არავინ მოელოდა რომ საქართველოს 21-წლამდე ნაკრები ევროპის პირველობაზე ასეთი წარმატებით იასპარეზებდა. რასაკვირველია ჩვენი გუნდი სუსტთა კატეგორიას არ განეკუთვნება, მაგრამ მეტოქეეები ევროპისა და მსოფლიოს მასშტაბით ძალიან ძლიერები გახლდნენ. ქართველმა ახალგაზრდებმა შეუძლებელი შეძლეს და მეოთხედფინალში გასვლასთან ერთ ნაბიჯში იმყოფებიან.
საქართველოს ნაკრები ჯგუფიდან შეიძლება ბოლო ტურში წაგებითაც კი გავიდეს. ნებისმიერ შემთხვევაში დაძლევს ჯგუფურ ეტაპს, ხოლო მოგების შემთხვევაში სულაც პირველ ადგილზე გავა.
საქართველოს ნაკრები ჯგუფიდან გავა თუ:
მოიგებს ნიდერლანდებთან (თან ჯგუფში პირველ ადგილს დაიკავებს).
ფრედ ითამაშებს ნიდერლანდებთან (ამ შემთხვევაში პირველ ადგილს დაიკავებს, თუ პარალელურად პორტუგალია არ წააგებს ბელგიასთან, ან ბელგია ვერ მოიგებს 3 ბურთით).
საქართველო ჯგუფიდან შეიძლება გავიდეს წაგების შემთხვევაშიც, ოღონდ მხოლოდ მეორე ადგილით (თუ პორტუგალია არ წააგებს ბელგიასთან).
საქართველოს ნაკრები ჯგუფიდან მხოლოდ ერთ ვარიანტში ვერ გავა: თუ წააგებს და ბელგია მოიგებს.
ჩვენი ჯგუფი მეოთხედფინალში C ჯგუფთან არის დაწყვილებული (ინგლისი, გერმანია, ისრაელი, ჩეხეთი). პირველადგილოსანი მეოთხედფინალს თბილისში, „მიხეილ მესხზე“ ითამაშებს, მეორეადგილოსანი კი ქუთაისში, „რამაზ შენგელიაზე“.
ბოლო ტურის მატჩები, საქართველო – ნიდერლანდები და პორტუგალია – ბელგია 27 ივნისს, ერთმანეთის პარალელურად 20:00 საათზე გაიმართება.
საყურადღებოა, რომ ევროპის 21-წლამდე ჩემპიონატზე მატჩზე დასწრების რეკორდი საქართველოში, თბილისში, „დინამო არენაზე“ დამყარდა!
საქართველოსა და ბელგიის ჯგუფური ეტაპის მეორე ტურის შეხვედრას 41 887 გულშემატკივარი დაესწრო, რაც 21-წლამდელთა შორის პირველად მოხდა. აქამდე რეკორდი ბარსელონას ეკუთვნოდა, როდესაც 1996 წლის 31 მაისს, ესპანეთისა და იტალიის ფინალურ შეხვედრას 35 500 გულშემატკივარი დაესწრო.
ეს რაც შეეხება ფინალურ ტურნირს, საკვალიფიკაციო ეტაპსაც თუ მივიღებთ მხედველობაში, რეკორდი 2023 წლის ნოემბერში სტამბოლში დამყარდა, როცა თურქეთისა და გერმანიის 21-წლამდელთა ნაკრებების დაპირისპირებას თვალი სტადიონიდან 42 ათასმა ქომაგმა ადევნა. თუმცა, სავარაუდოდ, თბილისი ბოლო ტურში ამ შედეგსაც გააუმჯობესებს.
გუშინ, იტალიელმა ჟურნალისტმა პალმერიმ „ნაპოლის“ მფლობელ აურელიო დე ლაურენტისს შეუტია და ხვიჩა კვარაცხელიასთვის ახალი კონტრაქტის სანაცვლოდ შეთავაზებული ხელფასის გამო სასტიკად გააკრიტიკა.
როგორც მან განაცხადა, დე ლაურენტისი ხვიჩას ფრენბურთელის ხელფას გადაუხდის.
„წავიკითხე, რომ დე ლაურენტისს კვარაცხელიას შესანარჩუნებლად მზად აქვს „ჩემპიონის“ ხელფასი – წელიწადში 3 მილიონი ევრო. გასაგებად რომ ვთქვათ, ეს 25%-ით ნაკლებია, ვიდრე ორიგის, მატიჩის და ლოზანოს ხელფასები. თუმცა, არ დაუკონკრეტებიათ რომელი სახეობის ჩემპიონის ხელფასია 3 მილიონი, ალბათ ფრენბურთის“, – თქვა ირონიულად პალმერიმ.
ხვიჩა კვარაცხელიას „ნაპოლისთან“ კონტრაქტი 2027 წლამდე აკავშირებს, ახალი კონტრაქტის გაფორმება კი 2028 წლამდეა მოსალოდნელი.
საქართველოს ნაკრებისა და „ვალენსიას“ მეკარე გიორგი მამარდაშვილი კი მილანის „ინტერში“ ანდრე ონანას შეცვლის მთავარი კანდიდატია.
გამოცემა „Corriere Dello Sport“-ის მტკიცებით, იტალიელები ანდრე ონანას თუ ვერ შეინარჩუნებენ, აქცენტს გიორგის შეძენაზე გააკეთებენ. კამერუნელს „ჩელსი“ და „მანჩესტერ იუნაიტედი“იწვევენ. ბოლო დროს განვითარებული მოვლენებიდან გამომდინარე, უფრო დიდი შანსია, რომ ის მანჩესტერულ გუნდს შეუერთდეს, სადაც ერიკ ტენ ჰაგი მუშაობს, რომელსაც „აიაქსიდან“ კარგად იცნობს. იტალიელები ონანას სანაცვლოდ 50-60 მილიონ ევროს ითხოვენ.
მამარდაშვილის შეძენა „ინტერს“ დაახლოებით 25-30 მილიონი ევრო დაუჯდება. მანამდე „ინტერისთვის“ პრიორიტეტი „ემპოლის“ კარის დარაჯი გულიელმო ვიკარიო იყო, მაგრამ ის კარიერას „ტოტენჰემში“ გააგრძელებს. ამგვარად, გამოიკვეთა 22 წლის ქართველის ვარიანტი. ასევე ასახელებენ შვეიცარიელი იან ზომერის სახელსაც, თუმცა მამარდაშვილი მთავარი ფავორიტია.
ავტორი
