ქართველი მხატვრების ნამუშევრები ბაქოში გამოიფინა. ამის შესახებ ინფორმაციას AZERNEWS ავრცელებს.
მაუწყებლის ცნობით, გამოფენაზე ვახო ბუღაძის, ლევან ჩოგოშვილის, მალხაზ დათუკიშვილის, გია ეძგვერაძის, მიშა გოგრიჭიანის, მამუკა ჯაფარიძის, თემო ჯავახიშვილის, კოტე ჯინჭარაძის, კარლო კაჭარავას, ქეთი კაპანაძის, უშანგი ხუმარაშვილის, ლუკა ლასარეიშვილის, მაია ნავერიანის, კოტე რამიშვილის, ლია შველიძის, მურთაზ შველიძის, კოტე სულაბერიძის, ოლეგ ტიმჩენკოს, მამუკა ცეცხლაძის, მაია ცეცხლაძის, ნიკო ცეცხლაძის, გურამ წიბახაშვილის, თეონა ჯაფარიძის, ილიკო ზაუტაშვილის ნამუშევრები იყო წარდგენილი.
როგორც გახსნის ცერემონიალზე ჰეიდარ ალიევის ცენტრის დირექტორმა განაცხადა, გამოფენის ორგანიზება საქართველოს კულტურის სამინისტროსა და საქართველოს ეროვნული მუზეუმთან თანამშრომლობის შედეგად მოხდა.
მან, ასევე, აღნიშნა, რომ გამოფენაზე იმ 25 მხატვრის ნამუშევარია წარმოდგენილი, რომლებმაც წვლილი შეიტანეს საქართველოს ვიზუალური ხელოვნების განვითარებაში გასული საუკუნის 80-90-იან წლებში.
„გამოფენის მთავარი მიზანი აზერბაიჯანელებისთვის საქართველოს ხელოვნების გაცნობაა. აზერბაიჯანი და საქართველო რეგიონის მნიშვნელოვანი სახელმწიფოებია. ორ ქვეყანას შორის მჭიდრო კავშირი ხელს უწყობს ხელოვნების პოპულარიზაციას“, _განაცხადა გამოფენის კურატორმა, მერევეზერმა, რომელიც საქართველოში 2 წელზე მეტი ხნის განმავლობაში ცხოვრობდა.
მან ასევე აღნიშნა, რომ გამოფენაზე წარმოდგენილი ნამუშევრები საქართველოში 1985 წლის შემდეგ გახორციელებულ ცვლილებებს ასახავს.
„თუ შევადარებთ ამ ნამუშევრებს ნიუ იორკის, ლონდონის და აზიის რეგიონის ხელოვნებას, დარწმუნდებით, რომ 1990 წლის და შემდგომი პერიოდის ხელოვნება განსხვავდება. გამოფენის სხვა სექციები 2000-2005 წლებს უკავშირდება, როდესაც საქართველო უფრო რთულ პერიოდს გადიოდა, ვიდრე 1990-იან წლებში. ჩვენ ხელოვნების ფართომასშტაბიანი ცვლილებას ვიხილავთ“, _განაცხადა მან.
გამოფენის კოორდინატორმა და საქართველოს ეროვნული მუზეუმის მრჩეველმა, ლიკა მამაცაშვილმა, საქართველოს კულტურის სამინისტროსა და საქართველოს ეროვნული მუზეუმის სახელით ჰეიდარ ალიევის სახელობის ცენტრს მადლობა გადაუხადა.
როგორც ქართველი მხატვრები ამბობენ, მათთვის დიდი პატივია ამ ნამუშევრების გამოფენა. ისინი ასევე აღნიშნავენ, რომ 1970-იან წლებში საქართველოში, ხელოვნების კოლეჯში აზერბაიჯანელი ახალგაზრდები სწავლობდნენ, რომელთაც შესანიშნავი ურთიერთობები ჰქონდათ ქართველ კოლეგებთან და შესანიშნავად ხატავდნენ.
აზერბაიჯანის მხატვართა კავშირის თავმჯდომარემ,, სახალხო არტისტმა, ქართველ მხატვართა ნამუშევრები დადებითად შეაფასა.
გამოფენა 26 აგვისტომდე გაგრძელდება.
