დღეს, ოზურგეთის მუნიციპალიტეტის საკრებულოს მორიგი სხდომის დასრულებისთანავე, საკრებულოს წევრმა, გიორგი შილაკაძემ ითხოვა , მოესმინათ მისთვის.
მან ისაუბრა „პარვუ“ ჯგუფზე, რომელსაც ოზურგეთის მუნიციპალიტეტის სოფელ შემოქმედში, მდინარე ბჟუჟზე, ჰესის მშენებლობა უკვე დაწყებული აქვს. თუმცა, ამის თაობაზე, როგორც სოფელში ბევრი აცხადებს და არაერთხელ გახმოვანდა მედიაშიც- ხალხისთვის არაფერი უკითხავთ.
_მე მაქვს კითხვა… მოსულიყო ეს ხალხი და ეთქვა, რას აშენებს, სად და რამდენს. რა მდგომარეობაა დღეისთვის… მინდა, ვკითხო გიორგი ღურჯუმელიძეს, 2023 წლის 27 სექტემბერს მე დავწერე განცხადება და ვითხოვდი პასუხს… რაკი ასეა ცნობილი, რომ „პარვუ“ ჯგუფს და ოზურგეთის მუნიციპალიტეტის მერიას გაფორმებული აქვთ მემორანდუმი…პასუხი არ ჩანს. ჩემი თხოვნაა, გამცეთ პასუხი. მაინტერესებს, თქვენ რა ზომები მიიღეთ… _იკითხა შილაკაძემ.
_კი, ბატონო, რაც შეეხება ამ ჯგუფთან შეხვედრას, როცა იქნება, შეგატყობინებთ, – უთხრა მას საკრებულოს თავმჯდომარემ, დავით დარჩიამ.
_როდის, რომ დაამთავრებენ მუშაობას, მერე რა აზრი აქვს? _ კითხვა შეუბრუნა შილაკაძემ და მერე საკრებულოს წევრებს მიმართა, რომლებიც უკვე დარბაზიდან გადიოდნენ:
_ბატონებო, ახლა თქვენ გადიხართ, ხომ? ჩვენ პასუხისმგებელი ვართ, მუნიციპალიტეტში სად, რა, როგორ მიმდინარეობს, ვიცოდეთ. მარტო ჩემი მოსაკითხი არაა ეს ამბავი, თქვენც უნდა იკითხოთ და ხალხი მერე მოგვკითხავს ყველას, ჩვენ მარტო არა, თქვენც მოგკითხავთ…მე კი, მაინც ვიტყვი სულ და შეგახსენებთ, _ მიადევნა გიორგი შილაკაძემ დარბაზიდან გასულ საკრებულოს წევრებს.
ჩვენს მკითხველს შევახსენებთ, რომ „გურია ნიუსი“ არაერთხელ წერდა მდინარე ბჟუჟზე „პარვუ-ჯგუფის“ მიერ, სამი ჰესის მშენებლობის თაობაზე.
ერთ-ერთ ინტერვიუში, „პარვუ-ჯგუფის“ ხელმძღვანელმა, ზურაბ ბესელიამ ასე განაცხადა: „ჩვენ რასაც გავაკეთებთ, ყველაფერი იქნება კანონმდებლობის დაცვით“. ის ჟურნალისტებთან შეხვედრასაც აანონსებდა, თუმცა დღემდე მსგავსი არაფერი მომხდარა.
ამასობაში სოფელ შემოქმედსა და გომში, მოსახლეობაში ხმები დადის, რომ სათითაოდ ხდება ადგილობრივებთან შეთანხმება „სხვა გაგებით“.
მკითხველი, ფართო საზოგადოება ელოდება კონკრეტულ და საფუძვლიან პასუხს.
ჩვენ მზად ვართ, ორივე მხარეს მოვუსმინოთ და აქტიურად გავაშუქოთ აღნიშნული საკითხი.
ამავე თემაზე:
“პარვუს ჯგუფის” დამფუძნებელი: “ჩვენ რასაც გავაკეთებთ, ყველაფერი იქნება კანონმდებლობის დაცვით”
ის, რაც არ არის ცნობილი ოზურგეთის საკრებულოსთვის, ცნობილია სახელმწიფო რწმუნებულის ადმინისტრაციისთვის
ავტორი
