ოზურგეთის მუნიციპალიტეტის სოფელი ჯუმათი, ქალაქიდან 15-იოდე კილომეტრის დაშორებით, მდინარე სუფსის მარჯვენა სანაპიროზე მდებარეობს.
ყველას ახსოვს, რომ 2023 წლის სტიქიას, სოფელში ბავშვის სიცოცხლე ემსხვერპლა. ბუნების კატაკლიზმებმა ამ მთიან, ზღვის დონიდან 120 მ. სიმაღლეზე მდებარე სოფელში , განსაკუთრებული კვალი დატოვა. გაზგაყვანილობის მილები, როცა ჯერ სამუშაოები დამთავრებულიც არ იყო, სტიქიამ ერთიანად დალეწა და მას შემდეგ გზის პირებსა თუ ფერდობებზე ყრია.
_აქამდე როგორ ვერ მოხვედით ჩვენთან? სოფელს აღარ ვგავართ. ყველასგან დავიწყებული და გაპარტახებულია, ერთ დროს მოგუგუნე ჩვენი სოფელი. გამგებელი წავიდა კი არა, უფრო გაიქცა. არავინ ყურადღებას არ გვაქცევს. ჩვენი დეპუტატი ოზურგეთის საკრებულოში, პაატა კიღურაძეა. მანამდე ბაილეთის გამგებელი იყო და რა არ გაუკეთა მაგ სოფელს. აქაც ასე უნდა იმოქმედოს, ძალიან გვიხაროდა მისი მოსვლა. წავიდა ხელიდან ყველაფერი. გაზის შემოყვანა გვიხაროდა, მაგრამ ბუნებამ არ აცალა. სტიქიას ვინ დაუდგება წინ, მაგრამ საუკუნოდ ასე უნდა ეყაროს ეს მილები? _ გვეუბნებიან გზადაგზა ადგილობრივები.
უმეტესად კი მწვავე რეპლიკები ისმის: „ერთი ჩვენი კანტორა ნახე, სათხებო სჯობს“. „იმავე შენობაშია საბავშვო ბაღი და… იქ შვილიშვილს არ მივიყვან“… „ სკოლა კი დაანგრიეს, ახალს ავაშენებთო და კარგია, თუ აშენდება, მაგრამ, როდის? დაშალეს და ჯერ იმ ნაწილებს ყიდიან, რაც დანგრევის შემდეგ დარჩა. ბავშვები სილაურის სკოლაში მიდიან მეორე ცვლაში და შინ ღამით მოდიან…აირია მონასტერი“… ლამპიონები კია დაყუდებული, მარა ნათურა არაა შიგ“ . „კანტორა ნახეთ, კანტორა, ისე არ წახვიდეთ…“
დღის განმავლობაში, არაერთი საჯარო მოხელის სამსახურში არყოფნა არ გვიკვირს. უფრო ჯუმათელების მიერ, „კანტორად“ ჩამახსოვრებულმა, ადგილობრივი ხელისუფლების წარმომადგენლობის შენობის ნახვამ გაგვაოცა. აქ, დღის ორ საათზე, ადამიანის ჭაჭანება არ იყო. კარზე დიდი ლოდი დაგვხვდა მიდებული, ხოლო იქამდე მისასვლელ გზაზე დიდი გუბურა დგას. გეგონება, აქაც მუნიციპალიტეტის მერის ან ვინმე მაღალჩინოსნის მოსვლაა საჭირო, რომ ორი ურიკა ხრეში ჩაყაროს თავმოყვარე საჯარო მოხელემ. მაინც ვცადეთ, ვინმე სულიერი გვენახა, ან სხვა კარი გვეპოვა, თუმცა, კვერცხის გამოცანის არ იყოს: „ვუარეთ , ვუარეთ და კარი ვერ ვიპოვეთ“. ერთგან, ფანჯრიდან რომ შევიხედეთ, სავარაუდოდ, იმ ოთახში უნდა იყოს განთავსებული საბავშვო ბაღი და უცებ მივხვდით, რატომ თქვა ასაკოვანმა ბებომ, იქ შვილიშვილებს არ მივიყვანო…
მალე ვრცლად, „გურია ნიუსში“ გიამბობთ, როგორც ადგილობრივები ამბობენ, „ერთ დროს მოგუგუნე“ ჯუმათის გასაჭირზე.
ავტორი
