გასულ კვირაში, ამერიკის შეერთებული შტატების ელჩი საქართველოში კელი დეგნანი გურიას სტუმრობდა. ის საქართველო-აშშ-ს მეგობრობის და დიპლომატიური ურთიერთობის 30 წლისთავთან დაკავშირებით გურიაში იმყოფებოდა.
ამერიკის შეერთებული შტატების ელჩმა საქართველოში კელი დეგნანმა არასამთავრობო ორგანიზაციის, ხელისუფლების, საზოგადოების წევრებთან შეხვედრები გამართა და ჟურნალისტებთან პოლიტიკური განცხადებები გააკეთა.
“ძალიან ყურადღებით ვადევნებთ თვალყურს მიხეილ სააკაშვილის ჯანმრთელობის მდგომარეობას. ჩვენ მოვუწოდებთ საქართველოს მთავრობას მისთვის კვალიფიციური სამედიცინო დახმარების აღმოჩენისკენ”, _ აღნიშნა ელჩმა ჟურნალისტებთან შეხვედრის დროს.
მისი თქმით, სახალხო დამცველის ოფისი კარგ და საპასუხისმგებლო საქმიანობას ახორციელებს:
“ჩვენ გვაქვს სრული ნდობა სახალხო დამცველის ოფისის მიმართ, რომელიც ახორციელებს ბატონი სააკაშვილის ჯანმრთელობის მდგომარეობის მონიტორინგს და მოვუწოდებთ საქართველოს მთავრობას, სახალხო დამცველის რეკომენდაციებს ძალიან ყურადღებით მოეკიდოს. ეს არის ადამიანი, რომელსაც კონსტიტუციით მინიჭებული აქვს მანდატი, დაიცვას საქართველოს ყოველი მოქალაქის უფლება. სახალხო დამცველის ოფისი ძალიან კარგ და საპასუხისმგებლო საქმიანობას ახორციელებს და გვაქვს მისი რეკომენდაციების, როგორც მიხეილ სააკაშვილთან დაკავშირებით მოქმედების საუკეთესო კურსის მიმართ სრული ნდობა”, _ განაცხადა ელჩმა.
კელი დეგნანი უკრაინაში განვითარებულ მოვლენებსაც შეეხო:
“უკრაინისთვის და საქართველოსთვის ბევრად მნიშვნელოვანი იქნება, რომ დადგნენ ერთად სასტიკი მეზობლის _ რუსეთის საფრთხის წინააღმდეგ, რომელიც ცდილობს, წაგართვათ სუვერენიტეტი და ტერიტორიული მთლიანობა.
უკრაინასა და საქართველოში გარკვეულ ადამიანებს შორის ურთიერთბრალდებების საკითხს რაც შეეხება, მე არ მომისმენია, რომ რომელიმე პოლიტიკური ლიდერი ცდილობს, ჩაითრიოს საქართველო ამ ომში. სინამდვილეში, მე მოვისმინე, რომ ადამიანები არიან ძალიან ფრთხილები და ძალიან სენსიტიურები იმ ფაქტთან მიმართებაში, რომ საქართველოს ტერიტორიაზე უკვე განთავსებულია რუსული ძალები. საქართველომ უკვე გამოიარა საკუთარ მოქალაქეებზე რუსეთის ძალების თავდასხმისა და ტერიტორიის ოკუპაციის მტკივნეული გამოცდილება. ასე რომ, ვფიქრობ, ნამდვილად სასარგებლო იქნება ახლა, როდესაც ყველა ერთად უნდა დადგეს ყველასთვის, შეწყდეს ერთმანეთზე თავდასხმები. ამგვარ დაპირისპირებას მხოლოდ რუსეთისთვის მოაქვს სარგებელი, ამგვარი თავდასხმები საქართველოს ნაწილებად ანგრევს. ეს არის დეზინფორმაცია, რომელიც მხოლოდ რუსეთს აბედნიერებს და მხოლოდ რუსულ მიზნებს ემსახურება. ასე რომ, ბევრად მნიშვნელოვანი იქნება უკრაინისთვის, საქართველოსთვის, რომ დადგნენ ერთად სასტიკი მეზობლის, რუსეთის საფრთხის წინააღმდეგ, რომელიც ცდილობს, წაგართვათ თქვენი სუვერენიტეტი და ტერიტორიული მთლიანობა”, _ განაცხადა კელი დეგნანმა.
