ოქტომბრის დასაწყისია, მზიანი ამინდები და მავნებელ აზიური ფაროსანას საოცარი იერიში საცხოვრებელი სახლებისკენ იმით გამოიხატება, რომ სახლების სამზეურ კედლებზე, ფანჯრებიდან ოთახისკენ, სადგომებში, ნალიებსა თუ ბეღლებისკენ მშვიდი ბზუილით იწევენ და რამდენსაც გაანადგურებ, იმდენივე მალე მოფრინდება და დაიბუდებს.
ახლახან სურსათის უვნებლობისა და სოფლის მეურნეობის სამინისტროს გურიის რეგიონული სამმართველოს მიერ, მოსახლეობას ფაროსანას საწინააღმდეგო პრეპარატი და მოსაზიდი ფირფიტები დაურიგდა. ამ უკანასკნელის მუყაოს ყუთზე მიკვრა და სპეციალური მოსაზიდი საჭერის მომზადება ამ ფორმით, საკმაოდ შედეგიანი რომ არის, უკვე არაერთმა გამოსცადა. უმეტესობამ კი სასაცილოდ მიიჩნია ეს მექანიკური ხერხი. თუმცა, რაოდენ გასაკვირიც უნდა იყოს, ასეთი წესით მომზადებული საჭერის ირგვლივ და ახლომახლო პერიმეტრზე უამრავმა მავნებელმა მოიყარა თავი. როგორც მობილური ჯგუფის წევრები აღნიშნავდნენ, ასი მეტრის რადიუსში, მუყაოს ყუთზე დამაგრებულ წრეწირის ფორმის ფირფიტას შესწევს უნარი, უამრავი მავნებელი მოიზიდოს.
„გურია ნიუსი“ დაინტერესდა და არაერთი მოქალქე გამოკითხა, დაამზადა თუ არა აღნიშნული საჭერი და როგორი შედეგი მიიღო და დარწმუნდა თუ არა, რა მნიშვნელოვანი როლის შესრულება შეუძლია მავნებლის გასანადგურებლად.
საკმაოდ გასაკვირი პასუხების ჩამონათვალი: „რას იტყუებიან? საერთოდ არ შეფრინდა ამ ყუთში. „დაჟე“ დავიჭირე, ახლოს მივიყვანე და ლამის ვაყნოსვინე, მაგრამ ხელი გავუშვი თუ არა, გაფრინდა“, „არაფერს ეგ ყუთი არ შვება, ზღაპარია“; „რატო ჩამოვკიდო, ჩამოკიდა ვინმემ?“ „ვერტალიოტი უნდა მაგას. მეტი საშველი არ იქნება; არ ჩამომიკიდია. ჩამოიკიდონ კისერზე და იარონ, იქნებ, უფრო შეფრინდეს, მთავრობის ხალხს რო დეინახავს ის ოხერი“; „მასე არ შევა, წურბელა კი არაა, რო მიეფსკვნას“; „რის წამალი და რა ყუთი? სულ არ ვიცი, მეიტანა ვინმემ? ჩემს ჭიშკრამდე ვერ მოაღწია?“, „შენ თუ ხარ საქმის კურსში, გააკეთე ჩემთანაც, „კარდონის“ ყუთის მეტს რას მოგცემ“; „ჩამოვხვეტე ცოცხით და ძაღლმა შეჭამა, დამიჯერე, ერთი არ დატოვა“…
რაც შეეხება მუყაოს ყუთისგან გაკეთებული საჭერი, რომელზეც მოსაზიდი ფირფიტაა მიმაგრებული, ისევ ფერმერთა მოფიქრებული მექანიკური ხერხია. მუყაოს ყუთში ფიჭისებურად ჩალაგებულია, ასევე, მუყაოს ფირფიტები. ორ მხარეს უკეთდება მრგვალი ფორმის მოზრდილი ნახვრეტი. შეკრულია წებოვანი ლენტით და კუთხეში მიმაგრებული აქვს სპეციალური ნივთიერებით გაჟღენთილი ფირფიტა. გამოცდილებამ დაგვანახა, რომ ასეთი ყუთის ღია აივანში ჩამოკიდების შემდეგ, ირგვლივ, კედლებსა და აივნის თუ ბოძებს უამრავი მავნებელი შეაფრინდა. ყუთში, როგორც ფუტკარი სკაში (როგორ ზოგიერთს წარმოუდგენია) _ ასე არ შედის, თუმცა, ირგვლივ პერიმეტრზე გამოჩნდა, რომ მეთოდი გამართლებულია.
ახლა გურიის სოფლებში მავნებელი ისეთი რაოდენობით გამოჩნდა, ბევრი არ მოელოდა. მით უფრო, სინოპტიკოსთა ცნობით, ოქტომბერიც საკმაოდ თბილი და უნალექო გველოდება, რაც და ფაროსანასთვის მისწრებაა, კვლავ სახლებისკენ გამოიწიოს. ლოდინის დრო არ არის.
„მოიზიდე და გაანადგურე“ ფერმერთა გამოცდილებით გამართლებული მეთოდია. რაც შეეხება შეწამვლას, ბიფეტრინის ხსნარით არაერთმა ოჯახმა დაიწყო ნალიების, სხვენის სივრცის და სახლის აივნების შეწამვლა. ამბობენ, რომ სიფრთხილით მოეკიდებიან ამ პროცესს, თუმცა, მობილური ჯგუფის წევრები მოსახლეობას არ ურჩევდნენ საცხოვრებელი სახლის სივრცის აღნიშნული ქიმიური პრეპარატით შეწამვლას.
