„გჯერათ, ეკა ბესელიას ისე გაუვრცელეს ფარული ჩანაწერები, რომ არაფერი იცოდა სუს-მა, პარტიის ხელმძღვანელობამ და არც ბიძინა ივანიშვილმა?! მე, რასაკვირველია, არა“, _ აღნიშნა „გურია ნიუსთან“ „რესპუბლიკური პარტიის“ ეროვნული კომიტეტის წევრმა დავით ზურაბიშვილმა.
მისივე თქმით, ’’ფარული ჩანაწერების უკან ხელისუფლება რომ არ იდგეს, დამნაშავე პირი უკვე დაკავებული იქნებოდა“.
_ ბატონო დავით, საქართველოში ფარული ჩანაწერების გამავრცელებლების მიმართ დაუსჯელობის სინდრომია გამეფებული. სტატისტიკურად, ადამიანი, რომელსაც ფარული ვიდეომასალა ინტერნეტში აუტვირთავს, სამართალდამცავი უწყებების მხრიან არ დასჯილა. როგორ ფიქრობთ, ამგვარ სისხლის სამართლის დანაშაულზე სამართალდამცავი უწყებების მხრიდან, რატომ არ ხდება ადეკვატური რეაგირება?
_ ხელისუფლება თავის თავს ხომ არ დაიჭერს?! დარწმუნებული ვარ, ამ ყველაფერს თავად ხელისუფლება აკეთებს, კერძოდ, სუს-ი და უშიშროების ორგანოები, ბიძინა ივანიშვილის ლოცვა-კურთხევით. სხვა ვარიანტს გამოვრიცხავ. რაც შეეხება კონკრეტულად ეკა ბესელიას ფარულ ჩანაწერს, ამ ყველაფრუს უკან ხელისუფლება რომ არ იდგეს, დამნაშავე პირი უკვე დაკავებული იქნებოდა. გჯერათ, რომ ეკა ბესელიას ისე გაუვრცელეს ფარული ჩანაწერები, რომ არაფერი იცოდა სუს-მა, პარტიის ხელმძღვანელობამ და არც ბიძინა ივანიშვილმა?! მე, რასაკვირველია, არა.
_ გასაგებია, რომ სასამართლო სისტემასთან დაკავშირებით ეკა ბესელიას პოზიცია „ქართული ოცნების“ დეპუტატთა და მოსამართლეთა ნაწილისთვის მიუღებელი აღმოჩნდა, მაგრამ ისეთი ბინძური მეთოდის გამოყენების გზით, როგორიც ფარული ჩანაწერების გავრცელებაა, ვის რაში აწყობდა ეკა ბესელიას დისკრედიტაცია?
_ ეკა ბესელია დაისაჯა იმის გამო, რომ დისკრედიტირებული მოსამართლეების დანიშვნასთან დაკავშირებით პარტიის ლიდერს წინააღმდეგობა გაუწია. ბესელიამ თანამდებობის დატოვების შემდეგ, ფაქტობრივად, კენჭისყრა ჩაშალა, რის გამოც უმაღლესი თანამდებობის პირების მხრიდან მის მიმართ სადამსჯელო ღონისძიება მიმდინარეობს. დარწმუნებული ვარ, რომ „ქართული ოცნება“ მხოლოდ ამ ქმედებით არ შემოიფარგლება. არც იმას გამოვრიცხავ, რომ ეკა ბესელიას წინააღმდეგ, როდესაც აღნიშნული სკანდალი მიწყნარდება, კიდევ გამოჩნდეს ფარული ჩანაწერები.
_ მმართველ პარტიაში აცხადებენ, რომ სასამართლო სისტემასთან დაკავშირებით ისეთი გადაწყვეტილება იქნება მიღებული, რომელიც სამომავლოდ მართლმსაჯულებას არ დააზარალებს. სასამართლო სისტემასთან დაკავშირებით სამართლიანობის აღდგენის მოლოდინი გაქვთ?
_“ქართულ ოცნებაში“ მოსამართლეებთან დაკავშირებით დათმობაზე წასვლა არავის უფიქრია. ჩინჩალაძე, მურუსიძე და გვრიტიშვილი, რომ არ იცოდე ეს ადამიანები რას წარმოადგენენ, მათ ლაპარაკს მოუსმენ და მიხვდები. „ქართულ ოცნებას“ თანამდებობებზე ოდიოზური მოსამართლეების განმწესება სურს. შესაძლოა, მმართველმა პარტიამ უვადოდ განსამწესებელ მოსამართლეთა სიაში ახალი სახელები და გვარები შეიტანოს, მაგრამ ისინიც კლანის წარმომადგენლები იქნებიან, ამაში ეჭვი არ მეპარება.
_“ქართულ ოცნებას“ სენსიტიურ საკითხებთან დაკავშირებით, საზოგადოებრივი აზრის უგულებელყოფა 2020 წლის საპარლამენტო არჩევნებში ბუმერანგივით დაუბრუნდება. რაში აწყობს მმართველ პარტიას საზოგადოების წინააღმდეგ წასვლა?
_ბუნებრივია, არ უნდა აწყობდეს, დარწმუნებული ვარ, „ქართული ოცნების“ მხრიდან 2020 წლისთვის კვლავ იქნება მოწოდება _არა ნაცებს, არა ბოროტებას! საზოგადოებას კვლავ ეტყვიან, ჩვენ თუ არა ისევ ნაცები გინდათო?! ასეთი ხრიკების ხარჯზე ეცდებიან, გამარჯვება მოიპოვონ. ისე, როგორც არჩევნების დროს ხდება ხოლმე, რაც აღარ გამოუვათ.
_ გაერთიანებული ოპოზიცია ხელისუფლებისგან რიგგარეშე საპარლამენტო არჩევნების ჩატარებასა და საარჩევნო კოდექსის შეცვლას ითხოვს. რიგგარეშე საპარლამენტო არჩევნებისგან განსხვავებით, საარჩევნო კოდექსის შეცვლის საჭიროებას მთელი ოპოზიციური სპექტრი ხედავს. როგორ ფიქრობთ, 2020 წელს, რატომ არ სურს ხელისუფლებას საპარლამენტო არჩევნები მთლიანად პროპორციული საარჩევნო სისტემით ჩაატაროს?
_ 100%-ით დარწმუნებული ვარ, რომ „ქართული ოცნება“ ოპოზიციის ამ მოთხოვნას არ გაიზირებს, თუმცა, ხელისუფლება უნდა ვაიძულოთ, რომ ეს ნაბიჯი გადადგას. ამ შემთხვევაში, მნიშვნელოვანია საერთაშორისო საზოგადოების როლი, რომელსაც შეუძლია, ხელისუფლებას მაჟორიტარული სისტემის გაუქმებისკან უბიძგოს.
