ოზურგეთის #60 საოლქო საარჩევნო კომისია დღეს დაბა ნასაკირალის #59 უბაკზე დაწერილ საჩივარს, დღეს 5 საათზე განიხილავს. “ოცნება“ სწორედ, ამ კომისიის მიერ გადაწყვეტილებას ელოდება, ისინი ნასაკირალის #59 უბნის შედეგების გაუქმებას ითხოვენ.
მმართველი გუნდის კანდიდატი ბეგლარ სიორიძე “გურია ნიუსთან“ ამბობს, რომ ნასაკირალის #59 უბნის შედეგები არის სადავო, სადაც ხმების დათვლის დროს სერიოზული დარღვევები დაფიქსირდა. “საჩივარი შეტანილია და ველოდებით საოლქო კომისიის გადაწყვეტილებას. ჩვენ დავიცავთ ჩვენს შედეგებს და გვჯერა, გავიმარჯვებთ“, _ ამბობს სიორიძე.
“სამართლიანმა არჩევნებმა“ არჩევნების დღეს გააკეთა განცხადება, რომ #60 ოზურგეთის საარჩევნო ოლქის დაბა ნასაკირალის #59 საარჩევნო უბანზე ხმის დათვლის შემდეგ განვითარებული მოვლენები წარმოქმნის საფუძვლიან ეჭვს, რომ ადგილი ჰქონდა უბანზე არეულობის მოწყობისა და ამ მიზეზით უბნის შედეგების გაბათილების მიზანმიმართულ მცდელობას“.
განცხადებაში აღნიშნულია, რომ უბნის გაბათილების საფუძველი, რასაც “ქართული ოცნება“ ითხოვს, არ არსებობს:
“სამართლიანი არჩევნების“ მიერ კენჭისყრისა და ხმის დათვლის პროცესზე სრულად დაკვირვების შედეგად, გვსურს ხაზგასმით აღვნიშნოთ, რომ ნასაკირალის #59-ე საარჩევნო უბანზე შედეგების ბათილობის საფუძველი არ არსებობს, რადგან საარჩევნო უბანზე დამდგარი შედეგის სანდოობა ეჭვს არ იწვევს.
_ #59 უბანზე ხმათა უმრავლესობა მიიღო დამოუკიდებელმა კანდიდატმა და აღნიშნული უბნის შედეგს გადამწყვეტი მნიშვნელობა აქვს ოზურგეთის მერის არჩევნებში გამარჯვებული კანდიდატის გამოსავლენად.
_ ნასაკირალის #59-ე უბანზე, ხმის დათვლის პროცესის დასრულების, შედეგების შეჯამების შემდეგ, შემაჯამებელი ოქმის შედგენა არაგონივრულად გაჭიანურდა კომისიის თავმჯდომარის ცუდად ყოფნის მიზეზით. ამ პერიოდში, ღამის 12 საათის შემდეგ, უბანზე შეიჭრა აკრედიტაციის მქონე პირთა ჯგუფი, რომლებიც კომისიას არ აძლევდნენ მუშაობისა და შემაჯამებელი ოქმის შედგენის საშუალებას. მიუხედავად ამისა, კომისიის წევრებმა მოახერხეს საარჩევნო დოკუმენტაციის დაზიანებისგან დაცვა. მოგვიანებით, შეჭრილმა პირებმა დატოვეს უბანი და შესაძლებელი გახდა შემაჯამებელი ოქმის შედგენა. აღსანიშნავია, რომ საუბნო კომისიის თავმჯდომარე შემაჯამებელი ოქმის ხელმოწერაზე უარს აცხადებდა, რაც დაუშვებელია საარჩევნო კანონმდებლობით (ყველა კომისიის წევრი ვალდებულია ხელი მოაწეროს შემაჯამებელ ოქმს და თუ რაიმეს არ ეთანხმება, განსხვავებული აზრი დააფიქსიროს).
ამასთან ერთად, ხმის დათვლის პროცესში ნამდვილი ბიულეტენები, რომელზეც იკვეთებოდა ამომრჩევლის ნება, დამოუკიდებელი კანდიდატის სასარგებლოდ, საუბნო კომისიამ ბათილად მიიჩნია, რაზეც “სამართლიანმა არჩევნებმა“ საჩივარი საოლქო კომისიაში წარადგინა.
ნასაკირალის უბანზე განვითარებული მოვლენებიდან გამომდინარე, მიგვაჩნია, რომ ადგილი ჰქონდა უბნის შედეგების გაბათილების მცდელობას, რადგან ამ უბანზე და მისი შედეგების გათვალისწინებით, ოზურგეთის ოლქშიც დამოუკიდებელი კანდიდატი იმარჯვებდა. მიუხედავად უბანზე განვითარებული მოვლენებისა, საარჩევნო დოკუმენტაციის მთლიანობას საფრთხე არ შექმნია და ამომრჩევლის ნება შემაჯამებელ ოქმში სათანადოდ აისახა,_ აღნიშნავენ სადამკვირვებლო ორგანიზაციაში.
“გურია ნიუსთან“ დაბა ნასაკირალის დეპუტატი ბესიკ ქათამაძე ამბობს, რომ კომისიის თავმჯდომარეს ხმების დათვლის პროცესში ვიღაც მათთვის უცნობი პირი გამუდმებით ურეკავდა და დირექტივებს აძლევდა, რის გამოც მან ვერ მიიღო გადაწყვეტილება და გახდა ცუდად: „იქიდან გამომდინარე, რომ “ნაციონალური მოძრაობა“ იყო ბოიკოტის რეჟიმში და ჩვენ, უბრალოდ, ვაკვირდებოდით არჩვენებს, არ ვუჭერდით არცერთ კანდიდატს მხარს, თუმცა, აღსანიშნავია, რომ “ოცნება“ მოქმედებდა ერთი სქემით _ კომისიის წევრები ისე ჰყავდათ დაპროგრამებული, რომ ან ბეჭედს არ უტყამდნენ ბიულეტენზე, ან ხელმოწერებს არ აკეთებდნენ, რადგან შემდეგ უნდოდათ გაბათილებულიყო ასეთი ბიულეტენები, ასეთი ორივე უბანზე, დაახლოებით, 50-ზე მეტია, _ ამბობს ქათამაძე.
