ცოტა ხნის წინ გავრცელდა ინფორმაცია, რომ ინგლისური „ტოტენჰემი“ საქართველოს ეროვნული გუნდისა და ესპანური „ვალენსიას“ კარის დარაჯი გიორგი მამარდაშვილით დაინტერესდა. გუშინ ეს ინფორმაცია გამოცემამ „ Football London“ კიდევ ერთხელ ოფიციალურად დაადასტურა.
„ტოტენჰემს” მიმდინარე სეზონში ძირითადი მეკარე, უგო ლორისი დაუშავდა, რის გამოც კარში ფრეიზერ ფორსტერს უწევს დგომა. არავინ იცის, უკვე ვეტერანი ლორისი, რომელმაც საფრანგეთის ნაკრებიდან წამოსვლის შესახებ რამდენიმე თვის წინ განაცხადა, ტრავმის შემდგომ როგორ ფორმაში დაბრუნდება. ლონდონელები წინ იყურებიან, მათი ერთ-ერთი მთავარი სამიზნე კი სწორედ გიორგი მამარდაშვილია“, – დაიწერა ინგლისურ გამოცემაში.
საინტერესოა რომ „ტოტენჰემის“ გარდა ქართველი მეკარის შესახებ ინტერესს მადრიდს „ატლეტიკოც“ სერიოზულად გამოხატავს.
გუშინ, ესპანურმა გამოცემამ „Marca“ ხვიჩა კვარაცხელიას წერილი მიუძღვნა და განსაკუთრებული ყურადღება ერთ თემაზე გაამახვილა.
„აღმოჩნდა, რომ ქართველი ხვიჩა კვარაცხელია, რომელმაც „სერია A“ და ჩემპიონთა ლიგა საოცარი თამაშით მოაჯადოვა, „ნაპოლიში“ სეზონში სულ რაღაც 1.2 მილიონ ევროს იღებს. და მხოლოდ ახლა აპირებს კლუბი მისთვის ახალი კონტრაქტის შეთავაზებას, ხელფასი კი 2.5 მილიონ ევრომდე გაიზრდება. სამაგიეროდ, კონტრაქტი 2028 წლამდე გახანგრძლივდება. შეუძლებელია ამ ციფრებს არ მიექცია ყურადღება დაინტერესებულ კლუბებში, რადგან კვარაცხელიას ხელფასი ძალზე კონტრასტულია მის ძალიან მაღალ დონესთან შედარებით.
ეს ხელფასი ხელმისაწვდომია პრემიერლიგის ნებისმიერი კლუბისთვის, თუნდაც ჩემპიონშიპის კლუბებისთვის.
დე ლაურენტისის პოლიტიკა „ნაპოლიში“ ასეთია: არანაირი ვალები, სამაგიეროდ, კლუბში შეუძლებელია ვინმეს ხელფასი 3.5 მილიონ ევროს აღემატებოდეს, ძალზე იშვიათი გამონაკლისის გარდა: ქართველის ხელფასი ნელ-ნელა გაიზრდება, რომ „ნაპოლის“ ფინანსური ბალანსი არ დაირღვეს. ამ წუთას კლუბში ყველაზე მაღალი ხელფასი 4.5 მილიონი ევროა.
აურელიო დე ლაურენტისი აცხადებს, რომ არსებობს შეთავაზებები, რომელთა უარყოფა შეუძლებელია, თუმცა კლუბში ისიც კარგად დააფიქსირეს, რომ ოსიმენის ან კვარაცხელიას სანაცვლოდ 100 მილიონი ევრო ეცოტავებათ“, – დაწერა ესპანურმა გამოცემამ.
გუშინვე, ხვიჩა კვარაცხელიას ცნობილმა ბრიტანულმა გამოცემამ „Daily Mail“ გულთბილი წერილი მიუძღვნა.
