ევროპული საქართველოს წევრი, ირაკლი აბესაძე, იუსტიციის უმაღლესი საბჭოს თავჯდომარედ, უზენაესი სასამართლოს თავჯდომარის, ნინო ქადაგიძის არჩევას ეხმაურება.
აბესაძის თქმით, სასამართლოს სჭირდება ფუნდამენტური ცვლილებები, რათა ის გახდეს პოლიტიკურად მიუკერძოებელი და სანდო, ხოლო იმ ფონზე, როდესაც თავჯდომარის არჩევა მოხდა პოლიტიკური გავლენების ქვეშ, ეს ვერ დაუბრუნებს სისტემას სანდოობას.
„იუსტიციის უმაღლესი საბჭო და მასში მყოფი სასამართლო კლანის წარმომადგენლები ერთ-ერთ მთვარ შემაფერხებელ ფაქტორად იქცა სასამართლო სისტემის განვითარების და რეალური პოლიტიკური დამოუკიდებლობის მოპოვების აღმასრულებელი ხელისუფლებისაგან და პირიქით, სწორედ ის სასამართლო კლანი, რომელიც იუსტიციის საბჭოშია თავმოყრილი იქცა პოლიტიკურ პარტნიორად ქართული ოცნების.
ამას ადასტურებს ის პოლიტიკურად მიკერძოებული პროცესი, რომელიც წარმართა იუსტიციის უმაღლესმა საბჭომ უზენაესი სასამართლოს მოსამართლეობის კანდიდატების შერჩევისას, რომელიც ასეთად შეფასდა არამარტო ქვეყნის შიგნით, არამედ ჩვენი საერთაშორისო პარტნიორების და ობიექტური დამკვირვებლების მხრიდანაც.
რათქმაუნდა, იუსტიციის საბჭოში თავჯდომარედ უზენაესი სასამართლოს თავჯდომარის არჩევა არის მხოლოდ ფორმალური პროცედურა და არაფერი ამას სასამართლო სისტემის გაჯანსაღებასთან არ აქვს.
რეალურად გვჭირდება ფუნდამენტური რეფორმები სასამართლოში, გვჭირდება გარდამტეხი ცვლილებები სასამართლო სისტემაში, რაც უნდა მოიტანოს არჩევნებმა და დაიწყოს ევროპული საქართველოს და სხვა ოპოზიციური პარტიების შეთანხმებული გეგმის განხორციელება, ნაფიც მსაჯულთა ინსტიტუტის გაფართოებასთან მიმართებით, სასამართლოების უფრო მეტ დამოუკიდებლობასთან და ინდივიდუალური მოსამართლის უფრო მეტი დამოუკიდებლობის გაფართოებასთან თუ უცხოელი მოსამართლეების მოწვევასთან დაკაშვირბით. სწორედ ეს მოიტანს იმ გარდამტეხ ცვლილებებს, რომლებმაც საზოგადოების ნდობა უნდა დაუბრონოს სასამართლო სისტემას.“ – განაცხადა აბესაძემ.