_ რაც შეეხება მოთხოვნას, რომ უბანზე, არასამართლიანად იყო რაღაც, ეს არის სრული ტყუილი, იმიტომ, რომ თვითონ ესწრებოდნენ, ჩვენ კომისია არ გვყავდა, 13 წევრი იყო კომისიაში, იყვნენ “ქართული ოცნების“ წარმომადგენლები, არც ერთს განსახვავებული აზრი არ დაუფიქსირებია, არც ერთს პრეტენზია არ გამოუთქვამს, რომ რაიმე მსგავსი ფაქტი იყო. ღამის 3 საათამდე გააჭიანურეს, რადგან ვიღაც კონკრეტული პირი რეკავადა უბანზე და კომისიის თავმჯდომარეს ანერვიულებდა და მისდიოდა გული. ღამის 1 საათზე ამოიჭრა მერიის ბაღების გაერთიანების ხელმძღვანელი ეკა ნინიძე, რომელსაც ახლდა მერიის, დაახლოებით, 10 თანამშრომელი. შევარდნენ უბანზე, უბანში კართან კი ჰყავდათ 8 პირი მობილიზებული, რომლებიც სხვა დამკვირვებლებს არ უშვებდნენ უბანზე.
ნასაკირალის უბანი “ოცნებისთვის“ ბოლო წლებია არის მტკივნეული თემა. იქედან გამომდინარე, რომ აქ არჩევნების დღეს აჭარის მთავრობა იყო მთელი დღის განმავლობაში, ეგონათ, მოიგებდნენ. სჯეროდათ ამისი. ძალიან დიდი თანხა აქვთ დახარჯული. გუშინს მერე რეკავენ ვიღაც პირები. ავრცელებენ ხმებს, რომ ტარდება მესამე ტური, ნასაკირალთან მიმართებაში ხელები შორს, ცუდად დაამთავრებენ ასეთი მანიპულირებით, _ ამბობს ქათამაძე.
“გურია ნიუსი“ დაუკავშირდა ა(ა)იპ სააღმზრდელო საგანმანათლებლო ცენტრის ხელმძღვანელს ეკა ნინიძეს, რომელმაც თქვა, რომ მას ნებისმიერ უბანზე დაკვირვების კანონიერი უფლება ჰქონდა:
_ ეკა ნინიძე წარმოადგენდა არასამათავრობო ორგანიზაცია „21-ე საუკუნის“ დამკვირვებელს ყველა დონის საარჩევნო უბანზე. შესაბამისად, ეკა ნინიძე ვერ შეიჭრებოდა აღნიშნულ უბანზე, რადგან მათ ჰქონდათ პირდაპირი უფლება შესულიყო ყველა დონის საარჩევნო უბანზე, ამიტომ მე თვითონ ვაწარმოებდი დაკვირვებას ნასაკირალის საარჩევნო უბანზე, „შეიჭრა“ _ ცოტა ხმამაღალი ნათქვამია, ჩემგან არეულობა ნამდვილად არ ყოფილა. თუმცა, შემიძლია გითხრათ, რა სიტუაცია დამხვდა უბანზე“, _ ამბობს ნინიძე.
#59 საუბნო კომისიის თავმჯდომარე ლელა ლომთაძე ამბობს, რომ თავდაპირველად ნასაკირალში არჩევნები მშვიდ და დემოკრატიულ გარემოში მიმდინარეობდა:
_ მგონი თქვენც იყავით იქ თავიდან. მშვენიერი მშვიდი სიტუაცია იყო ხმების დათვლის პროცესში ერთერთმა კომისიის წევრმა ატეხა იქ ალიაქოთი, ეტყობა გადარეკეს უცებ ოზურგეთში და ამოვიდა მთელი საქართველო იქ. ბათილი ბიულეტენიუბანზე არის არის 34.
რაც შეეხება ცუდად გახდომის მიზეზს, კომისიის თავმჯდომარე ამბობს, რომ უბანზე მოსული ყველა უცხო პირი მას უყვიროდა:
_ ვინც კი შემოდიოდა, ყველა მიყვიროდა, ყველა შენიშვნას მაძლევდა, მე ეს არ შემეძლო, კომისიას ჰქონდა გადაწყვეტილება მიღებული, რომ ეს ბიულეტენი ყოფილიყო ბათილი. გამუდმებით მირეკადნენ, მერე რა, როგორც კომისიის თავმჯდომარეს, ეს რა გასაკვირია. მე დავწერე ახსნა-განმარტება. გავხვდი შეუძლოდ, 180-100 მქონდა წნევა. სასწრაფო გამოიძახეს. არანაირი ძალდატანება ჩემზე არ ყოფილა, გარდა იმისა, რომ, ვინც უბანზე მოდიოდა, ყველა მიყვროდა. ყველას ჰქონდა მიმართულება იქითკენ, ეს ბიულეტენები რატომ იყო ბათილი. მთელი საქართველო იქ იყო“,_ ამბობს ლომთაძე.
აღნიშნულთან დაკავშირებით დღეს დაბა ნასაკილაში აქცია გაიმართება.
