გამიჭირდება ეკატერინე ტიკარაძის გადადგომის მიზეზზე საუბარი, თუმცა, მის გადაწყვეტილებას პატივს ვცემ, – ამის შესახებ ჟურნალისტებს დედაქალაქის მერმა კახა კალაძემ განუცხადა.
„მინდა ეკას წარმატებები ვუსურვო. ის, რა თქმა უნდა, გუნდიდან არ მიდის. პარტიაში, პოლიტსაბჭოში გააგრძელებს მუშაობას. თუ ვინ იქნება მომავალი მინისტრი, დაველოდოთ და უახლოეს პერიოდში გადაწყდება. როცა იქნება ცხადი და ცნობილი ვინ იქნება კანდიდატურა, საზოგადოებას ეცნობება. მე არ ვიცოდი ამ გადაწყვეტილების შესახებ“, – აღნიშნა კახა კალაძემ.
მისივე თქმით, პრემიერსა და ჯანდაცვის მინისტრს შორის არანაირი დაპირისპირება არ ყოფილა.„არანაირი დაპირისპირება არ იყო, არავინ მოიხსენიებდა ერთმანეთს უწმაწური სიტყვებით, რომელ საუკუნეში ვართ, რა უწმაწური სიტყვებით მოხსენიებაზეა ლაპარაკი, შეიძლება გარკვეულ საკითხებზე იყო მსჯელობა, აზრთა სხვადასხვაობა, მე არ ვარ მთავრობის წარმომადგენელი, ამიტომ გამიჭირდება… მთავრობის ხელმძღვანელი თავისი კაბინეტის მინისტრებს სამუშაო ფორმატში რა თემებზე ესაუბრება, ეს რა თქმა უნდა, არც გენერალური მდივნის საქმე არ არის, მე ვარ ქალაქის მერი, მაქვს ჩემი საქმე და დღის წესრიგი“, – განაცხადა კალაძემ.
ეკატერინე ტიკარაძემ ჯანდაცვის მინისტრის თანამდებობა 9 დეკემბერს დატოვა.
