აშშ-ის პრეზიდენტმა, ჯო ბაიდენმა განაცხადებით, „ჩრდილოეთის ნაკადი 2“-ის მშენებლობა 99%-ით არის დასრულებული და მისი გახორციელების შეჩერება შეუძლებელი იყო. ამის შესახებ ინფორმაციას CNN წერს.
ბაიდენის თქმით, თუ რუსეთი უკრაინას და სხვა ქვეყნებს ზიანს მიაყენებს, გერმანიის ხელისუფლება ამას უპასუხებს.
„ჩრდილოეთის ნაკადი 2“ 99%-ით არის დასრულებული. მოსაზრება, რომ შეიძლებოდა რამის თქმა ან გაკეთება მისი შეჩერების მიზნით, შეუძლებელია. მე ძალიან ნაყოფიერი დისკუსია მქონდა ანგელა მერკელთან. გერმანიის მთავრობა ვალდებულებების საკითხზე მუშაობს, რაც იმას ითვალისწინებს, რომ თუ რუსეთი უკრაინას და სხვა ქვეყნებს ზიანს მიაყენებს, გერმანიის ხელისუფლება ამას უპასუხებს.
იმისთვის, რომ რუსეთი არ გამოიყენოს მილსადენი ენერგომომარაგებაზე ევროპული დამოკიდებულების გასაზრდელად, გერმანია დათანხმდა მთელი რიგი ზომების გატარებას, რომლებიც მიზნად ისახავდა ევროპის ენერგეტიკული უსაფრთხოების, უკრაინისა და ევროკავშირისა და ნატოს ქვეყნების რისკების შემცირებას. წარსულში რუსეთმა შეწყვიტა ენერგიის მიწოდება სხვა ქვეყნებისთვის, მათ შორის უკრაინისთვის.“ _ განაცხადა აშშ-ის პრეზიდენტმა.
როგორც CNN წერს, აშშ-მა და გერმანიამ „ჩრდილოეთის ნაკადი 2“-ის პროექტზე შეთანხმებას მიაღწიეს. შეთანხმების თანახმად, გერმანიამ ვალდებულება აიღო, ზომები მიიღოს იმ შემთხვევაში, თუ რუსეთი ენერგომატარებლის უკრაინის წინააღმდეგ გამოყენებას შეეცდება ან თუ უკრაინის მიმართ აგრესიულ ქმედებას ჩაიდენს. აღნიშნული მოიცავს გერმანიის მიერ ზომების გატარებას როგორც ეროვნულ, ასევე ევროკავშირის დონეზე, მათ შორის სანქციების დაწესებას.
ცნობისთვის, 8 ივნისს აშშ-ის სახელმწიფო მდივანმა, ენტონი ბლინკენმა განაცხადა, რომ „ჩრდილოეთის ნაკადი-2“-ის მშენებლობის დასრულება მომხდარი ფაქტია.
20 მაისს აშშ-ის სახელმწიფო მდივანმა, ენტონი ბლინკენმა განაცხადა, რომ „ჩრდილოეთის ნაკადი-2“-ის ოპერატორისა (Nord Stream 2 AG) და მისი აღმასრულებელი დირექტორისთვის, მატიას ვარნიგისთვის სანქციების გაუქმება აშშ-ის ეროვნულ ინტერესებს პასუხობს.
„რესპუბლიკელი“ სენატორები „ჩრდილოეთის ნაკადი 2“-ის წინააღმდეგ სანქციების აღდგენას ითხოვენ.
ავტორი: მერაბ ცაავა
