ჯერ კიდევ გაურკვევლია, როდის დაიწყება ჩოხატაურის მუნიციპალიტეტის სოფელ ზემო სურების გზის რეაბილიტაცია. ერთ-ერთი მთიანი და მწვანე სოფელი გურიის რეგიონში არაერთი პრობლემის წინაშეა; პირველ რიგში, ეს არის მიგრაცია, უგზოობა.
წლებია, ამ სოფელში არაერთი კომპანია გეგმავდა ჰესების მშენებლობას და ახლა ეს საკითხი ისევ დადგა დღის წესრიგში. ამჯერად, 17 ივლისს „სურები 2 ჰესის“ სკოპინგის ანგარიშის განხილვა გაიმართა _ კომპანია „შპს „ენერჯი დეველოფმენტი “ სოფელში ერთი ჰესის მშენებლობას აპირებს.
როგორც ყოველთვის, ჰესის მშენებლობასთან დაკავშირებით, ახლაც სოფლის მოსახლეობა ორ ნაწილადაა გაყოფილი.
სოფლის მცხოვრებთა ერთი ნაწილი თვლის, რომ სანამ გზა არ გაკეთდება, ჰესის მშენებლობას წინააღმდეგობა უნდა გაუწიონ.
„გურია ნიუსი“ შეეცაადა გაერკვია, რა ხდება ამ საკითხთან დაკავშირებით. თუ როდის გეგმავს ხელისუფლება უგზოობის პრობლემის მოგვარებას, ზუსტი პასუხი ჩოხატაურის მუნიციპალიტეტის მერის, დავით შარაშიძისგან ვერ მივიღეთ. ის სურებში სწორედ სკოპინგის ანგარიშის განხილვისას ვნახეთ. მისი თქმით, ეს პრობლემა მისთვის ნაცნობია, თუმცა, სხვა უფრო პრიორიტეტულ პროექტებზე მუშაობდნენ.
დავით შარაშიძის თქმით, გზის რეაბილიტაციის საკითხზე, ოთხის წლის განმავლობაში არაერთხელ ჰქონდა მოსახლეობასთან კომუნიკაცია.
_ რატომ ვერ მოხერხდა ამ პრობლემის მოგვარება?
_ მოგეხსენებათ, რომ ძალიან ბევრი ინფრასტრუქტული პროექტი განვახორციელეთ და ძალიან დიდი მასშტაბით. ჩვენ გვაქვს პრიორიტეტები, ჩვენი პრიორიტეტები და ზუსტად ჩვენი შეპირება იყო სურებელებისთვის, რომ გზის რეაბილიტაციის სამუშაოების რაღაც ნაწილს დავიწყებთ წელს.
_ კონკრეტულად როდის დაიწყება ეს პირველი ნაწილი?
_ როდესაც პროექტზე დავასრულებთ მუშაობას, ამის შემდეგ უფრო ზუსტად გვეცოდინება ინფორმაცია. ჩვენ აქტიურ კავშირზე ვართ რეგიონულ სამინისტროსთან და შესაბამის ინფორმაციას მოგეწოდებათ ყველას.
_ დღეს „სურები 2 ჰესის“ სკოპინგის ანგარიშის განხილვა მიმდინარეობს. თქვენი აზრით, უნდა აშენდეს თუ არა ჰესი სოფელ ზემო სურებში?
_ ჩვენ გაქვს ასეთი მიდგომა: ხელისუფლება ორიენტირებულია საზოგადოების აზრზე და როგორც საზოგადოება ფიქრობს, შესაბამისად, ჩვენ ვიქნებით მათ გვერდით.
შეხვედრაზე სკოპინგის განხილვისას, მოსახლეობის მხრიდან არაერთხელ გაჟღერდა მოთხოვნა, რომ სოფელს აუცილებლად სჭირდება გზა და ინფრასტრუქტურული პროექტების განხორციელება. შეხვედრაზე კომპანიის მხრიდანაც იყო სიტყვიერი დაპირებები, რომ ისინი აუცილებლად მოაგვარებენ სხვადასხვა პრობლემას, თუმცა, დაპირებას კონკრეტიკა, ვადები, ფინანსური რესურსიც მოცულობა აკლდა.
როგორც შეხვედრის ერთ-ერთმა მონაწილემ თქვა, ჯერ გზა უნდა აშენდეს, რადგან გზა სოფლისთვის სასიცოცხლოდ მნიშვნელოვანია.
სოფლისთვის ამ საკითხის მოგვარება ნამდვილად უნდა იყოს ხელისუფლების ნომერ პირველი საზრუნავი. წლებია აღნიშნული საკითხის მოგვარებას ითხოვს მოსახლეობა და ჯერჯერობით მხოლოდ ის გავიგეთ, რომ წელს იგეგმება გზის რაღაც ნაწილის რეაბილიტაცია. როგორც ჩოხატაურის მუნიციპალიტეტის მერმა გვითხრა დეტალები ცოტა მოგვიანებით გახდება ცნობილი.
ავტორი
