ისრაელში, თელ-ავივში, ტერაქტს 1 ადამიანი ემსხვერპლა, 6 კი მძიმედ დაშავდა. რამდენიმე დაზარალებულის მდგომარეობა მძიმეა. ადგილობრივი მედიის ინფორმაციით, დაღუპულია 36 წლის იტალიელი ტურისტი.
მედიაში გავრცელებულ კადრებში ჩანს, რომ ტერორისტი ავტომანქანით ხალხმრავალ ადგილას მიზანმიმართულად შევარდა. პოლიციელმა, რომელიც ინციდენტს შეესწრო ტერორისტს ცეცხლი გაუხსნა. თავდამსხმელი მიყენებული ჭრილობებით ადგილზე გარდაიცვალა.
ტერაქტის საპასუხოდ, ისრაელის პრემიერმინისტრმა პოლიციის რეზერვებისა და ისრაელის თავდაცვის ძალების წევრების მობილიზება გამოაცხადა.
“პრემიერმინისტრმა ტერორისტულ თავდასხმებთან დასაპირისპირებლად ისრაელის პოლიციას დაავალა, დაიწყოს მობილიზება სასაზღვრო პოლიციის ყველა ქვედანაყოფის და უბრძანა IDF-ს, შეძლოს დამატებითი ძალების მობილიზება”. – ნათქვამია განცხადებაში.
6-7 აპრილს ისრაელმა, ღაზის სექტორიდან და ლიბანიდან რაკეტების სროლის პასუხად,აღნიშნულ ტერიტორიებზე იერიშები მიიტანა.
როგორც timesofisrael წერს, გასულ ღამეს პალესტინურმა ჯგუფებმა ღაზის სექტორიდან 44-მდე რაკეტა ისროლეს, ორ ტალღად. ისრაელმა საპასუხო იერიშები ორივე ტალღის შემდეგ მიიტანა. მათი სამიზნე ანკლავის მმართველი რადიკალური დაჯგუფების, ჰამასის 10-მდე ობიექტი იყო. იერიშები მიიტანეს ჯგუფის გვირაბებზე, იარაღის საწარმოებსა და რაკეტის გამშვებ დანადგარებზე.
აქამდე, ლიბანის სამხრეთიდან, რომელსაც ირანის მიერ მხარდაჭერილი რადიკალური დაჯგუფება ჰეზბოლა აკონტროლებს, ისრაელის მიმართულებით 34 რაკეტა ისროლეს. ჰეზბოლას პასუხისმგებლობა არ აუღია, თუმცა აქ მოქმედი პალესტინური დაჯგუფებები მსგავს თავდასხმას მათი ნებართვისა და ინფრასტრუქტურის გარეშე ვერ განახორციელებდნენ. ისრაელის თავდაცვის ძალები აცხადებენ, რომ სამხრეთ ლიბანში იერიშები ჰამასის აქ მყოფი განშტოების ინფრასტრუქტურაზე მიიტანეს. ჰეზბოლას მიერ კონტროლირებად სამხრეთ ლიბანში, სადაც პალესტინელ ლტოლვილთა ბანაკებია, ჰამასს გარკვეული გავლენები აქვს.
როგორც გამოცემა წერს, ისრაელის თავდაცვის ძალებში ამბობენ, რომ სამხრეთ ლიბანში ჰამასს მოქმედების საშუალებას არ მისცემენ და მათ თავდასხმებზე პასუხისმგებლობას ლიბანს აკისრებენ.
უსაფრთხოების საბჭოს კრებაზე ისრაელის პრემიერმინისტრმა, ბენიამინ ნეთანიაჰუმ აღნიშნა, რომ ქვეყანაში სასამართლო რეფორმასთან დაკავშირებული მიმდინარე შიდა უთანხმოება იერუსალიმს მტკიცე პასუხის გაცემაში ხელს ვერ შეუშლიდა.
ცნობისთვის, დაძაბულობის ზრდა 5 აპრილს, იერუსალიმში მდებარე ალ-აკსას მეჩეთში პალესტინელებსა და ისრაელის პოლიციას შორის შეტაკებამ გამოიწვია. წლის ეს პერიოდი ისრაელში მუდამ დაძაბულია, რადგან ებრაელები პასექს, არაბები კი რამადანის წმინდა თვეს აღნიშნავენ. 2021 წელს მსგავსი დაძაბულობა 11-დღიან ომში გადაიზარდა. ჰამასმა და სხვა პალესტინურმა ჯგუფებმა მაშინ 3 000-ზე მეტი რაკეტა ისროლეს, ისრაელს კი საპასუხო იერიშები მიჰქონდა. კონფლიქტი ეგვიპტის შუამავლობით დასრულდა.
ირანის მიერ მხარდაჭერილ ჰეზბოლას ახლო კავშირები აქვს ღაზის სექტორში მოქმედ პალესტინურ დაჯგუფებებთან: ჰამასთან და ისლამურ ჯიჰადთან.
ავტორი
