11 იანვარს, ოზურგეთი-ჩოხატაურის გზის ნასაკირალის მონაკვეთზე, მოსახლეობამ აქცია გამართა. ისინი ითხოვდნენ გაჭიანურებული სარეაბილიტაციო სამუშაოების დროულად დასრულებას და ადგილზე სახელისუფლებო პირველი პირების, განსაკუთრებით კი გუბერნატორის მისვლას.
თუმცა, გურიის გუბერნატორი, გიორგი ურუშაძე აქციაზე არ გამოჩენილა. საღამოს კი ვიდეომიმართვა გაავრცელა, რომლის ტექსტი ასეთი შინაარსის იყო:
“საქართველოს საავტომობილო გზების დეპარტამენტი, მსოფლიო ბანკის ფინანსური მხარდაჭერით, ახორციელებს გურიის რეგიონის გზების რეაბილიტაციას. სარეაბილიტაციო გზის მონაკვეთების სიგრძე ჯამურად შეადგენს 62 კმ-ს, ხოლო პროექტის ბიუჯეტი 58.5 მილიონი ლარია.
შიდასახელმწიფოებრივი მნიშვნელობის საჯავახო-ჩოხატაური-ოზურგეთი-ქობულეთის (ნასაკირალის უღელტეხილის) 8.5 კმ-იანი გზის მონაკვეთზე, დღეის მდგომარეობით, აშენებულია საყრდენი კედლების 80%, წყალგამტარი ნაგებობების 72%, სანიაღვრე არხების 50% და სხვა აუცილებელი სამუშაოები, რომლის შემდგომაც მოხდება გზის საფარის მოწყობა.
ნასაკირალის მონაკვეთზე გზის სარეაბილიტაციო სამუშაოების შესრულების სახელშეკრულებო ვადად განსაზღვრულია 12 თვე და სამუშაოების დასრულების საბოლოო ვადა არის 2022 წლის 27 მაისი”, _ თქვა ვიდეოგანცხადებით ურუშაძემ.
_ ადრე სხვები ადგილზე მოდიოდნენ მაინც. ახლა ამან ტელევიზორით დაგვიწყო ტყუილებით საუბარი. ეკრანებიდან მაგის მეტი რა გვესმის? აქ ამოსვლას რა უნდოდა? ნახოს, ერთი, რამდენი კილომეტრი არხი უნდა გაკეთდეს, რამდენია გაკეთებული.
რამხელა კორუფციას აქვს ადგილი, ვითომ, არ იციან…
რაც ურუშაძემ თქვა, ყველაფერი ტყუილი რომ არის და საქმე საპირისპიროდაა, იმიტომ მოვაწყვეთ აქცია, _ ამბობენ “გურია ნიუსთან” ნასაკირალის მცხოვრებლები: მადონა გოგუაძე, ნუგზარ მახარაძე, ამირან გორგაძე, ნინო გოგუაძე და სხვები.
უფრო მეტიც, ადამიანები, განსაკუთრებით ისინი, ვისაც თითქმის ყოველდღე უწევთ ნასაკირალის უღელტეხილის გადავლა და ამ გადათხრილ გზებზე სიარულით, ისევე არიან გამოსული წყობიდან, როგორც თავიანთი მანქანები, კონკრეტულ ნაბიჯებს დგამენ _ ზოგი ადგა და როგორც თავად ამბობს, სპიდომეტრით გაზომა და “აწონა”, ჯერ გზა და მერე გუბერნატორის ვიდეოტყუილები. მათივე აზრით, ურუშაძეს ამ ტყუილების გამეორებას საგზაო დეპარტამენტი ავალებს:
“ეს მონაცემები პროცენტებში საიდან მოიტანა? ალბათ, დეპარტამენტმა მიაწოდა. მიდი, შვილო, შენი თვალით ნახე! ყოველდღე გავდივარ გზის ამ მონაკვეთს, ზოგჯერ ორჯერ. ბოლო 20 დღეა, ერთ ბულდოზერს დაარიხინებენ, დანგრეული გზის სავალ ნაწილს ხნავენ, უფრო სწორად ჩიჩქნიან. დღეში 50 მეტრს ვერ გადიან ასე”, _ წერს მოქალაქე აკაკი სიხარულიძე სოციალურ ქსელში და უფრო აკონკრეტებს:
“გავიარე და გამოვიარე ეს გზა. ამ კაცის ნათქვამის კვალობაზე, სპეციალურად გავზომე სპიდომეტრით, თუ რა სიგრძის სანიაღვრე არხებია გაკეთებული. ეს ჯეელი ამბობდა, რომ 50%-იაო. არადა, 8 კმ-დან გაკეთებულია (დამთავრებული) 300-400 მ. არხი. კიდევ 1 კმ-ის არმირებაა დაწყებული, დანარჩენზე მიხვდებით, თუ სად უნდა გაკეთდეს ეს სანიაღვრე არხები…”
ელემენტარული არითმეტიკაა _ თუ რვა კილომეტრიან გზის მონაკვეთზე, როგორც გუბერნატორი ამბობს, სანიაღვრე არხების 50 პროცენტია მზად, სინამდვილეში კი სულ 400 მეტრის მანძილზეა გაკეთებული და კიდევ აკეთებენ ერთი კილომეტრის სიგრძის სანიაღვრე არხს. დანარჩენი სად კეთდება? ქაღალდზე? ანუ როგორც კომუნისტური მმართველობის ჟამს, “ხალტურაა?”
ამიტომ ისმის უსაზღვროდ მომთმენი ხალხისგან გუბერნატორის მისამართით: “მოდი, ადგილზე”, “მიდი, შვილო, შენი თვალით ნახე”… ჩვენ კი ფოტოების საშუალებით კიდევ ერთხელ შევახსენებთ ვიდეოსაუბრისმოყვარულ გუბერნატორს, თუ როგორი გზით დადიან თითქმის ერთი წელია მის საგუბერნატოროში მისივე თანამემაულეები.
[sexy_author_bio]
