“ხელები დაემტვრევათ ზოგიერთს, სამაგალითოდ!” _ “ალტ-ინფოს” მუქარა და საჩივარი

გაირკვა, რომ პრორუსული ორგანიზაცია “ალტ-ინფოს” პარტიის “კონსერვატიული მოძრაობის” ლანჩხუთელმა ხელმძღვანელმა გია გოთუა პოლიციას განცხადებით მიმართა და ადგილობრივი პოლიტიკოსები მის მიმართ მუქარასა და შეურაცხყოფაში დაადანაშაულა.

გია გოთუას მოსაზრებით, სოციალურ ქსელში მის მიმართ მუქარის შემცველი კამპანია მიმდინარეობს და პოლიციისგან აღნიშნულის აღკვეთა მოითხოვა, პოლიციას დასტურად კი ფეისბუქიდან ამოღებული “სქრინები” წარუდგინა.

“რეაქცია გამოიწვია “კონსერვატიული მოძრაობის” რაიონში გამოჩენამ _ ეს ყველაფერი მიმართულია ჩვენს წინააღმდეგ. ლანჩხუთში მე ვიყავი ჩართული ოფისის გახსნაში, ორგანიზებას მე ვუკეთებდი. ამ ინფორმაციის შემდეგ, დაიწყეს ჩემს ფეისბუქგვერდზე, ჩემი შვილიშვილის ფეისბუქგვერდზე, სურათებზე დედის გინება _ “ეს გია გოთუას ოჯახია”, “დავანგრიოთ, ისა ვქნათ, ეს ვქნათ…” ოფისს გულისხმობენ და არის პერსონალური სახის კომენტარებიც _ კბილების ჩამტვრევა და ოჯახის გინება და ა. შ.

პოლიციას მივაწოდე “სქრინები”, გავაფრთხილე, რომ თავი შეიკავონ; რომ ესენი არიან ამ ყველაფრის უკან! თავი შეიკავონ, თორემ, დასჯადია მსგავსი ქმედება. შვილი მირეკავს გაგიჟებული! როგორია?! აქეთ იმის მტკიცება, რომ “აქლემი” არ ხარ და პუტინი და მართლა პუტინისტები და ქვეყნის გამყიდველები არიან ეგენი”, _ ეს კომენტარი გოთუამ “პუბლიკასთან” გააკეთა.

მისივე თქმით, იმ შემთხვევაში თუ პოლიციას რეაგირება არ ექნება და მსგავსი ფაქტები გაგრძელდება, პასუხი შეიძლება რადიკალური მეთოდებით თავად გასცეს.

“ბუნებრივია, გავაფრთხილე პოლიცია, რომ ნუღარ მიქარავენ, თორემ დედა ეტირებათ! მე არ გავუტარებ ამას, თუ არ დავინახე, რომ რაღაცა აზრზე არიან მოსული… ასეთი რაღაცეები ღმერთისგან ისჯება… თუ ეს გაგრძელდა და სახელმწიფო ვერ უზრუნველყოფს ჩემს დაცვას, მე რა ვქნა _ ველოდო, ეგენი როდის მოვლენ და როდის გააკეთებენ თავის საქმეს?! ამიტომ ბუნებრივი რეაქცია მაქვს კაცის, ქართველის.

მე არ ვარ შურისმაძიებელი, მაგრამ ამას რომ პასუხი უნდა, ფაქტია და ამ პასუხს მიიღებენ. რა ფორმით იქნება, როგორი იქნება? საერთო საქმეს რომ წაადგეს, ისეთი იქნება. თუ მაგათი ხელების დამტვრევა აჯობებს საქმისთვის, დაემტვრევათ, ზოგიერთს სამაგალითოდ”, _ ასეთია გოთუას პოზიცია.

სამართალდამცავებმა ამ ფაქტთან დაკავშირებით გამოკითხეს საჩივრის ადრესატები. გამოკითხულთა შორისაა საკრებულოს ყოფილი თავმჯდომარე ამირან გიგინეიშვილი და საკრებულოს მოქმედი წევრი პარტია “ლელოდან” გოჩა ჯანაშია. როგორც ისინი ამბობენ, არც ერთი მათგანის გვარი არ ყოფილა გოთუას მიერ პოლიციაში წარდგენილ ფეისბუქსქრინში.

“ლანჩხუთში “ალტ-ინფოს” საწინააღმდეგო აქცია როცა დაორგანიზდა, გოთუას მაშინ მიუმართავს პოლიციისთვის, თითქოს აქციის მონაწილეები მისი ოფისის ფიზიკურად განადგურებას ვგეგმავდით. ყველაფერი აბსურდულია, რაც წარადგინა. მუქარა და შეურაცხყოფა მისგან და მისი თანამოაზრეებისგან მოდიოდა და აქეთ ჩვენ გამოვყავართ მოძალადეები”, _ ამბობენ გოთუას ბრალდების ადრესატები, რომელთაც ლანჩხუთში “ალტ-ინფოს” ოფისის გახსნა 14 მარტს გააპროტესტეს, შენობის ფასადი უკრაინის დროშით დაფარეს და პლაკატები გამოაკრეს წარწერებით: “რუსეთი ოკუპანტია! არა რუსულ პროპაგანდას! არა ომს! მშვიდობა მსოფლიოს!, მშვიდობა უკრაინას! მშვიდობა საქართველოს!”

იმ ფაქტმა, რომ გოთუამ ოპონენტების წინააღმდეგ პოლიციას მიმართა საჩივრით, ლანჩხუთელ პოლიტიკოსთა შორის დაპირისპირება კიდევ უფრო გაამძაფრა.

“ბუნებრივია, გავაფრთხილე პოლიცია, რომ ნუღარ მიქარავენ, თორემ დედა ეტირებათ”, _ ეს გოთუას ფრაზაა და მე მიჩივლა პოლიციაში. “კოკასა შიგან რაცა დგას, იგივე წარმოსდინდების!” _ ამბობს გოთუას საჩივრის ერთ-ერთი ადრესატი ამირან გიგინეიშვილი.

 “ვის ეტირება,ვნახავთ! ეგ დალაგებული არაა”, _ ამბობს საკრებულოს ყოფილი წევრი და ვეტერანთა კავშირის მოქმედი ხელმძღვანელი ლანჩხუთში ელგუჯა ჩხაიძე.

გოთუას, რომელიც გასული საუკუნის 90-იან წლებში ლანჩხუთში, მცირე ხნით, რაიონის პირველი პირის პოსტს იკავებდა, როცა ჯაბა იოსელიანის მომხრეებმა ადგილზე დროებითი ხელისუფლების წარმომადგენლად დანიშნეს, საკრებულოს ყოფილი წევრი რომან ბიწაძე ასე მიმართავს: “ჯაბა გიშველის შენ, იოსელიანი, შეეხმიანე!”