გუშინ, კატარის მუნდიალის მორიგი სათამაშო დღის პირველ შეხვედრაში ირანის ეროვნულმა გუნდმა გარეთ ბეილის უელსი დაამარცხა და მერვედფინალურ ეტაპზე გასვლის კარგი შესაძლებლობა გაიჩინა.
მასპინძელმა კატარმა სენეგალთან უშანსოდ წააგო – 1:3 და კიდევ ერთხელ დაამტკიცა რომ მიმდინარე მსოფლიოს პირველობის უსუსტესი მონაწილეა.
ნიდერლანდებისა და ეკვადორის ეროვნული გუნდები ერთმანეთს დაუზავდნენ – 1:1.
ინგლისის ნაკრებმა ზედიზედ მეორე შეხვედრის მოგება ვერ მოახერხა და აშშ–ის ეროვნულ გუნდთან ქულები გაიყო – 0:0.
გუშინ, კატარის მსოფლიო პირველობაზე უმთავრესი სალაპარაკო თემა ორი ცნობილი მოთამაშის ტრავმა გახლდათ.
გამოცემა „Marca“–ს ინფორმაციით, არგენტინის ნაკრების კაპიტანმა ლეო მესიმ საერთო ჯგუფთან ერთად ვარჯიში გამოტოვა. 35 წლის ფეხბურთელს მარცხენა ფეხზე კუნთის პრობლემა აქვს და ამის გამო მხოლოდ ინდივიდუალურად დაიტვირთა. სავარაუდოდ, ტრავმა სერიოზული არ არის და ლიონელ მესი მექსიკასთან შეხვედრაში მონაწილეობის მიღებას შეძლებს.
სერბეთთან მოგებულ მატჩში ბრაზილიის ნაკრების თავდამსხმელი ნეიმარი ცხრაჯერ წააქციეს და მე-80 წუთზე ნიკოლა მილენკოვიჩის ვარდნის შემდეგ ტრავმირებულს მოედნის დატოვება მოუწია.
სათადარიგოთა სკამზე მას გასიებულ კოჭ–წვივზე ყინული დაადეს, სახეზე მაისური აიფარა და სავარაუდოდ, ტიროდა.
„კოჭ–წვივზე მყესები აქვს დაჭიმული. ჯერ სრული გამოკვლევისთვის დრო არ გვქონდა, მაგრამ ფეხი უკვე ცოტა შესიებული აქვს. ერთი დღე მოცდა და რეაქციის ნახვაა საჭირო. მოთმინება და სიმშვიდეა აუცილებელი. ადრეა იმაზე საუბარი, შეძლებს თუ არა ტურნირზე თამაშს. ვნახოთ, რამდენიმე საათის შემდეგ როგორ მდგომარეობაში ექნება ფეხი“, – განაცხადა ბრაზილიის ნაკრების ექიმმა როდრიგო ლასმარმა.
ამ განცხადებიდან გავიდა ერთი დღე და ბრაზილიის ნაკრების მთავარმა მწვრთნელმა ტიტემ განაცხადა, რომ ნეიმარი მსოფლიოს ჩემპიონატზე თამაშს გააგრძელებს.
„არ ინერვიულოთ, შეგიძლიათ დარწმუნებული იყოთ, რომ ნეიმარი მსოფლიოს ჩემპიონატზე ითამაშებს. ამაში აბსოლუტურად დარწმუნებული ვარ, ის თამაშს აპირებს. მან ტკივილით 10 წუთი ითამაშა, მაგრამ მოედანზე დარჩა, რადგან გუნდს სჭირდებოდა და ტკივილის ატანის უნარი აჩვენა, მისი საქციელით აღფრთოვანებული ვარ“, – თქვა ტიტემ ნეიმარის ტრავმაზე.
ტიტეს განცხადებიდან გადის რამდენიმე საათი და… გამოცემა „Marca“-ს ინფორმაციით, 2022 წლის მუნდიალზე სერბეთის ნაკრებთან მატჩისას მიღებული ტრავმის გამო ნეიმარი ბრაზილიის ეროვნულ გუნდს, მინიმუმ, ორ შეხვედრაში გამოაკლდება. ვარსკვლავი შვეიცარიასა და კამერუნთან ვერ ითამაშებს, ფლეი ოფში გასვლის შემთხვევაში, სავარაუდოდ, გუნდს დაუბრუნდება.
