ამ დღეებში მთელი მსოფლიოს ყურადღება კატარში მიმდინარე საფეხბურთო მუნდიალისაკენ არის მიმართული. უდიდესი საფეხბურთო დღესასწაულის გარდა პლანეტაზე არაერთი სხვა მნიშვნელოვანი სპორტული მოვლენაც ხდება, რომლებიც ქართველი გულშემატკივრებისათვის განსაკუთრებით საინტერესო და აქტუალურია.
იტალიურმა სპორტულმა მასმედიამ ხვიჩა კვარაცხელია კრიშტიანო რონალდუს შეადარა და დაასკვნა, რომ „ნაპოლი“ არ შემცდარა, როდესაც გასულ ზაფხულს 21 წლის ქართველი დაიმატა და არა – „მანჩესტერ იუნაიტედის“ პორტუგალიელი ვარსკვლავი.
გუშინ ცნობილი გამოცემა „La Gazzetta dello Sport“ ხვიჩა კვარაცხელიას თემას კიდევ ერთხელ შეეხო.
„აგვისტოს ბოლოს „ნაპოლთან“ დაკავშირებულ სატრანსფერო ხმებს თუ გავიხსენებთ, დღეს ღიმილს მოგვგვრის. მაშინ აგენტი ჟორჟე მენდეში ნეაპოლში რონალდუს მოყვანას, ხოლო „მანჩესტერ იუნაიტედში“ ოსიმენის დაახლოებით 100 მილიონად გადაყვანას აპირებდა. ლუჩანო სპალეტისთვის საბედნიეროდ, ეს გარიგება არ შედგა და პორტუგალიელი აგენტის იდეა იდეად დარჩა. საბედნიეროდ იმიტომ, რომ დღევანდელი გადმოსახედიდან, ციფრებისა და შეფასებების გათვალისწინებით, ხვიჩა კვარაცხელიას საქმეები გაცილებით კარგად მისდის, ვიდრე ლეგენდარულ რონალდუს რომლითაც ქართველი ყოველთვის აღფრთოვანებული იყო.
ჟურნალი „FourFourTwo“ „ნაპოლის“ ტალანტს 37-ე ადგილზე აყენებს მსოფლიოს 2022 წლის „Top 100“–ში, რაც შვიდი პოზიციით მაღალია, ვიდრე მისი ბავშვობის კუმირის. გასაოცარი ისაა, რომ KK77 (ხვიჩა კვარაცხელია, N77) ამ კალენდარული წლის დასაწყისში ბათუმის „დინამოში“ გამოდიოდა – ქართულ კლუბში, რომელიც საერთაშორისო ყურადღებას ნაკლებად იმსახურებს. მაგრამ „სერია A“–ს 12 და ჩემპიონთა ლიგის 5 მატჩი საკმარისი აღმოჩნდა იმისთვის, რომ კვარაცხელიას შთაბეჭდილება ყველა ძირითად დამკვირვებელზე მოეხდინა და ამ პრესტიჟულ რეიტინგში სწრაფად დაწინაურებულიყო“.
გუშინვე, გამოცემამ „Areanapoli.it“ გაავრცელა ცნობა რომ, მსოფლიო ჩემპიონატის წინ, „ნაპოლის“ სპორტული დირექტორის, კრისტიანო ჯუნტოლისა და ხვიჩა კვარაცხელიას აგენტების შეხვედრა შედგა.
„ხვიჩა კვარაცხელია ყოველთვის ცდილობს „ნაპოლის“ მაისურით გუნდისთვის ყველაფერი გააკეთოს. მისმა აჩქარებებმა და დრიბლინგის უნარმა გააოცა როგორც გულშემატკივრები, ასევე საფეხბურთო ექსპერტები. საოცარია, ის არ ფიქრობს ძვირად ღირებულ მანქანებზე და არ უყურებს იმას, თუ რამდენს გამოიმუშავებენ სხვა ფეხბურთელები. ახლა კი ერთი სული აქვს, როდის დაუბრუნდება მოედანს.
თუმცა, ნორმალურია, რომ „ნაპოლი“ ქართველისთვის გაუმჯობესებული კონტრაქტის შეთავაზებას აპირებს. მაგრამ ვიმეორებთ, ეს მხოლოდ აურელიო დე ლაურენტისისა და კრისტიანო ჯუნტოლის ინიციატივით ხდება და არა თავად ფეხბურთელის. ხვიჩას ინტერესებს: მამუკა ჯუღელი, კრისტიან ძაკარდო და ჯენარო დი ნარდო წარმოადგენენ.
