რამდენიმე დღის წინ, „ვალენსიას“ ყოფილმა ლეგენდარულმა კარის დარაჯმა სანტიაგო კანისარესმა გიორგი მამარდაშვილი სახალხოდ შეაქო. გუშინ კანისარესი გამოცემას „Siperdeporte” ესაუბრა და როგორ იქნებოდა, რომ ახალგაზრდა ქართველ მეკარეზე რამდენიმე ახალი სიტყვა არ ეთქვა.
ესპანეთის ლა ლიგის პირველობის მეორე ტურში „ვალენსია“ „გრანადას“ ესტუმრება. კანისარესის მტკიცებით, გიორგი მამარდაშვილი თავის პოზიციაზე უკონკურენტოა.
„მე ვერ ვხედავ მიზეზს, რის გამო უნდა დადგეს ეჭვქვეშ მამარდაშვილის ადგილი სასტარტო შემადგენლობაში და მგონია, რომ რაიმეს შეცვლაზე არც მთავარი მწვრთნელი ხოსე ბორდალასი უნდა ფიქრობდეს. მამარდაშვილთან მიმართებაში მომთმენები უნდა ვიყოთ. შესაძლოა, მან შეცდომებიც დაუშვას, თუმცა, ამან არ უნდა შეგვაშინოს. ეს სრულიად ბუნებრივი რამეა“.
ამასობაში, გუშინვე, თურქულმა გამოცემამ „Sabah Spor” მოულოდნელი ინფორმაცია გაავრცელა. აღმოჩნდა რომ „ვალენსიას“ ხელმძღვანელობა თურქულ „ტრაბზონსფორთან“ მოლაპარაკებას აწარმოებს და ამ გუნდის კარის დარაჯი უღურჯან ჩაკირის შეძენას ცდილობს. ჩაკირი 25 წლისაა, თურქეთის ეროვნული გუნდის წევრი. ძმები არველაძეების ყოფილმა კლუბმა ჩაკირის სანაცვლოდ 17 მილიონი ევრო მოითხოვა. ესპანური მხარის პასუხი ჯერ უცნობია. თურქი სპორტული ჟურნალისტების მტკიცებით, „ვალენსია“ უახლოეს მომავალში კარის დარაჯ იასპერს სილესენს სარფიანად გაყიდის, ჩაკირი კი გიორგი მამარდაშვილის უშუალო კონკურენტი იქნება.
თუ თბილისის „ლოკომოტივის“ ყოფილი მოთამაშის ესპანური კარიერა წარმატებით მიმდინარეობს, ამასვე ვერ ვიტყვით საქართველოს ნაკრების მეკარეზე, „ალმერიას“ წევრ გიორგი მაკარიძეზე. გასულ სეზონში „ალმერიას“ ლა ლიგაში გადასვლამდე ერთი ნაბიჯი დააკლდა და მხოლოდ ფლეი-ოფში დამარცხდა. გუნდის უფროსობა თავდაპირველად ქართველით კმაყოფილი გახლდათ და ის ძირითადი გუნდის უცვლელი წევრი იყო. სამწუხაროდ, რიგ შეხვედრებში მაკარიძემ არასტაბილურად იასპარეზა და „ალმერიამაც“ მასთან გამოთხოვება მოისურვა.
ვებგვერდის _ Lavozdelalmeria.com-ის მტკიცებით, გიორგი მაკარიძეს უახლოეს დღეებში სატრანსფერო სიაში შეიყვანენ და მის ნაცვლად მადრიდის „ატლეტიკოს“ ყოფილ კარის დარაჯ ივან კუელიარის აიყვანენ.
აშშ-ის ქალაქ ლას ვეგასში დასრულდა ე. წ. „საზაფხულო ლიგის“ ასპარეზობა, სადაც ძირითადად ეროვნული საკალათბურთო ასოციაციის კლუბების ახალბედა მოთამაშეები ცდიდნენ ბედს. ვიცით, რომ ტურნირში „მილუოკი ბაქსის“ ახალწვეული სანდრო მამუკელაშვილიც გამოდიოდა. ქართველი ფორვარდი მე-3 სიმბოლურ ხუთეულში შეიყვანეს, რაც დიდი წარმატებაა იმის გათვალისწინებით, რომ ლას ვეგასში დრაფტის პირველ რაუნდში არჩეულმა არა ერთმა კალათბურთელმა ითამაშა, სანდრო კი „ბაქსმა“ მხოლოდ დრაფტის მიწურულს 54-ე ნომრად აიყვანა.
ორი დღის წინ ცნობილი გახდა, რომ „ბარსელონას“ ხელმძღვანელობამ ფელიპე კოუტინიოს მე-10 ნომრიანი მაისური შესთავაზა. ლეო მესის ფაქტორის გათვალისწინებით ამ ცნობამ კატალონიის დედაქალაქში დიდი ვნებათაღელვა გამოიწვია.
გუშინ გამოცემამ „Sport“ გაავრცელა ინფორმაცია რომ პრესტიჟულ 10 ნომერს ამ სეზონში „ბარსელონა“ არავის გადასცემს, მომავალში კი მას მხოლოდ „ბარსას“ აკადემიის აღზრდილი მოთამაშე მიიღებს.
„Sky Sports”-ის ინფორმაციით პოლონეთის ეროვნული გუნდისა და მიუნჰენის “ბაიერნის“ თავდამსხმელ რობერტ ლევანდოვსკის ბავარიული გუნდიდან აბარგება სურს. ლევანდოვსკის ახალი გამოწვევები იზიდავს. პოლონელი ხვალ 33 წლის ხდება და როგორც ირკვევა, სხვა ძლიერ გუნდშიც სურს ძალების მოსინჯვა მანამდე, სანამ 35 წლის გახდება და კარიერის დასრულებაზე ფიქრი მოუწევს.
„ბაიერნი“ ლევანდოვსკის სანაცვლოდ 117 მილიონ ევროს ითხოვს. პოლონელს გერმანელებთან ხელშეკრულება 2023 წლის ზაფხულამდე აქვს გაფორმებული. გამოდის, რომ ლევანდოვსკის ტრანსფერი ან ახლავე უნდა გახორციელდეს, ანაც გაისად, რადგან 35 წლის ასაკში მისი გადაბირება გრანდებს, დიდი ალბათობით, აღარ მოუნდებათ.
ორი დღის წინ პორტუგალიის ნაკრების თავდამსხმელმა კრიშტიანო რონალდომ სოციალურ ქსელებში სპეციალური პოსტი განათავსა და ყველას მოუწოდა რომ მისი სამომავლო გეგმების კომენტარებისაგან თავი შეეკავებინათ.
გუშინ კრიშტიანოს გზა მისმა საცოლე ჯორჯინია როდრიგესმაც გაიარა. როდრიგესი მადრიდის “რეალის” მთავარი მწვრთნელის, კარლო ანჩელოტის განცხადებას დამცინავად გამოეხმაურა:
“კრიშტიანო მადრიდული კლუბის ლეგენდაა. ჩემი მხრიდან სრულიად სიყვარული და პატივისცემა დაიმსახურა, თუმცა, მისი გუნდში მოყვანის სურვილი არ მქონია. ჩვენ წინ მივდივართ”, _ განაცხადა იტალიელმა.
„ჰა, ჰა, ჰა, ჰა“- დაწერა კომენტარებში როდრიგესმა. როგორც ჩანს, კრიშტიანუს საცოლე ანჩელოტის ამ განცხადებას კატეგორიულად არ დაეთანხმა.
[sexy_author_bio]
