ორშაბათს, პარლამენტში იურიდიულ საკითხთა კომიტეტმა, პარლამენტის წინ მიმდინარე ფართომასშტაბიანი პროტესტის ფონზე, მხარი დაუჭირა ე. წ. “აგენტების კანონს”, რომლის განხილვაც პლენარულ სხდომაზე პირველი მოსმენით გაგრძელდება.
“ოცნების” მიერ ინიცირებულ კანონპროექტს კომიტეტი, დაახლოებით, 12 საათის განმავლობაში ხმაურის ფონზე განიხილავდა. კომიტეტის თავმჯდომარე ანრი ოხანაშვილი აცხადებდა, რომ კოლეგების მიერ სადავო კანონპროექტის მოხსენიება “რუსულ კანონად” დეზინფორმაციაა და ყველას, ვინც ამ ტერმინს იყენებდა, იგი მყისიერად უთიშავდა მიკროფონს. მან ოპოზიციონერი დეპუტატების ნაწილი სხდომიდან გააძევა კიდეც.
სხდომაზე სიტუაცია განსაკუთრებით მაშინ დაიძაბა, როცა პარლამენტის ოპოზიციონერმა დეპუტატმა ალეკო ელისაშვილმა საპარლამენტო უმრავლესობის ლიდერს, მამუკა მდინარაძეს, რომელიც უცხოური გავლენების კანონპროექტს წარადგენდა, შეაგინა და სახეში მუშტი ჩაარტყა.
“შენი რუსი დედა მო***ან”, _ ისმოდა ზუსტად იმ დროს, როცა ალეკო ელისაშვილი მამუკა მდინარაძეს სახეში ურტყამდა ხელს.
ამ ინციდენტის შემდეგ იურიდიულ საკითხთა კომიტეტამდე მისასვლელი ფლიგელები მანდატურის სამსახურის თანამშრომლებმა გადაკეტეს და ჟურნალისტებს მიახლოების უფლება არ მისცეს. რამდენიმე წუთის შემდეგ ალეკო ელისაშვილმა პარლამენტის შენობა დატოვა და ჟურნალისტებთან კომენტარი გააკეთა:
“სულ ვცდილობდი, რომ მეთანამშრომლა; სულ ვცდილობდი, რომ ადამიანურად მელაპარაკა… რუსეთში მიგვათრევენ! შუბლის ძარღვი გაიწყვიტა მდინარაძემ, თეთრზე გეუბნება მწვანეაო. ახლა ქუჩაში გამოსვლის დროა. ესენი მიგვათრევენ რუსეთში…
ამოვიდა ყელში და მივეცი ცხვირ-პირში იმ რუსის აგენტ მდინარაძეს და გამიგდეს მერე…
ცხოვრებაში მეზიზღება მექრთამეები და რუსის აგენტები”, _ თქვა პარტია “მოქალაქეების” ლიდერმა, რომლის ინფორმაციითაც, პარლამენტში ფიზიკურად მასაც გაუსწორდნენ.
“ალეკო ელისაშვილი ნაძირალაა!” _ დაწერა ამ ინციდენტის შემდეგ პარლამენტის ჩვენებურმა წევრმა, ნინო წილოსანმა ფეისბუქზე და ოპოზიცია პროვოკაციის მოწყობაში დაადანაშაულა:
“გამჭვირვალობის კანონპროექტის კონსტრუქციულად განხილვის პროცესში ოპოზიციამ მორიგი წარმოუდგენელი პროვოკაცია მოაწყო..
ზუსტად ეს კანონი უნდა მივიღოთ, იმისთვის, რომ ფარდა აეხადოს ვისი დაფინანსებით მოხდა უმრავლესობის ლიდერზე, მამუკა მდინარაძეზე ალეკო ელისაშვილის თავდასხმა.
დეპუტატზე თავდასხმა ითვალისწინებს სისხლის სამართლებრივ პასუხისმგებლობას, ხოლო ადამიანურად ეს ყველაზე უღირსი საქციელია.
ოპოზიცია ისეთივე მოძალადე სახეს აჩენს, როგორი შინაარსიც აქვთ”, _ ასკვნის წილოსანი.