მანვე აღნიშნა, რომ აშშ მტკიცედ უჭერს მხარს საქართველოს სუვერენიტეტსა და ტერიტორიულ მთლიანობას.
“ჩემი ქვეყნის ლიდერებმა, მათ შორის, პრეზიდენტმა ბაიდენმა ძალიან მკაფიოდ განაცხადა, რომ საქართველო არის აშშ-ის მნიშვნელოვანი პარტნიორი. ჩვენ სერიოზულად ვუდგებით საქართველოს მოწყვლადობას მაშინ, როდესაც რუსეთი სასტიკად ესხმის თავს უკრაინას. ჩვენ დიდი ხანია, მტკიცედ ვუჭერთ მხარს საქართველოს სუვერენიტეტსა და ტერიტორიულ მთლიანობას და ვაგრძელებთ ამის კეთებას.
ჩვენ ახლა აღვნიშნავთ ჩვენი დიპლომატიური ურთიერთობების დამყარების 30 წლისთავს. 30 წლის განმავლობაში ვმუშაობთ, რომ დავეხმაროთ საქართველოს თავდაცვის ძალებს, საქართველოს უსაფრთხოების სამსახურებს, გახდნენ უფრო ძლიერი, რათა დაიცვან საქართველოს საზღვრები. ეს არის სანაპირო დაცვა, სასაზღვრო პოლიცია, საქართველოს თავდაცვითი ძალები, ეროვნული გვარდია. ყველა მათგანი არის ბევრად ძლიერი, ბევრად უნარიანი, არა მხოლოდ აშშ-სთან ერთად უსაფრთხოების სფეროში თანამშრომლობით, არამედ ავღანეთსა და ერაყში აშშ-სთან ერთად მსახურებით. ასე რომ, ვიტყოდი, აშშ-ის მხარდაჭერა საქართველოსადმი რჩება ძალიან ძლიერი და ჩემი ლიდერები ამის შესახებ მკაფიოდ აცხადებენ”, _ განაცხადა კელი დეგნანმა.
კელი დეგნანმა, ასევე, აღნიშნა, რომ ამერიკის შეერთებული შტატები ყურადღებით აკვირდება და ეცნობა საქართველოში მიმდინარე პროცესებს, რადგან საქართველო ამერიკის მნიშვნელოვანი პარტნიორია. ჩვენ მოხარული ვართ, რომ პოლიტიკური ლიდერები პარლამენტში მუშაობენ, რადგან ეს არის ადგილი, სადაც ცვლილებებისა და პროგრესის მიღწევა უნდა მოხდეს,
მისი თქმით, ძალიან მნიშვნელოვანია, რომ მმართველი პარტიისა და ყველა ოპოზიციური ლიდერის თანამშრომლობა გაგრძელდეს ქართველი ხალხისთვის ყველაზე მნიშვნელოვან საკითხებზე, კერძოდ _ ეკონომიკაზე, განათლებასა და საზოგადოებრივი ჯანდაცვაზე.
