“ქართული ღვინის გზის” გამარჯვებული _ გაიცანით მოსწავლე შუასურებიდან

ცოტა ხნის წინ, კავკასიის საერთაშორისო უნივერსიტეტში, საქართველოს სხვადასხვა სკოლის მოსწავლეებისთვის საგანმანათლებლო კონკურსი – „ქართული ღვინის გზა“ გაიმართა.

კონკურსანტებმა თავიანთ ნაშრომებში წარმოადგინეს ინფორმაცია საქართველოს კუთხეების მიხედვით ვაზის ჯიშებისა და ღვინის სახეობების, ასევე, მათი დამზადების ტექნოლოგიების შესახებ უძველესი დროიდან დღემდე.

პროექტი 3 ეტაპისგან შედგებოდა, ფინალურ ეტაპზე კი 26 საუკეთესო ნაშრომი გადავიდა, რომლებსაც სხვადასხვა ხარისხის დიპლომები 3 კატეგორიის მიხედვით გადაეცათ. კონკურსის გამარჯვებულები გახდნენ – ალბერტ და გიორგი ლალუაშვილები, ლაშა ქურდაძე (ხაშური, მე-8 საჯარო სკოლა); ილია ბოლქვაძე (ბათუმი, გიმნაზია „XXI საუკუნე“); ლუბა რამიშვილი (ჩოხატაური, სოფ. შუასურების საჯარო სკოლა).

როგორც კონკურსის ერთ-ერთი გამარჯვებული ლუბა რამიშვილი „გურია ნიუსთან“ საუბრისას ამბობს, კონკურსის შესახებ ინფორმაცია სკოლიდან შეიტყო და მასში მონაწილეობის მიღება გადაწყვიტა.

„კავკასიის საერთაშორისო უნივერსიტეტმა გამოაცხადა მოსწავლეებისთვის საგანმანათლებლო კონკურსი, რომელიც განკუთვნილი იყო მე-11, მე-12 კლასის მოსწავლეებისთვის. ეს ინფორმაცია მოვიდა სკოლაში. გადავწყვიტე შემეგროვებინა ჩემს სოფელში ინფორმაცია ვაზის შესახებ და გამეკეთებინა თემა“,_ამბობს ლუბა.

აღსანიშნავია, რომ კონკურსში შუასურების საჯარო სკოლის კიდევ ერთი მოსწავლე, ხათუნა ტრაპაიძე მონაწილეობდა. მან II ხარისხის დიპლომი მოიპოვა.

კონკურსანტებმა სოფლის მეურნეობის სამეცნიერო კვლევითი ცენტრის ჯიღაურას საკვლევ-სადემონსტრაცია ბაზას ესტუმრნენ. ჯიღაურას საკოლექციო ნარგაობაში დაცულია 350 უცხოური და 437 ქართული ჯიში, მათ შორის ქართული ჯიშების უნიკალური და იშვიათი ჯიშების კოლექცია, რომლის მოძიება და აღდგენა ხანგრძლივი დროის განმავლობაში მიმდინარეობდა.