გურიასა და აჭარაში დიდთოვლობამ პრობლემები შექმნა. სოფლები გარე სამყაროსაა მოწყვეტილი. მოსახლეობის ნაწილს არც საკვები აქვს მომარაგებული, არც მათი ჯანმრთელობისთვის საჭირო მედიკამენტები და ვერც გადაადგილებას ახერხებს.
გურიაში კი სახლის სახურავის გაწმენდითი სამუშაოების დროს კაცი დაიღუპა.
როდემდე ითოვებს დასავლეთ საქართველოში- ამის შესახებ “გურია ნიუსი” გარემოს ეროვნული სააგენტოს მოკლევადიანი ამინდის პროგნოზის ბიუროს ხელმძღვანელ დოდო გვაზავას ესაუბრა.
“თოვა შენარჩუნდება კვლავ მთიან და მაღალმთიან აჭარაში და ასევე გურიის რეგიონში. ითოვებს მთელ დასავლეთ საქართველოში, მაგრამ მნიშვნელოვანი და ინტენსიური თოვა ამ რეგიონებში იქნება ძირითადად. დროგამოშვებით გაძლიერდება დასავლეთის მიმართულების ქარი. 27 თებერვალს, დღის განმავლობაში, თოვის ინტენსივობა შესუსტდება, 28 თებერვალს ღამით კი ყინვა გაძლიერდება”,_ განუცხადა “გურია ნიუსს” დოდო გვაზავამ.
