკაძემ და მერე საკრებულოს წევრებს მიმართა, რომლებიც უკვე დარბაზიდან გადიოდნენ:

_ ბატონებო, ახლა თქვენ გადიხართ, ხომ? ჩვენ პასუხისმგებლები ვართ იმაზე, თუ მუნიციპალიტეტში სად, რა, როგორ მიმდინარეობს. მარტო ჩემი მოსაკითხი არაა ეს ამბავი, თქვენც უნდა იკითხოთ, თუ არადა, ხალხი მერე მოგკითხავთ, მოგვკითხავს ყველას… _ მიადევნა გიორგი შილაკაძემ დარბაზიდან გასულ საკრებულოს წევრებს.

ჩვენს მკითხველს შევახსენებთ, რომ “გურია ნიუსი” არაერთხელ წერდა მდინარე ბჟუჟზე “პარვუს ჯგუფის” მიერ, სამი ჰესის მშენებლობის თაობაზე.

ერთ-ერთ ინტერვიუში, “პარვუს ჯგუფის” ხელმძღვანელმა, ზურაბ ბესელიამ ასე განაცხადა: “ჩვენ რასაც გავაკეთებთ, ყველაფერი იქნება კანონმდებლობის დაცვით”. ის ჟურნალისტებთან შეხვედრასაც აანონსებდა, თუმცა, დღემდე მსგავსი არაფერი მომხდარა.

ამასობაში სოფელ შემოქმედსა და გომში, მოსახლეობაში ხმები დადის, რომ სათითაოდ ხდება ადგილობრივებთან შეთანხმება “სხვა გაგებით”.

მკითხველი, ფართო საზოგადოება ელოდება კონკრეტულ და საფუძვლიან პასუხს.

ჩვენ მზად ვართ, ორივე მხარეს მოვუსმინოთ და აქტიურად გავაშუქოთ აღნიშნული საკითხი.