მიმდინარე წლის 2 სექტემბერს, მსოფლიოს მომავალი პირველობის შესარჩევ შეხვედრაში, ბათუმში, საქართველოს ნაკრები კოსოვოს უმასპინძლებს, 5 სექტემბერს ბადახოსში ესპანეთის ეროვნულ გუნდს დაუპირისპირდება, 8 სექტემბერს კი სტუმრად ამხანაგურად ბულგარეთს გაეჯიბრება.
სანაკრებო სიაში ესპანური “ვალენსიას” კარის დარაჯი გიორგი მამარდაშვილიც ირიცხება, მაგრამ საკითხავია, ასპარეზობის შესაძლებლობა მიეცემა თუ არა.
თავიდან დავიწყოთ. ორი დღის წინ გავრცელდა ცნობა, რომ პრემიერლიგის კლუბების საერთო გადაწყვეტილების თანახმად, ისინი ფეხბურთელებს სექტემბრის სანაკრებო შეკრებაზე არ გაუშვებენ იმ ქვეყნებში, რომლებიც დიდ ბრიტანეთს კორონავირუსის პანდემიის გამო წითელ სიაში ჰყავს შეყვანილი. როგორც ოფიციალურ განცხადებაშია აღნიშნული, კლუბებმა გადაწყვეტილება ერთხმად მიიღეს და მათ მხარს პრემიერლიგაც უჭერს. მთლიანობაში 19 კლუბის თითქმის 60 ფეხბურთელი ვერ შეძლებს სანაკრებო შეკრებაზე წასვლას.
ბრიტანეთის წითელ სიაში საქართველოც იმყოფება, მაგრამ ვინაიდან პრემიერლიგაში ქართველი ფეხბურთელი არ თამაშობს, კლუბების დაწესებული შეზღუდვა ბუნებრივია საქართველოს ვერ შეეხება.
მაგრამ ესპანეთში გიორგი მამარდაშვილი გვყავს… გუშინ გავრცელდა ცნობა, რომ “ლა ლიგის” ხელმძღვანელობა იმ კლუბებს, რომლებიც კორონავირუსის პანდემიის გამო მოახლოებულ სანაკრებო შეხვედრებზე მოთამაშეებს არ გაათავისუფლებენ, საყოველთაო მხარდაჭერას გამოუცხადებს.
უახლოეს დღეებში ესპანეთის ფეხბურთის ფედერაციის მაღალჩინოსნები კლუბების წარმომადგენლებს შეხვდებიან და ამ საკითხს დაწვრილებით განიხილავენ. იმედია პრობლემა “დრამატულ” სახეს არ მიიღებს და გიორგი მამარდაშვილსაც საქართველოს ეროვნული გუნდის კარში ვიხილავთ.
გუშინ ტოკიოში 2020 წლის პარაოლიმპიური თამაშები დაიწყო და საქართველოს სპორტულმა დელეგაციამ ვერცხლის მედალი მოიპოვა. პარამოფარიკავე ნინა თიბილაშვილი ფინალურ შეხვედრაში, ირმა ხეცურიანი კი _ ბრინჯაოსთვის დაპირისპირებაში დამარცხდა.
24 წლის თიბილაშვილმა, რომელიც მსოფლიო ჩემპიონია, ჯგუფურ ეტაპზე 2 შეხვედრაში გაიმარჯვა, ამის შემდეგ კი იტალიელ და ორ უკრაინელ მეტოქეს აჯობა და ფინალში ჩინელ ბიან ჟინგთან დამარცხდა. 35 წლის ხეცურიანმა ჯგუფური ეტაპი წაგებით დაიწყო, შემდეგ კი ნახევარფინალში გასვლა შეძლო, სადაც ჩინელ შუმეი ტანთან, ბრინჯაოს მედლისთვის კი მის თანამემამულე შაო ტონგსთან დამარცხდა.