ნინო წილოსანის პოსტს არაერთი გამოხმაურება მოჰყვა, როგორც მხარდამჭერთა მხრიდან, ასევე, მათგან, ვინც “ოცნების” მიერ წარმოდგენილი კანონპროექტის დამტკიცებას დაუშვებლად მიიჩნევს:
“ჯერ მდინარაძის ნაძირლობა თქვით. ელისაშვილმა ერთ კაცზე იძალადა, გაუმართლებელია, მაგრამ მდინარაძე და ქოც-მონობა მთელს ქვეყანაზე ძალადობს!
ქოცებზე დიდი ნაძირალა არავინაა, თქვენი ბელადის თამადობით!
უკეთესი მუშტიც შეიძლებოდა. ერთი-ორი მუშტი და პანღური თითოეულ ქოცს დაგამშვენებდათ, უსახურებო.
გილოცავთ, ნინიკო, დუგინმაც მოგიწონათ კანონი. ვღელავდი, მარტო პესკოვისა და სიმონიანის “დაბრო” გქონდათ და აჰა, დუგინმაც ყოჩაღ, ქოცებოო. ნეტა, რატომ?
გადაყვებით მაგ კანონს, ჯერ სად ხართ. აბა, რა, ჩაუკუჭეს ჯიბეში ფული ეს რომ გაეკეთებინა. თქვენ როგორ ატყავებთ ქვეყანას, ჯერ იმ საქმეში ჩაგვახედეთ და დანარჩენს მერე ხალხი მიხედავს.
ჯერ თქვენ თავებს ახადეთ ფარდა, საქართველოს რკინიგზა რომ გაატყავეთ შენ და მამაშენმა, მერე გადადით ხალხის ფულით გასიებულ და გამდიდრებულ, მახინჯ მოსამართლეებზე, ქონების გამოჩენა რომ არ ნებავთ თურმე, მერე ის სახლი დაამთავრე, მთა რომ მოჭერი და იშენებ და ვითომ რომ შენი არ არის, და მერე ახადე სხვას ფარდა.
არა რუსულ კანონს!!!!” _ წერენ წილოსანს ოპოზიციურად განწყობილი მოქალაქეები.
“ოცნების” მხარდამჭერები კი ელისაშვილის საქციელს კატეგორიულად გმობენ და თვლიან, რომ იგი უღირსად მოიქცა:
“პოლიტიკას რომ თავი დავანებოთ ამ შემთხვევაში, უღირსად, არაკაცურად,ვირთხასავით მოიქცა!
არაკაცია ჩვეულებრივი რაც იკადრა, კაცობაშიც არ ჯდება ეგ საქციელი, ჩუმად მიპარვით, მაგრამ დირექტივა რაც ქონდა გააკეთა, აღებული აქვს თანხა ალბათ, ხელის ბიჭად გამოიყენეს, აგენტიც კი არ არის ეგ ადამიანი, აგენტების შნირია, იმის შნოც არ აქვს აგენტი იყოს.
ლაჩრულად მოიქცა….
ვაჟკაცობა არ ეყო პირისპირ მისვლის, ისევე როგორც, არგუმენტი არ ეყო კანონის, როგორც რუსული კანონის, დასაბუთების..
სამარცხვინო საქციელია! მოუხსენით იმუნიტეტი და მიაბრძანეთ ვირის აბანოში”.
ცნობისთვის, იურიდიულმა კომიტეტმა მხარი არ დაუჭირა პოლიტიკური ჯგუფის “საქართველოსთვის” მიერ წარდგენილ ალტერნატიულ კანონპროექტს. რაც შეეხება “ოცნების” მიერ წარდგენილ კანონპროექტს, მას პარლამენტი განიხილავს და კენჭს უყრის სამი მოსმენით:
კანონპროექტის პირველი მოსმენისას განიხილება მისი ზოგადი პრინციპები და ძირითადი დებულებები;
მეორე მოსმენისას კანონპროექტი განიხილება მუხლების მიხედვით;
მესამე მოსმენისას შეიძლება, კანონპროექტში შევიდეს რედაქციული შენიშვნები.
ავტორი