ჯუნტოლისა და აგენტების შეხვედრის შემდეგ, ყველაფერი ბუნდოვნად რჩება. მხარეებმა ზოგადად ისაუბრეს, თუ რამდენად შედეგიანია ხვიჩა და როგორ იხარჯება მოედანზე. მოლაპარაკებების პროცესში არაფერი ითქვა ხელფასზე ან ბონუსებზე. თუმცა, როგორც ჩანს, ამის დროც მალე მოვა“. – დაწერა იტალიურმა გამოცემამ.
რაც შეეხება ამჟამად „მანჩესტერ იუნაიტედში“ „შერისხულ“ კრიშტიანუ რონალდუს. გუშინ გამოცემამ „sport.es“ გაავრცელა ცნობა, რომ მას შემდეგ რაც მადრიდის „რეალმა“ ქარიმ ბენზემას ტრავმის გამო თავდამსხმელის დამატება გადაწყვიტა, კრიშტიანუმ მადრიდულ გუნდს საკუთარი თავი ექვსი თვით შესთავაზა.
სკანდალური ინტერვიუს შემდეგ ფეხბურთის პორტუგალიელი ვარსკვლავი „მანჩესტერ იუნაიტედს“ დიდი ალბათობით დატოვებს. თუმცა, მთავარი გადასაჭრელი პრობლემა ხელფასის საკითხია – რონალდუმ კონტრაქტით დარჩენილ 6 თვეში ინგლისური გუნდისაგან, დაახლოებით, 12 მილიონი ფუნტი უნდა მიიღოს. კლუბს კრიშტიანუსთვის არაფრის გადახდა არ სურს და პრემიერლიგის ყველაზე მაღალანაზღაურებადი ფეხბურთელის გაშვებას უფასოდ გეგმავს.
რონალდუს „რეალში“ დაბრუნება აქამდეც უნდოდა, მაგრამ მადრიდელებს ინიციატივა არ გამოუჩენიათ, ახლა კი, ბენზემას ტრავმამ სცენარი შეცვალა. ფლორენტინო პერესს კრიშტიანუსთან კარგი ურთიერთობა აქვს, თუმცა ტრანსფერის განხორციელებას ხელს ერთი ფაქტორი უშლის, რომელიც „რეალის“ პრეზიდენტმა ჯერ ვერ გადაწყვიტა. პერესი მიიჩნევს, რომ ბენზემას გამოჯანმრთელების შემდეგ სწორედ ფრანგი უნდა იყოს გუნდის მთავარი მოთამაშე, პორტუგალიელის ხასიათიდან გამომდინარე, ეს პრობლემა შეიძლება გახდეს.
ევროპის კონტინენტზე საქართველოს საკალათბურთო ნაკრების ერთდროულად ორი მოთამაშის ახალ კლუბებში დებიუტი შესდგა.
ბექა ბურჯანაძემ იტალიის „სერია ა“–ში „რეჯიო ემილიას“ რიგებში სადებიუტო შეხვედრა ჩაატარა. მისმა ახალმა კლუბმა „ვერონას“ უმასპინძლა და 5 ქულით – 65:70 დამარცხდა.
ბურჯანაძემ 10 ქუთი ითამაშა და შეხვედრა 3 ქულითა და 1 შედეგიანი გადაცემით დაასრულა. ბექამ 2 ორქულიანი ააცილა, ხოლო 2 სამიანიდან ერთი გამოიყენა.
დუდა სანაძეს კი კვიპროსის ჩემპიონატში ბენეფისი გამოუვიდა. საქართველოს ეროვნული ნაკრების წევრმა „ანორთოსისში“ დებიუტი 27 ქულით, მატჩის MVP-ის ტიტულით და რაც მთავარია, პრინციპული გამარჯვებით აღნიშნა. დუდა სანაძემ ახალ გუნდში პირველივე მატჩი სასტარტო ხუთეულში ითამაშა და თავის გუნდს დაძაბული ბრძოლა 67:65 მოაგებინა.
ფამაგუსტელთა მეტოქე აუტსაიდერი „ომონია“ გახლდათ. დუდამ სასტარტო ხუთეულში ითამაშა და მოედანზე 33:32 წუთი გაატარა. ქართველმა მსროლელმა 6-დან 6-ვე ორქულიანი ჩააგდო, 9-დან 4 სამიანი მიითვალა და 4 ცდიდან მეტოქის ფარში 3 საჯარიმო მოათავსა. 27 ქულასთან ერთად დუდამ 2 მოხსნა, 2 პასი და 2 ჩაჭრა მიითვალა.
ავტორი
