ოზურგეთის საკრებულოში გრძელდება ანგარიშის მოსმენა _ საკრებულოს წევრები ანგარიშს აბარებენ ამომრჩევლებს, გასულ წელს ჩატარებული მუშაობის შესახებ. საკრებულოს დარბაზიდან ანგარიშის პირდაპირი ტრალნსლაცია ხდება.
დღეს ანგარიში დამოუკიდებელმა დეპუტატმა, ფრაქცია: „ოზურგეთის მომავლისთვის“ თავმჯდომარემ, ლევან მგელაძემ წარადგინა.
მან ისაუბრა საანგარიშო პერიოდში გაწეულ ქმედებებზე, რომ აქტიურად ახერხებდა მუშაობას სოციალურად დაუცველი, მარტოხელა ადამიანების აღრიცხვასა და მათი პრობლემების მოგვარებაში. აღნიშნა, რომ მუშაობაში ხელი შეუშალა პანდემიის ფაქტორმა. მან განსაკუთრებით გაუსვა ხაზი ეკოლოგიური პრობლემების მოგვარების საკითხს, რომ სხვადასხვა პროექტების ონლაინ განხილვები უნდა შეწყდეს.
ლევან მგელაძემ ისაუბრა 2020 წლის საპარლამენტო არჩევნებზე და თქვა, რომ სრულად ეთანხმება ოპოზიციური პარტიების აზრს, არჩევნების გაყალბების შესახებ.
საკრებულოს წევრმა, ლავრენტი ბიგვავამ ჰკითხა, არჩევნების გაყალბებაზე რომ საუბრობთ, მართლა ასე გწამთ და შეგიძლიათ ერთი მაგალითი მოიყვანოთო?
ლევან მგელაძემ თქვა, უამრავი ფაქტი იყო და ერთ მაგალითს გეტყვით, ლეიბორისტებმა ვერცერთი ხმა ვერ მიიღესო.
_ჩემთვის ეს სულ არ არის დაუჯერებელი. რეალური შედეგი მიიღეს.
ლევან მგელაძემ კვლავ გაიმეორა, რომ უნდა შეიცვალოს საარჩევნო სისტემა და სერიოზულად უნდა მომზადდნენ კომისიის წევრები.
_ გასაგებია ლევან, მაგრამ მაშინ ჩვენ გაყალბებაზე კიარა კომისის წევრების მოუმზადებლობასა და არაკვალიფიციურობაზე უნდა ვისაუბროთ. შენი მასშტაბის ინტელექტის კაცი, რა გაყალბებაზე საუბრობ? საბოლოო სხდომაზე ხომ ჩანს, რა როგორ არის და ყველა კომისიის წევრი ხელს აწერს და ისე არ გადიან, თუ ასლი არ აიღეს ხელში.
_კანონმდებლობით კომისიის წევრი ვალდებულია ხელი მოაწეროს ოქმს. მე ოპოზიციაში არ ვარ, დამოუკიდებელი წევრი ვარ. გულისტკივილი გამოვხატე. არსებობს ვიდეოკადრები, მაგალითები… თუ არ იყო გაყალბება, ახლა რატომ ქმნიან კომისიას? მეც ვიყავი არაერთხელ კომისიის წევრი, თავმჯდომარის მოადგილე… აღაირა ბევრმა საერტაშორისო ორგანიზაციამ, ადგილობრივმა.. _ უთხრა მგელაძემ.
_ სადაა ლევან, ვიდეოკადრები? გადაკეთებული ოქმი ყველა არჩევნების დროს იქნება, ხდება შეცდომები. ანასეულში, საარჩევნო უბანში, მდივანმა „ქართულ ოცნებას“ 278 ხმის ნაცვლად 78 ხმა დაუწერა. იმიტომ იქმნება კომისია, რომ გააქარწყლოს და კიდევ ერთხელ დაუმტკიცოს საზოგადოებას, რომ არჩევნები არ გაყალბებულა, _ უთხრა ბიგვავამ და საბოლოოდ ითხოვა, მგელაძის ანგარიშის შეფასება მოეხდინა.
_მიუხედავად იმისა, რომ ამ არჩევნებთან დაკავშირებით, აბსოლუტურად არაადეკვატურობა გამოავლინა, ახლოს ვიცნობ ლევანს და მჯერა, ასე არ ფიქრობს. საკრებულოს ძალიან აქტიური წევრია. ძალიან დიდ საქმეს აკეთებს. დახვეწილი, ინტელიგენტი, საქმიანი კაცია. თუ შემოაცლის ზოგ საკითხს ტენდენციურობის სამოსელს, კარგი იქნება. ვისურვებდი, რომ იყოს საკრებულოში კი არა პარლამენტშიც, _ თქვა ბიგვავამ.
