რუსეთის მიერ უკრაინაში კახოვკა ჰესის კაშხლის აფეთქებით გამოწვეული გრძელვადიანი საფრთხე და ზიანი ისეთივე დიდია, როგორც ბირთვული დაბინძურებისგან. ამის შესახებ ევროპარლამენტის წევრმა ვიოლა ფონ კრამონმა განაცხადა.
ევროპარლამენტის წევრის თქმით, კაშხლის აფეთქებით რუსებმა ომი ისტორიულად მაღალ დონეზე აიყვანეს.
მან გაიხსენა, რომ სეისმურმა სადგურმა დააფიქსირა აფეთქება შენობის შიგნით, ამიტომ ეს არ იყო გარე ძალის შედეგი, როგორც ამას რუსული პროპაგანდა ამტკიცებს.
მან ასევე მიუთითა, რომ რუსები მასიურად ანადგურებენ უკრაინის ტყეებს, ქიმიურ და სამრეწველო საწარმოებს და ნაღმავენ უდიდეს ტერიტორიას.
ევროპარლამენტარმა ხაზგასმით აღნიშნა, რომ უკრაინის რეკონსტრუქციის დროს, ქვეყნის ეკოლოგიური, ჰუმანიტარული და ეკონომიკური საჭიროებები უნდა იყოს გათვალისწინებული.
ცნობისთვის, რუსეთის შეიარაღებულმა ძალებმა კახოვკა ჰესი 6 ივნისის ღამეს ააფეთქეს.
გარემოსდამცველები ვარაუდობენ, რომ კახოვკას წყალსაცავის გადინებამ, რომელიც გამოწვეულია კაშხლის რღვევით, შესაძლოა გააძლიეროს სამხრეთ უკრაინის გაუდაბნოების (არიდიზაციის) ტენდენციები.
მინისტრთა კაბინეტი და გაერო ზარალის ოდენობას 11 მილიარდ დოლარზე მეტს აფასებენ, ხოლო ყველაზე დიდი პირდაპირი ზიანი მიადგა ენერგეტიკასა და საბინაო სექტორს.
