დღეს, ოზურგეთის მუნიციპალიტეტის რაიონულ სასამართლოში ჩანიშნული იყო ოზურგეთის მუნიციპალიტეტის გამგეობის ადმინისტრაციის სამსახურის ყოფილი უფროსის, ხათუნა სურგულაძის და ასევე, გამგეობის ახალგაზრდულ საქმეთა სამსახურის განათლების განყოფილების უფროსის ქეთევან კვაჭანტირაძის სასამართლო პროცესი. ხათუნა სურგულაძე, რომელიც პირველი რანგის მოხელის პოსტიდან ჩამოაქვეითეს, ითხოვს ტოლფას თანამდებობაზე დანიშვნას. ქეთი კვაჭანტირაძე ჩამოაქვეითეს სპეციალისტად და მისი სარჩელიც ტოლფასი თანამდებობის მოთხოვნას ემყარება.
ორივე ქალბატონი მიიჩნევს, რომ ოზურგეთის მუნიციპალიტეტის მერმა უკანონოდ გაათავისუფლა და მათი ადგილები დარჩა ვაკანტური. მათი თქმით, ეს იყო მიზანმიმართული დაქვეითება.
მოსამართლე მარინა კიკნაძემ მიმართა ორივე მხარეს. ხათუნა სურგულაძის ადვოკატმა ემზარ ურუშაძემ სასამართლოს წარუდგინა დამატებითი მტკიცებულებები და ისაუბრა საქართველოს საჯარო სამსახურის ბიუროდან გამოგზავნილი სამართლებრივი დასკვნის შესახებ.
_ ჩვენ, ასევე, წარმოვადგინეთ დღევანდელი ოზურგეთის მუნიციპალიტეტის მერიის და ყოფილი მუნიციპალიტეტის გამგეობის დებულებები. ახალი ზუსტად არის კოპირებული ძველისგან, გარდა ერთი სიტყვისა. დასახელებაში იქ წერია „გამგეობა“ და აქ _ „მერია“. ფუნქციები ზუსტად ერთნაირად არის განსაზღვრული. მერიაში კი ამტკიცებენ, რომ თითქოს ახალი სამსახური შექმნეს, რითაც საქართველოს კანონმდებლობასთან მოდიან წინააღმდეგობაში. ამასთანავე, სანამ კონკურსი დაინიშნებოდა, მერმა შარაშენიძემ უკვე ღიად განაცხადა ერთ-ერთ მედიაში, რომ ადმინისტრაციული სამსახურის უფროსად მოიაზრებოდა მისი ფავორიტი გოგი ინწკირველი. მერიაში, ასევე, მობილობის წესით 40 თანამდებობაზე დააწინაურეს თანამშრომლები, რაც არ შეიძლება. დისკრედიტაციაა, როცა 40 თანამშრომელი მაღალ თანამდებობაზე გადაგყავს და ამ შემთხვევაში, რანგით და კატეგორიით აქვეითებ სხვა თანამშრომელს. მით უფრო, როცა ტოლფასი თანამდებობა არსებობს და ვაკანტურია. ყველა ეს მტკიცებულებები სარჩელს ვერ დავურთეთ და ახლა წარმოგიდგენთ, _ მიმართა მან მოსამართლეს.
მოსამართლე მარინა კიკნაძემ მოპასუხე მხარეს მიმართა, იყვნენ თუ არა თანახმა, დაერთოთ მტკიცებულებები და ასევე, მათ თუ ჰქონდათ რაიმე მტკიცებულება.
ოზურგეთის მუნიციპალიტეტის მერიის იურისტებმა მიხეილ შილაკაძემ და ლაშა თავაძემ განმარტეს, რომ 40 ადამიანის დაწინაურება ამ საქმესთან დაკავშირებული არ არის.
_ ადმინისტრაციის სამსახურის უფროსის თანამდებობაზე აღდგენას, ასევე, ითხოვს ქალაქის მერიის ადმინისტრაციული სამსახურის ყოფილი უფროსი ბესიკ მელუა. ამიტომ მიზანმიმართულად მიგვაჩნია, ეს ორი საქმე გაერთიანდეს, _ თქვეს მათ.
სურგულაძის ადვოკატმა განაცხადა, რომ მათ არ იციან, კონკრეტულად, რა მოთხოვნა აქვს მელუას და საქმეების გაერთიანება გაჭიანურებას გამოიწვევს. ამიტომ წინააღმდეგ წავიდნენ.
მოსამართლის განცხადებით, მერიის წარმომადგენლებს არ ჰქონდათ მტკიცებულება, რაზეც მიხეილ შილაკაძემ უპასუხა, რომ შეძლებდნენ წარმოდგენას.
_ ჩვენ შეგვიძლია მტკიცებულების წარმოდგენა, რომ იგივე მოთხოვნა აქვს ბესიკ მელუასაც. ამიტომ ვითხოვთ, სასამართლო პროცესი გადაიდოს, _ თქვა ლაშა თავაძემ.
მოსამართლე მარინა კიკნაძემ, სასამართლო პროცესი მხარეებთან შეთანხმებით გადადო და იგი 27 აპრილს, პარასკევს, 12 საათზე შედგება.
მოსარჩელე ხათუნა სურგულაძემ „გურია ნიუსთან“ ასეთი კომენტარი გააკეთა:
_ მე მაქვს იმედი, რომ სასამართლო სამართლიან გადაწყვეტილებას მიიღებს. გარდა ამისა, ხელთ მაქვს მტკიცებულება ჩანაწერის სახით, რითაც დასტურდება, რომ ოზურგეთის მუნიციპალიტეტის მერმა ჩემ მიმართ დაგეგმა უკანონო ქმედება და ჩამომაქვეითა. საჭიროების შემთხვევაში, ამ ყველაფერს სასამართლოზე და მედიის წინაშე გავასაჯაროებ, _ თქვა მან.
