გარემოსა და ბუნებრივი რესურსების დაცვის სამინისტროში „ჯორჯიან მანგანეზის“ კრიზისიდან გამოყვანის გეგმის პრეზენტაცია გაურკვეველი ვადით გადაიდო.
უწყებაში აღნიშნულ საკითხზე პრესკონფერენცია დღეს 16:00 საათზე უნდა გამართულიყო, თუმცა, დაახლოებით 40-წუთიანი დაგვიანების შემდეგ ჟურნალისტებს განუცხადეს, რომ შეხვედრა დღეს არ შედგებოდა. უწყებაში მიზეზები არ განუმარტავთ.
აღსანიშნავია, რომ გარემოსა და ბუნებრივი რესურსების სამინისტრომ, როგორც ლიცენზიისა და ნებართვის გამცემმა ადმინისტრაციულმა ორგანომ, ერთი თვის წინ მიიღო გადაწყვეტილება შპს “ჯორჯიან მანგანეზში”, საქართველოს კანონმდებლობის სრული დაცვითა და სასამართლოს თანხმობით, სპეციალური მმართველი შეეყვანა.
როგორც უწყების მიერ 11 მაისს გავრცელებულ განცხადებაშია აღნიშნული, კომპანია, რომელიც წლებია ფლობს მანგანუმის მადნის მოპოვების ლიცენზიასა და ახორციელებს მანგანუმის გამდიდრებისა და გადამუშავების საქმიანობას, სახელმწიფოს მხრიდან არაერთი დაჯარიმებისა და ადგილზე მძიმე ეკოლოგიური მდგომარეობის გამოსწორების მიზნით გონივრული ვადების განსაზღვრისა, კვლავ აგრძელებდა საქმიანობას გარემოსდაცვითი კანონმდებლობის მძიმე დარღვევით, რაც საბოლოოდ დადასტურდა მიმდინარე თვეს განხორციელებული დათვალიერების შედეგად.
“გაირკვა, რომ მდგომარეობა როგორც მდინარის, ასევე ნიადაგის დაბინძურებისა და დეგრადაციის კუთხით არათუ გამოასწორა კომპანიამ, არამედ ბევრად დაამძიმა, რაც ადგილზე ფაქტობრივად ეკოლოგიური კატასტროფის მდგომარეობის ტოლფასს სიტუაციას ქმნის“, _ ნათქვამია უწყების მიერ გამოქვეყნებულ განცხადებაში.
ამ განცხადების შემდეგ, „ჯორჯიან მანგანეზმა“ საპასუხო განცხადება გაავრცელა, სადაც აღნიშნულია, რომ საქართველოს მთავრობამ სხვადასხვა მექანიზმების გამოყენებით, მიიღო უკანონო ზომები ამერიკული კომპანიის „ჯორჯიან ემერიქენ ელოიზის“ (GAA) წინააღმდეგ, რითაც ხელი შეუშალა მის შვილობილ კომპანია „ჯორჯიან მანგანეზს“ მანგანუმის მადნის მოპოვების და ფეროშენადნობის წარმოებაში. შედეგად კი, აშშ-ს ფოლადის მწარმოებლებს ნედლეულის მიწოდება შუფერხდათ.
კომპანიამ საქართველოს მთავრობა „არამართლზომიერ“ და „უკანონო ქმედებებში“ დაადანაშაულა და განმარტა, რომ „ჯორჯიან მანგანეზის“ მიმართ მიღებული გადაწყვეტილება, საქართველოს მთავრობის მიერ უცხოურიკომპანიის – განსაკუთრებით მსხვილი წარმოების მიმართ ქვეყანაში განხორციელებული აგრესიისა და უკანონოქმედების ერთ-ერთი უკანასკნელი მაგალითია“.
28 მაისს გამართულ სპეციალურ ბრიფინგზე კი, კომპანიის ახალმა მმართველმა განაცხადა, რომ პირველი, რასაც საწარმოში გააკეთებენ ეკოლოგიური სამსახურის აღდგენაა, რომელიც აქამდე არ არსებობდა.
ნიკოლოზ ჩიქოვანის თქმით, საწარმოში მდგომარეობა კატასტროფულია, ამიტომ ის აპირებს უცხოელი ექსპერტების მოწვევას გარემოს დაცვითი კუთხით მდგომარეობის გამოსასწორებლად.
“სამოქმედო გეგმაში იქნება იმ მოთხოვნების შესრულებასა და იმ პრობლემების გამოსწორებაზე საუბარი, რომელიც ჯორჯიან მანგანეზში არსებობს. კერძოდ, საცავის აშნება და მოწყობა, ახალი გადამამუშავებელი ფაბრიკის ჩამოტანა. ერთ-ერთი მნიშვნელოვანი საკითხი იყო ჭიათურაში ლაბორატორიის არქონა. გაუქმებული იყო ეკოლოგიური სამსახური,”_ განაცხადა ნიკოლოზ ჩიქოვანმა. სწორედ ამ გეგმის წარდგენა უნდა ყოფილიყო დღეს გარემოს დაცვის სამინისტროში, რომელიც, სავარაუდოდ, უახლოეს დღეებში გაიმართება.