“ახლა არ არის ერთმანეთთან ბრძოლის, ერთმანეთთან ჩხუბის დრო. ახლა არის დრო, როდესაც ყველა უნდა გაერთიანდეს, ერთად დადგეს და შეწყვიტოს ერთმანეთზე თავდასხმა. ეს მნიშვნელოვანი მესიჯი იქნება არა მხოლოდ ქართველი ხალხისთვის, არამედ _ რუსეთისთვის, რომელიც ყოველთვის ცდილობს, რომ გახლიჩოს, დაყოს ეს ქვეყანა, შეიტანოს დაბნეულობა. ქართველი ხალხის ერთიანობა, რა თქმა უნდა, ამაში ხელს შეუშლის. ასე რომ, ჩვენი, ამერიკის პოზიცია და მესიჯი არის გაერთიანდნენ, დადგნენ ერთად და ერთად იმუშაონ იმ საკითხებზე, რაც ქართველი ხალხისთვის ყველაზე უფრო მნიშვნელოვანია. სწორედ ამაში უნდა დაიხარჯოს ახლა ენერგია”, _ განაცხადა კელი დეგნანმა.
ჟურნალისტებთან გასაუბრების შემდეგ ოზურგეთში მყოფ ამერიკის ელჩს საქართველოში, კელი დეგნანს, “გურია ნიუსის” ჟურნალისტმა, მარინა ჩიხლაძემ გაზეთის ახალი ნომერი გადასცა.
“ააა… გურია, კარგია,” _ თქვა ქალბატონმა ელჩმა გაზეთის დანახვისას და “გურია ნიუსით” დაინტერესდა.
_ დიახ, ეს “გურია ნიუსია”. მისი დამფუძნებელი ქალბატონი ია მამალაძეა. 22 წლის წინ, ამერიკის საელჩოს მიერ, გაზეთს საჩუქრად გრანტი გადაეცა და ის ძლიერ საინფორმაციო სააგენტოდ ჩამოყალიბდა. პანდემიის პირობებშიც კი, დაბრკოლებების მიუხედავად, რეგულარულად მიეწოდებოდა მკითხველს და ხალხთან მართალი და საქმიანი სიტყვა მიჰქონდა და მიაქვს… _ უთხრა მას ჟურნალისტმა.
_ ძალიან კარგია. სასიხარულოა, წარმატებებს გისურვებთ! _ უთხრა მას ქალბატონმა ელჩმა.
იმავე დღეს კელი დეგნანი, გურიის მხარის და ოზურგეთის მუნიციპალიტეტის ხელმძღვანელ პირებთან ერთად, ოზურგეთის ცენტრალურ ბიბლიოთეკაში იმყოფებოდა, სადაც მან გახსნა “ამერიკული თარო”. ასეთი ტიპის საბიბლიოთეკო კუთხე, საქართველოში სულ თხუთმეტია, სადაც გამოფენილია ამერიკელი მწერლების წიგნები.
ბიბლიოთეკაში ელჩი შეხვდა სოფლების _ ჩოჩხათისა და აცანის სკოლის მოსწავლეებს. ესაუბრა და გადასცა მათ სამახსოვრო წიგნები.
_ ეს მოსწავლეები მონაწილეობდნენ “ამერიკული თაროს” მიერ გახორციელებულ პროექტში “საზაფხულო გამოწვევა კითხვაში”. ელჩი სწორედ ამ თემაზე ესაუბრა ბავშვებს. თაროზე იქნება ამერიკელი მწერების წიგნები, როგორც ინგლისურ, ისე ქართულ ენაზე. წიგნი ყველაფერია. კიდევ და კიდევ უდიდეს მადლობას ვუხდი ამერიკის სახელმწიფოს, ქალბატონ ელჩს ჩვენი ქვეყნის მიმართ გამოჩენილი დიდი დახმარებისა და ყურადღებისთვის, _ თქვა “გურია ნიუსთან” ბიბლიოთეკის დირექტორმა, ქალბატონმა ლიანა ბაქანიძემ.
შეხვედრის დასრულების შემდეგ, ბიბლიოთეკაში მოსწავლეებისთვის და სტუმრებისთვის საზეიმოდ გაჭრეს ტორტი, წარწერით _ “ამერიკული თარო” .
