“ორი გამოსავალი არსებობს, „ქართულ ოცნებას“ სახლში არჩევნების ან რევოლუციის გზით გავუშვებთ. როგორც ვატყობ, „ქართულ ოცნებას“ რევოლუცია არ აცდება”, _ აღნიშნა “გურია ნიუსთან“ “დემოკრატიული მოძრაობა-ერთიანი საქართველოს“ლიდერმა გუბაზ სანიკიძემ.
სანიკიძე ეკა ბესელიას ფარული ჩანაწერების გავრცელების მორიგ ფაქტსაც გამოეხმაურა და აღნიშნა, რომ პირადი ცხოვრების ამსახველი კადრების გასაჯაროება „ქართული ოცნების“ მმართველობის პირობებში არ შეწყდება.
_ბატონო გუბაზ, ეკა ბესელიასა და მმართველი პარტიის ლიდერებს შორის მწვავე დაპირისპირების ფონზე, „ქართული ოცნებიდან“ დემარშით წასული დეპუტატის პირადი ცხოვრების ამსახველი ფარული ჩანაწერი ინტერნეტსივრცეში კვლავ გავრცელდა. როგორ ფიქრობთ, აღნიშნული ვის მიერ არის დეპუტატის ანგარიშსწორების იარაღად გამოყენებული?
_ ბუნებრივია, „ქართული ოცნების“ მიერ. იქამდე, სანამ მმართველი პარტია ხელისუფლებაში იქნება, ფარული ჩანაწერები ყოველთვის გამოქვეყნდება. პრობლემა მხოლოდ ფარული ჩანაწერის გამომქვეყნებელი კი არა, მისი მნახველიც არის. ჩვენ უკულტურო საზოგადოება ვართ, რატომ აქვს ხალხს აღნიშნულის ნახვის ინტერესი?! პირადად არც ერთი ჩანაწერი არასდროს მინახავს, რადგან ვთვლი, რომ ეს დიდი უზნეობაა. ადამიანის პირადი ცხოვრება არავის საქმე არ არის. ზოგადად, „ქართული ოცნების“ ბნელი ლაბირინთების სპეციალისტი ნამდვილად არ ვარ და რაც უფრო ნაკლებ ყურადღებას მივაქცევთ მმართველი პარტიის ყოფილ და მოქმედ წევრებს შორის მიმდინარე დაპირისპირებას, საზოგადოებისთვის მით უფრო კარგი იქნება. იმ ფონზე, როცა აშშ-ს შტატებმა გოლანის მაღლობები ისრაელის სახელმწიფოს დაუმტკიცა, ჩვენ ეკა ბესელიასა და ირაკლი კობახიძის ბოქსაობაში ვართ ჩართული, რაც არასერიოზულია. ერთ ოთახში შეკრებილან და აფეთქებულან. ეს დაპირისპირება საზოგადოების ბედ-იღბალზე გავლენას ვერ ახდენს და ამიტომ არც მე მაინტერესებს.
_ „ქართული ოცნების“ ლიდერებმა განაცხადეს, რომ ხელისუფლება საარჩევნო კოდექსის ცვლილებას 2024 წლამდე არ აპირებს. მილიონი ხელმოწერის შემთხვევაშიც კი, ოპოზიციას მოლოდინი აქვს, რომ მმართველ პარტიას საარჩევნო სისტემის ცვლილებაზე დაითანხმებს?
_ორი გამოსავალი არსებობს, „ქართულ ოცნებას“ სახლში არჩევნების ან რევოლუციის გზით გავუშვებთ. როგორც ვატყობ, „ქართულ ოცნებას“ რევოლუცია არ ასცდება. ვფიქრობ, რომ ხალხი რევოლუციისთვის მზად იქნება, შემოდგომაზე საზოგადოება პოლიტიკოსებისგან რევოლუციას აუცილებლად მოითხოვს. სომხეთის სცენარი საქართველოში გამეორდება. მით უფრო, როცა საზოგადოებაში ბიძინა ივანიშვილის მიმართ ნდობა განულებულია. ის, ფაქტობრივად, ცარიელი ადგილია.
_ქვეყანაში არსებული მძიმე სოციალურ-ეკონომიკური ვითარების ფონზე, კრიმინალთან ბრძოლა სერიოზულ გამოწვევად რჩება, რომელის მაჩვენებელი 2018 წელს 2017 წელთან შედარებით 54% -ით გაიზარდა. რით ხსნით “ქართული ოცნების“ ხელისუფლებაში მოსვლიდან მეშვიდე წლისთავზე კრიმინალის კიდევ უფრო მომძლავრებას?
_ხელისუფლების წარმომადგენლებმა კრიმინალის ზრდა აღრიცხვიანობის გაუმჯობესებას დააბრალეს, იქნებ მიხეილ სააკაშვილსაც დააბრალონ. ეს ყველაფერი ცინიკურია და საზოგადოებისთვის თვალში ნაცრის შეყრას ჰგავს. ფაქტი ერთია, კრიმინალის ზრდის მიზეზი არის ის, რომ „ქართული ოცნება“ ტკბილ ურთიერთობაშია კრიმინალებთან, რომელთან ერთადაც არჩევნებს აყალბებს.
_ საქართველოში ვიზიტად მყოფმა ნატოს გენერალურმა მდივანმა იენს სტოლტენბერგმა, რომელმაც ხაზი გაუსვა, რომ დასავლეთი საქართველოს რუსეთის კლანჭებში არ დატოვებს, საქართველოს მოუწოდა, ალიანსში ინტეგრაციისთვის ყველა შესაძლებლობა გამოიყენოს. როგორ აფასებთ საქართველოში სტოლტენბერგის მიერ გაჟღერებულ გზავნილებს?
_ სტოლტენბერგმა გადაამოწმა, რა ჭკუაზეა საქართველოს დღევანდელი ხელისუფლება. ვფიქრობ, მისი ვიზიტი პოზიტიური და მნიშვნელოვანი იყო პროდასავლურად განწყობილი ამომრჩევლებისთვისაც და პრორუსულებისთვისაც. თუ დავაკვირდებით რუსულ საიტებს, პრესას და საექსპერტო წრეების საუბრებს, მიხვდებით, რომ მათ საქართველოს მიმართ რიტორიკა გამოცვლილი აქვთ. 2008 წლის ომთან დაკავშირებით მუქარის მაგივრად გადაფასებები ჩანს, რაც ძალიან პოზიტიურია. ძალიან ბევრი ვარიანტია, როგორ შეიძლება მოგვარდეს აფხაზეთის და ცხინვალის პრობლემა და ამ საკითხში რუსეთმა პოზიტიური როლი აუცილებლად უნდა ითამაშოს.
