პოლიტიკის ექსპერტი გია ხუხაშვილი „ქართული ოცნება – დემოკრატიული საქართველოს“ თავმჯდომარის, ბიძინა ივანიშვილის ღია წერილს “გურია ნიუსთან“ აფასებს. მისი თქმით, ივანიშვილის წერილი „ქართული ოცნების“ პოლიტიკურ ამოცანებთან წინააღმდეგობაში მოდის. ამასთან, ხუხაშვილი ივანიშვილს ისტორიის გადაწერის მცდელობაში ადანაშაულებს.
„ბიძინა ივანიშვილის ღია წერილში მნიშვნელოვანი არაფერი იკითხება. ივანიშვილი, რომელიც თვლის, რომ ქვეყანაში ყველაფერი კარგი მისი დამსახურებით გაკეთდა, წერილში წინააღმდეგობრივ ლოგიკას ავითარებს. კერძოდ, გარკვეულ გაერთიანებაზე და წარსულის დავიწყებაზე საუბრობს, მაშინ, როცა მმართველ პარტია მთავარ პოლიტიკურ იარაღად სისხლიან ცხრა წელს იყენებს.
აღნიშნული ფილმი ბევრჯერ გვაქვს ნანახი. ბიძინა ივანიშვილის მხრიდან ისტორიის გადაწერისა და საკუთარ გემოვნებაზე მორგების მცდელობა იკვეთება, რაც არ გამოუვა. ის რომელ გაერთიანებაზე საუბრობს, პარტია თავზე ჩამოეშალა. „ქართულ ოცნებაში“ ერთმანეთს ლამის ყელი გამოღადრონ. ამ ფონზე, ივანიშვილის მხრიდან გაერთიანებაზე ლაპარაკი არაადეკვატურია“,_ აღნიშნა ხუხაშვილმა.