ევროპის კონტინენტზე დიდი საფეხბურთო დეტექტიური თრილერი ვითარდება, რომლის მთავარ გმირებს, კილიან მბაპესა და კრიშტიანო რონალდოს, გუშინ რობერტ ლევანდოვსკიც დაემატა.
კილიან მბაპემ “პარი სენ-ჟერმენის” ხელმძღვანელობას გუნდში დარჩენაზე საბოლოო უარი სტკიცა. ამის შემდეგ სცენაზე მადრიდის “რეალი” ოფიციალურად გამოჩნდა და ფრანგულ გუნდს მბაპეს სანაცვლოდ 160 მილიონი ევრო შესთავაზა. “პსჟ”-ს არაბმა მეპატრონეებმა 200 მილიონი მოითხოვეს. ესპანელებმა საბოლოო პასუხისთვის ერთი დღე ითხოვეს, მაგრამ მოლაპარაკებას ისეთი პირი უჩანს, რომ უახლოეს დღეებში ეს ტრანსფერი აუცილებლად გაიჩარხება.
გუშინ “პარი სენ-ჟერმენმა” მბაპეს შემცვლელის ძიება წამოიწყო. გუნდის წარმომადგენლები “ევერტონში” მოასპარეზე ბრაზილიელი რიშარლისონისა და “იუვენტუსის” დატოვების მსურველი კრიშტიანო რონალდოს ნაცვლად… მიუნჰენის “ბაიერნის” თავდამსხმელ რობერტ ლევანდოვსკის დაუკავშირდნენ. ინფორმაცია მოულოდნელი აღმოჩნდა, რადგან ყველამ იცოდა, რომ მბაპეს წასვლის შემთხვევაში “პსჟ”-ში რიშარლისონი-რონალდოდან ერთ-ერთი უნდა ჩარიცხულიყო.
ლევანდოვსკის “ბაიერნის” დატოვება მომავალ წელს სურდა, მაგრამ მოვლენები ისეთი ელვის სისწრაფით ვითარდება, რომ არაა გამორიცხული, პარიზში გადაბარგება სულ მალე მოუწიოს.
და კრიშტიანუ რონალდო? პორტუგალიელი “მანჩესტერ სიტიში” გადასვლასთან ახლოსაა. მისი აგენტი ჟორჟე მენდეში უკვე დაუკავშირდა “მანჩესტერ სიტის”.
“იუვენტუსი” მზადაა პორტუგალიელს შეელიოს, მაგრამ რა თქმა უნდა, მუქთად არ გაუშვებს და 25-30 მილიონ ევროს ითხოვს, “სიტი” კი ფულის გადახდას არ აპირებს. არსებობს რონალდოს ფორვარდ გაბრიელ ჟეზუშში გაცვლის ვარიანტი, მაგრამ “სიტის” მწვრთნელ პეპ გვარდიოლას ბრაზილიელის გაშვება, ჯერჯერობით, არ სურს.
ამის მიუხედავად ფრანგული გამოცემა “ეკიპი” ამტკიცებს, რომ კრიშტიანო რონალდო უახლოეს დღეებში “მანჩესტერ სიტიში” პეპ გვარდიოლასთან გადავა. ამ ამბავს ეხმაურება იტალიელი ჟურნალისტი სიმონე როვერაც. ის ამტკიცებს, რომ რონალდომ “მანჩესტერ სიტიში” ტრანსფერი უკვე განიხილა “იუვენტუსის” ფეხბურთელებთან და თვით რამდენიმე მომავალ პოტენციურ თანაგუნდელთანაც კი.
ამდენ სატრანსფერო სჯა-ბაასში გუშინ რონალდომ ვარჯიშზე მცირე ტრავმა მიიღო. 36 წლის შემტევის მდგომარეობა მომდევნო დღეებში შეფასდება, ამ ეტაპზე უცნობია დაზიანების ხარისხი. რონალდუმ ტრავმა ალექს სანდროსთან კონტაქტის შედეგად მიიღო.
[sexy_author_bio]
