ქალაქ ოზურგეთში, ე.წ. ცენტრალური უნივერმაღის მიმდებარე ტერიტორიაზე, კომერციული ჯიხურები ჯერ არ დაუდგამთ. აღნიშნულთან დაკავშირებით საზოგადოებრივი ინტერესი მაღალია. ოზურგეთელების ვერსიით, ქალაქში მიმდინარე ნებისმიერი მშენებლობის უკან ქალაქ ოზურგეთის მერი ბეგლარ სიორიძე დგას, თუმცა, როგორც “გურია ნიუსმა“ გაარკვია, ოფიციალური დოკუმენტების მიხედვით, კონკრეტული ფაქტი ეხება სხვა, მაღალი თანამდებობის პირს. 20-წლიანი იჯარით გაცემული მიწის ნაკვეთი, რომელზეც ჯიხურები უნდა დაიდგას, ეკუთვნის ვინმე გიორგი მახარაძეს, რომელიც ქალაქ ოზურგეთის მუნიციპალიტეტის მერის მეგობრის და ასევე, ვიცემერის ალეკო ბურჭულაძის მეზობლის ბიჭკა ანთაძის ცოლისძმაა. ეს უკანასკნელი კი მერთან დაახლოებული პირია. ხოლო შპს “ტრანსუნივერსალის“ დირექტორი ლია ნიკოლაიშვილი, რომელიც დაინტერსებულ პირად არის წარდგენილი ოფიციალურ დოკუმენტებში, არის ვიცემერის ალეკო ბურჭულაძის ოჯახის ძველი კომპანიის ბუღალტერი.
ქალაქ ოზურგეთის მუნიციპალიტეტის საკრებულოს 2016 წლის 20 აპრილის #40 განკარგულებაში აღნიშნულია: “თანხმობა მიეცეს, ქალაქ ოზურგეთის მუნიციპალიტეტის მერს, სსიპ თვითმმართველი ქალაქი -ქალაქ ოზურგეტის მუნიციპალიტეტის საკუთრებაში არსენული გამსახურდიას მოედნის მიმდებარედ (პარკში) მდებარე 7586 კვ.მ. არასასოფლო-სამეურნეო დანიშნულების მიწის ნაკვეთიდან 25 კვ.მ. მიწის ნაკვეთს და ქალაქ ოზურგეთში გურიის ქუცაზე მდებარე 2066 კვ.მ. არასასოფლო-სამეურნეო დანისნულების მიწის ნაკვეთიდან 26 კვ.მ. მიწის ნაკვეთის, სარგებლობის უფლებთ, სასყიდლიანი აღნაგობის სახით 30 (ოცდაათი) წლის ვადით გაცემის თაობაზე, აღნისნულ ადგილზე სავაჭრო ჯიხურის აშენების მიზნით“ დაინტერსებული პირი: შპს “ტრანსუნივერსალი“, დირექტორი ლაი ნიკოლაიშვილი. საკადასტრო აღწერაზე უფლებამოსილი პირი _ თენგიზ ლომაძე.
ქალაქ ოზურგეთის მუნიციპალიტეტის პრესსამსახურის მიერ მოწოდებული ინფორმაციის თანახმად “აღნიშნული ტერიტორიის მოიჯარე გახლავთ გიორგი მახარაძე: “აღნიშნული ტერიტორიის მოიჯარე გახლავთ გიორგი მახარაძე. კომერციული დანიშნულების ჯიხურს, რომელიც ხსენებულ ადგილას ორიოდე კვირის უკან დაიდგა, ქალაქ ოზურგეთის მერიის მიერ გაცემული ნებართვა არ ითვალისწინებდა. ქალაქის მერიამ ნებართვა გასცა კომერციული დანიშნულების, შემინულ, ალუკობონდით მოპირკეთებულ მსუბუქი კონსტრუქციის ნაგებობაზე. შესაბამისად, მერიის ზედამხედველობის სამსახურის მითითების შემდეგ მეპატრონემ ჯიხური აიღო და ამჟამად ამ ტერიტორიაზე უკვე ნებართვის შესაბამისი მსუბუქი კონსტრუქციის ნაგებობის მშენებლობა მიმდინარეობს.“
“გურია ნიუსი“ შეეცადა კომენტარები მოეპოვებინა აღნიშნული პიროვნებებიდან: ბიჭკა ანთაძე ადასტურებს ინფორმაციას, რომ იჯარა მისი ცოლისძმის სახელზეა გაცემული, ასევე, არ უარყოფს ბეგლარ სიორიძესთან მეგობრობას და ასევე ამბობს, რომ ვიცემერის ალეკო ბურჭულაძის მეზობელია, თუმცა, ჯიხურების დადგამასთან დაკავშირებულ რაიმე წილს და გარიგებას აღნიშნულ პირებთან გამორიცხავს.
“მე რა შუაში ვარ, ეგ არის გიორგი მახარაძის სახელზე, ალეკო ბურჭულაძე კი არის ჩემი მეზობელი და ბეგი ჩემი მეგობარი, გიორგი მახარაძე ჩემი ცოლისძმაა, რეალურადაც არის მისი, ჩემი მეზობლობა და მეგობრობა არაფერ შუაშია. საკრებულოზეა გატანილი, მე არანაირი წილს არ ვფლობ და არც რაიმე გარიგებაში მაქვს მონაწილეობა მიღებული“, _ ამბობს ანთაძე.
“გურია ნიუსის“ კითხვაზე, რომელიც გიორგი მახარაძეს დავუსვით, თუ რა დამსახურებსითვის მიიღო მან 20 წლიანი იჯარით აღნიშნული მიწის ნაკვეთი, მახარაძე გვპასუხობს” _ რა დამსახურებისთვის? _ არ ვიცი, წარმოდგენილი მქონდა განცხადებები და დამიმტკიცეს“.
რაც შეეხება ვიცემერს ალეკო ბურჭულაძეს ის “გურია ნიუსთან“ ადასტურებს ინფორმაციას, რომ აღნიშნული ფაქტზე დანტერესებული პირი შპს “ტრანსუნივერსალია“, მისი დირექტორი ლია ნიკოლაიშვილი მასთან წლების წინ მუშაობდა: “რა უნდა გითხრათ, ჩემი ინტერესი მაქ არის ნული, რის საფუძველზე ამბობენ, რომ ჩემია, კი ქალბატონი ლია, 2007 წელს იყო ჩემი კომპანიის ბუღალტერი, წლებია ვმეგობრობთ“, _ ამბობს ბურჭულაძე და განმარტავს: “ერთი რამ ვიცი, რაც კი არის გაცემული, მშენებლობა მიმდინარეობს თუ ჯიხური უნდა დაიდგას ყველა არის კანონის შესაბამისად, ამას ლამაზი სიტყვების გამო კი არ ვამბობ, მართლაც ასეა. ადამიანებს აქვთ უფლება, თქვან რასაც ფიქრობენ, მე ვერ შევუზღუდავ მათ ამ უფლებას“.
როგორც მოქალაქეები ამბობენ, თითოეული ჯიხური თვეში 800 ლარად უნდა გაქირავდეს.