პორტუგალიის და განის ნაკრებთა დაპირისპირებაში, კრიშტიანუ რონალდუმ კარიერაში მორიგი რეკორდი მიითვალა და თან ისეთი, რომლის გაუმჯობესება კი არა, გამეორებაც ძალიან რთული იქნება – ის გახდა პირველი, რომელმაც მსოფლიოს ხუთ ჩემპიონატში გაიტანა გოლი!
ეს რონალდუს 118-ე გოლი იყო ეროვნულ გუნდში ჩატარებულ 192-ე მატჩში. 118 სანაკრებო გოლიდან რონალდუმ 98 ოფიციალურ თამაშებში შეაგდო და მხოლოდ 20 ამხანაგურებში.
37 წლის სუპერვარსკვლავმა რეკორდის დამყარებისა და მიმდინარე მუნდიალზე პირველი გამარჯვების შემდეგ კომენტარი გააკეთა:
„მშვენიერია მომენტია, ჩემთვის მეხუთე მსოფლიოს ჩემპიონატზე. მოვიგეთ, კარგად დავიწყეთ და ეს ძალიან მნიშვნელოვანი გამარჯვება იყო. ვიცით, რომ ამ ტურნირზე პირველი თამაშის მოგება ფუნდამენტურია. კიდევ ერთი რეკორდი დავამყარე, ერთადერთი მოთამაშე ვარ, რომელმაც ზედიზედ ხუთ მუნდიალზე გაიტანა, რაც ჩემთვის დიდი სიამაყის წყაროა. ძალიან ბედნიერი ვარ, რომ გუნდმა ძალიან კარგი თამაში აჩვენა. რთული მატჩი იყო, მაგრამ დამსახურებულად მოვიგეთ“, – აღნიშნა რონალდომ.
სრულიად საწინააღმდეგო მოსაზრება გააჩნდა განას ნაკრების მთავარ მწვრთნელს. ოტო ადო მსოფლიო ჩემპიონატზე პორტუგალიასთან წაგებული მატჩის შემდეგ განსაკუთრებულად განრისხებული გახლდათ:
„ცხადია, იმედგაცრუებული ვარ. პორტუგალია ბურთს ფლობდა, ვიცოდით, ეს ეხერხება, მაგრამ თავს კარგად ვიცავდით. მერე გაგვიტანეს და ყველაფერი შეიცვალა. ვფიქრობ, მსაჯმა პენალტის დანიშვნისას არასწორი გადაწყვეტილება მიიღო. ამის მერე ყველაფერი გართულდა – ეს ხომ მსოფლიო კლასის გუნდია. თუმცა ჩვენ მამაცნი და წარმატებულნი ვიყავით და ანგარიში თითქმის 3:3 გავხადეთ. მინდოდა არბიტრს გავსაუბრებოდი, მაგრამ მითხრეს, რომ ეს არ შეიძლება. გოლის გატანის შემდეგ ფეხბურთელს შემიძლია მხოლოდ მივულოცო. რონალდოს ზედიზედ მეხუთე ჩემპიონატზე გატანას ვულოცავ. მსაჯებმა განსაკუთრებული საჩუქარი გაუკეთეს“, – განაცხადა ოტო ადომ.
მუნდიალში მონაწილე გუნდების მთავარი მწვრთნელებიდან განსაკუთრებით შავ დღეში ირანელთა დამრიგებელი კარლოს კეირუშია, რომელსაც ჟურნალისტები ძირითადად პოლიტიკური ხასიათის კითხვებს უსვამენ.
კეირუში უელსის ნაკრებთან მატჩის წინ ჟურნალისტის შეკითხვამ გააღიზიანა, რომელიც პრესკონფერენციაზე მასთან ერთად მყოფ მეჰდი ტარემის დაუსვეს ირანში არსებულ ვითარებაზე.