„კვარაცხელიას ისევე უყვარს „ნაპოლი“, როგორც ნეაპოლში უყვართ ის, რომ აღარაფერი ვთქვათ ლუჩანო სორბილოს პიცაზე, წყნარ გარეუბნებზე და „მარადონას“ გარშემო შექმნილ ვითარებაზე. პირველად, როდესაც მან „ნაპოლის“ სტადიონზე საქართველოს დროშები დაინახა, იტალიურ კლუბს ერთგულება შეჰფიცა.
ქალაქში არიან ისეთები, ვინც ამბობენ, რომ ხვიჩა პიაცა მარადონაზე უნახავთ ისეთ დროს, როდესაც იქ ცოტა ხალხია, თუმცა ისინი ასევე იფიცებიან, რომ მათ არასოდეს დაუნახავთ, რომ ქართველი მდიდრულ მანქანას მართავდეს. კვარაცხელიას არ უყვარს ფუფუნება და სიმდიდრე. არც ტელევიზიის მოყვარულია და ინტერვიუებიც სძულს, რადგან ეშინია, რომ მას ვერ გაუგებენ და ასევე, არ უნდა ვარჯიშისგან ყურადღება გაეფანტოს. მას არ აქვს ტატუები, არც პირსინგი და მოკრძალებულად ცხოვრობს. ის იტალიური სამზარეულოთი, მოცარელათი და კამპანია პასტათია აღფრთოვანებული. მისი საყვარელი კერძი „სან მარცანოს“ სოუსით მომზადებული პასტაა, რომელსაც სახლში ხშირად უკვეთავს.
„ნაპოლის“ ერთი სული აქვს ქართველს ახალი, გრძელვადიანი კონტრაქტი გაუფორმოს. იტალიური წყაროების მიხედვით, „ნაპოლის“ ქართველისთვის ხელფასის გაორმაგება და 5 წლით გახანგრძლივება სურს. თუმცაღა, ქართველის ბედი სხვა გუნდების შემოთავაზების დროს გადაწყდება. რთული წარმოსადგენია ის, თუ როგორ შეუძლია „ნაპოლიმ“ უარი თქვას 120 მილიონიან შეთავაზებაზე, როდესაც ის მხოლოდ 10 მილიონად შეიძინა. პრობლემა შესაძლოა მადრიდის „რეალი“ იყოს, რომელიც ახალ რონალდუს ეძებს. არ დავივიწყოთ „ბაიერნი“ და პრემიერლიგის ტოპ კლუბებიც. ამ მომენტში, კვარას არ სურს განცხადებების გაკეთება მომავლის შესახებ, თუმცა ერთი რამ კი ცხადია, ის იტალიაში „ნაპოლის“ გარდა სხვა არსად ითამაშებს.“
გუშინ, ესპანეთის ნაკრების ყოფილ მთავარ მწვრთნელ ლუის ენრიკეს, მადრიდის „ატლეტიკომ“ სამწლიანი კონტრაქტი გაუმზადა, იმ შემთხვევისთვის, თუ დიეგო სიმეონე წლის ბოლოს გუნდიდან წასვლას გადაწყვეტს.
ლუის ენრიკე ბრაზილიის ნაკრების მთავარი მწვრთნელის თანამდებობაზე მოიაზრებოდა, თუმცა ის სიიდან ამოღებულ იქნა და მთავარ კანდიდატად კვლავ კარლო ანჩელოტი რჩება.
გუშინ ერთი სამწუხარო ფაქტი გავრცელდა – 89 წლის ასაკში ფრანგული ფეხბურთის ლეგენდა და მსოფლიო ჩემპიონატის რეკორდსმენი, ჟუსტ ფონტენი გარდაიცვალა.
ფონტენმა 1958 წელს, შვედეთში გამართულ მსოფლიო ჩემპიონატზე 13 გოლის გატანა მოახერხა. იმ მუნდიალზე საფრანგეთის ეროვნულმა გუნდმა ნახევარფინალში გასვლა შეძლო.
ფონტენი საფრანგეთის ეროვნულ ნაკრებში 1953-1960 წლებში თამაშობდა და 21 შეხვედრაში 30 გოლის გატანა მოახერხა.
ავტორი
