საპარლამენტო უმრავლესობის წევრი ლევან კობერიძე ზუგდიდის მე-6 საჯარო სკოლის დირექტორის, ია კერზაიას გარდაიცვალების ფაქტს სოციალური ქსელით ეხმაურება და ფეისბუქის საკუთარ გვერდზე ინტელექტკლუბის წევრი დეპუტატების განცხადებას ავრცელებს.
მისი თქმით, კერზაიას გარდაცვალების ფაქტზე, შესაბამისმა უწყებამ გამოძიება უნდა დაიწყოს, რადგან მისმა გარდაცვალებამ საზოგადოებაში კითხვები გააჩინა.
“ა.წ. 9 დეკემბერს მოხდა ძალზე სამწუხარო ფაქტი: ხანმოკლე ავადმყოფობის შემდეგ გარდაიცვალა ღვაწლმოსილი პედაგოგი ია კერზაია, რომელიც ბოლო 11 წელი ზუგდიდის მე-6 საჯარო სკოლის დირექტორად მუშაობდა. ვწუხვართ ახლობლებთან ერთად და გამძლეობას ვუსურვებთ ოჯახს.
ქალბატონი იას გარდაცვალებამ საზოგადოებაში გააჩინა შეკითხვები, რომლებზე პასუხის გაცემაც ჩვენთვის პრინციპულ აუცილებლობას წარმოადგენს.
სწორედ ამიტომ, მიგვაჩნია რომ უმოკლეს ვადებში (მაქსიმალური ვადა – 1 თვე), შესაბამისმა უწყებამ უნდა ჩაატაროს გამოძიება, რომელიც დაადგენს ჰქონდა თუ არა ადგილი ზეწოლის ფაქტებს და ასეთის დადგენის შემთხვევაში, დამნაშავეები მკაცრად უნდა დაისაჯონ. ამავე დროს, განათლების სამინისტროს ხელმძღვანელობამ მკაფიო პასუხი უნდა გასცეს შეკითხვას, თუ რატომ მოხდა მოქალაქის წერილის საფუძველზე ზუგდიდის #6 საჯარო სკოლის ინსპექტირება მაინცდამაინც საარჩევნო პერიოდში, სახელდობრ, პირველ და მეორე ტურებს შორის. ვთვლით, რომ სამინისტროს მიერ უკვე გამოქვეყნებული განცხადება არასაკმარისად პასუხობს ამ შეკითხვას.
პასუხგაუცემელი კითხვები ხელს უწყობს საზოგადოებაში ნიჰილიზმის განცდას და აჩენს უნდობლობას სახელმწიფოებრივი ინსტიტუტების მიმართ. ვიმედოვნებთ, რომ ჩვენი პოზიცია გაზიარებული იქნება საპარლამენტო უმრავლესობაში და მოყვება დროული რეაგირება შესაბამისი უწყებების მხრიდან.
გიორგი მოსიძე
გედევან ფოფხაძე
ირინა ფრუიძე
ლევან კობერიძე”, – წერს ლევან კობერიძე.
შეგახსენებთ, რომ ზუგდიდის მე-6 საჯარო სკოლის დირექტორი, ია კერზაია ინსულტის დიაგნოზით, საავადმყოფოში მძიმე მდგომარეობაში იმყოფებოდა და მკურნალობას გადიოდა, თუმცა ექიმებმა მისი გადარჩენა ვერ შეძლეს.