პორტუგალიელმა სპეციალისტმა ჟურნალისტს ჰკითხა, რატომ არ უსვამს მსგავს შეკითხვებს გარეთ საუთგეიტს:
„რატომ არ სვამთ მსგავს შეკითხვებს სხვა ქვეყნებთანაც? რატომ არ ეკითხებით ინგლისის ნაკრების მთავარ მწვრთნელს რას ფიქრობს ჩრდილოეთ ირლანდიაზე? რატომ არ მიდიხართ შეერთებულ შტატებში და არ ეკითხებით მათ ავღანეთიდან ჯარების გაყვანის შესახებ?“, – თქვა კეირუშმა.
თავის მხრივ, მეჰდი ტარემის პასუხი ასეთი იყო: „არ მინდა პოლიტიკაზე საუბარი, ჩვენ აქ ფეხბურთის სათამაშოდ ვართ და მე ვერაფერს შევცვლი“, – აღნიშნა ირანის ნაკრების ფეხბურთელმა.
ამასობაში, საფრანგეთის ნაკრებს კიდევ ერთი ტრავმირებული მოთამაშე დაემატა. გამოცემა „L’Equipe“–ის ინფორმაციის თანახმად, კინგსლი კომანმა გუნდური ვარჯიში ნაადრევად დატოვა.
წყაროს მიხედვით, მიუნხენის „ბაიერნის“ შემტევმა გამახურებელი ვარჯიშები ბოლომდე დაასრულა, თუმცა შემდეგ ვარჯიშის გაგრძელება ვეღარ შეძლო. კომანს ბარძაყის კუნთის პრობლემა აქვს. ჯერჯერობით არა ცნობილი ითამაშებს თუ არა 26 წლის შემტევი ჯგუფური ეტაპის მეორე შეხვედრაში დანიის წინააღმდეგ.
დიდიე დეშამს სხვადასხვა დაზიანებების გამო უკვე ისედაც ბევრი ფეხბურთელი გამოაკლდა. ქარიმ ბენზემა, ნ’გოლო კანტე, პრესნალ კიმპემბე, პოლ პოგბა, კრისტოფერ ნკუნკუ – ეს იმ ფეხბურთელების ჩამონათვალია, რომლებიც ფრანგებს მუნდიალის დაწყებამდე გამოაკლდათ. ავსტრალიასთან დაზიანება მიიღო ლუკას ერნანდესმაც.
უელსის ნაკრების ლიდერმა, გარეთ ბეილმა კი გუშინ თანამემამულე მასწავლებლებს მოუწოდა, რომ გაკვეთილის ჩატარების ნაცვლად ირანთან მატჩი ეყურებინათ. ერთ დროს ყველაზე ძვირადღირებულმა ფეხბურთელმა განაცხადა, რომ უელსის მუნდიალზე გამოსვლა ქვეყნისთვის მნიშვნელოვანია, რაც პატარა ისტორიულ გაკვეთილად შეიძლება ჩაითვალოს.
„თუ მე მასწავლებლების ადგილზე ვიქნებოდი, მაშინ ბავშვებს სკოლაში ჩვენი ნაკრების თამაშის ყურების შესაძლებლობას მივცემდი. ვიმედოვნებ, რომ სკოლაში ასე მოიქცევიან. გამოდიოდე მუნდიალზე ეს ისტორიული მომენტია.
ჩემი მეგობრები, რომლებსაც შვილები ყავთ სურთ, რომ თავიანთმა შვილებმა ფეხბურთს უყურონ, ამიტომაც ამ დღეს ბავშვები სკოლაში არ მიყავთ. ვფიქრობ, მასწავლებლებმაც უდა დაგვიჭირონ მხარი და მისცენ ბავშვებს პატარა ისტორიული გაკვეთილი ფეხბურთის სახით” – განაცხადა ბეილმა.
საინტერესოა ირანთან შეხვედრის შემდეგ ამ განცხადება – მიმართვაზე გარეტ ბეილი რა კომენტარს გააკეთებდა.
ავტორი
