გუშინ, ყაზახურ სპორტულ მასმედიაში გავრცელდა ცნობა რომ ქართველმა ფეხბურთის სპეციალისტმა კახა ცხადაძემ კლუბი ”ყაირათის“ მთავარი მწვრთნელის თანამდედობა საკუთარი სურვილით დატოვა.
ორი დღის წინ ყაზახური გუნდი ევროპა ლიგის მეორე საკვალიფიკაციო სტადიაზე ალბანურ „შკენდერბუსთან“ ორი შეხვედრის ჯამში დამარცხდა. ალბანეთში განცდილი მარცხის შემდეგ ცხადაძემ „ყაირათის“ დატოვების გადაწყვეტილება მიიღო. ყაზახური კლუბის ახალი მთავარი მწვრთნელის ვინაობა უახლოეს დღეებში დასახელდება.
რამდენიმე თვის წინ საქართველოს ეროვნული გუნდისა და კლუბი „კრასნოდარის“ მოთამაშე თორნიკე ოქრიაშვილმა მძიმე ტრავმა მიიღო და ოთხი თვის განმავლობაში იძულებითი უქმობა მოუწია. გუშინ რუსულ სპორტულ მასმედიაში გავრცელდა ცნობა რომ ქართველი ფეხბურთელი ამჟამინდელ გუნდთან ერთად ვარჯიშს უკვე შეუდგა. „კრასნოდარის“ ექიმების ვერდიქტით ოქრიაშვილი მინდორს მომავალ თვეში ოფიციალურად დაუბრუნდება.
რამდენიმე დღის წინ ქართველი ფეხბურთელი გიორგი პაპუნაშვილი ესპანეთის სეგუნდა დივიზიონში მოასპარეზე „სარაგოსაში“ გადავიდა. გუშინ ახალ გუნდში ქართველის დებიუტი შედგა. „სარაგოსა“ ამხანაგურად სამოყვარულო „ბოლტანიას“ გაეჯიბრა და იმარჯვა – 13:0. გიორგი პაპუნაშვილმა ერთი გოლი გაიტანა და ოთხი საგოლე გადაცემაც მიითვალა.
ჯერჯერობით, კვლავ უგუნდოდაა საქართველოს ნაკრების კარის დარაჯი გიორგი მაკარიძე. მას ახალი სეზონიდან ესპანურ „დეპორტივოს“ ან ლისაბონის „ბენფიკას“ უწინასწარმეტყველებენ. მისმა ამჟამინდელმა გუნდმა „მორეირენსემ“ ვარჯიში უკვე დაიწყო, მაგრამ მაკარიძე კლუბის რიგებში ჯერ არ გამოცხადებულა. ერთი ვერსიით მას ზურგის ტკივილი აწუხებს, მეორე ვერსიით კი კვლავ ახალი გუნდის ძიებაშია. იმ შემთხვევაში თუ ახალ კლუბს ვერ მონახავს მაკარიძე იძულებული იქნება კვლავ „მორეირენშეს“ დაუბრუნდეს.
იაპონიაში მიმდინარე ნაგოიას ბაშოზე მე-13 დღის ორთაბრძოლები გაიმართა. აღმოსავლეთის მე-2 მაეგაშირა ტოჩინოშინმა (ლევან გორგაძე) სეკივაკე მიტაკეუმი დაამარცხა და დადებითი ბალანსი გაინაღდა. მას 8-5 ბალანსი აქვს.
სამწუხაროდ, მე-16 მაეგაშირა გაგამარუმ (თეიმურაზ ჯუღელი) ზედიზედ მეოთხე მარცხი განიცადა, მან არავაშისთან დათმო. გაგამარუს 3-10 ბალანსი აქვს.
