გავრცელებულ ინფორმაციას იმის შესახებ, რომ ჩოხატაურის მუნიციპალიტეტის საკრებულოს ფრაქცია “ქართული ოცნების” წევრი, სოფელ ზემოხეთის მაჟორიტარი დეპუტატი ერეკლე უღრელიძე “ნაციონალურ მოძრაობას” უერთდება, “გურია ნიუსთან” საუბრისას უღრელიძე არ ადასტურებს.
დეპუტატის თქმით, ის არც “ნაციონალურ მოძრაობაში” გადადის და არც “ევროპულ საქართველოში”.
რაც შეეხება მმართველი გუნდის ფრაქციის დატოვებას, ამ თემაზე უღრელიძე არ საუბრობს და ამბობს, რომ კომენტარს მოგვიანებით გააკეთებს.
_ ჯერჯერობით მაგაზე კომენტარს არ ვაკეთებ. გეტყვით იმას, რომ არ ვაპირებ არც “ნაციონალურ მოძრაობასთან” და არც “ევროპულ საქართველოსთან” თანამშრომლობას, _ გვითხრა უღრელიძემ.
მაჟორიტარი დეპუტატი არ პასუხობს კითხვას არის თუ არა მასა და მმართველ გუნდს შორის დაპირისპირება.
_ ახლა არ მინდა მაგაზე საუბარი, _ ამბობს უღრელიძე.
ერეკლე უღრელიძე, “თავისუფალი დემოკრატების” წევრი იყო, თუმცა აღნიშნული პარტია მას შემდეგ დატოვა, რაც კოალიცია დაიშალა.
2017 წლის თვითმმართველობის არჩევნებზე უღრელიძე მაჟორიტარობის კანდიდატად “ქართულმა ოცნებამ” წარადგინა.
ის მმართველი პარტიის ოფიციალური წევრი არასდროს ყოფილა, თუმცა “ქართული ოცნების” ფრაქციაში იყო.
აღსანიშნავია, რომ ეს პირველი შემთხვევა არ არის, როცა ჩოხატაურის საკრებულოში, მმართველი გუნდს დეპუტატი ტოვებს.
2014-2017 წლების მოწვევის საკრებულოში “ქართული ოცნების” რიგები არჩილ სიხარულიძემ დატოვა და “ნაციონალურ მოძრაობას” შეუერთდა.
