„ხელისუფლების ბოგინის დასრულებამდე, „ოცნება“ ზეწოლის ქვეშ გვეყოლება“ _ ბაჩუკი ქარდავა

 „ქართულ ოცნებას” ჰგონია, რომ მუდმივად ხელისუფლების სათავეში უნდა იყოს. ბიძინა ივანიშვილო, დღეს 21-ე საუკუნეა, ცივილიზებულ და დემოკრატიულ საზოგადოებაში, ხელისუფლება მუდმივად იცვლება. ამ ქვეყანას ივანიშვილი ისე უყურებს, როგორც საკუთარ ბოსტანს, ხალხს კი საკუთარ ყმებად თვლის“, _ აღნიშნა „გურია ნიუსთან“ გაერთიანებული ოპოზიციის წარმომადგენელმა, „ეროვნულ-დემოკრატიული პარტიის“ თავმჯდომარე ბაჩუკი ქარდავამ.

მისი თქმით, გაერთიანებული ოპოზიცია აპირებს, ხელისუფლება მუდმივი ზეწოლის ქვეშ ჰყავდეს და ქვეყნის მართვის სადავეები თავად აიღოს ხელში, რადგან „ქართულმა ოცნებამ“ ქვეყანაში დემოკრატია დაასამარა“.

_ ბატონო ბაჩუკი, დღეს  გაერთიანებული ოპოზიცია დავით კირკიტაძის გათავისუფლების მოთხოვნით, გურჯაანში აქციის ჩატარებას გეგმავს. აღნიშნული მოთხოვნის დაუკმაყოფილებლობის შემთხვევაში,  რას გეგმავს ოპოზიცია ?

_ ცალსახა და მკაფიო გადაწყვეტილება გვაქვს მიღებული, ხელისუფლება მუდმივ პრესინგში გვეყოლება. ხელისუფლება, რომელმაც ხალხს  არჩევანის უფლება წაართვა, პოლიტიკური რეპრესიები დაიწყო. „ქართულ ოცნებას“ უკვე ჰყავს პირველი პოლიტპატიმარი დავით კირკიტაძის სახით. ყველაფერი უნდა გავაკეთოთ იმისთვის, რომ მშვიდობიანი და კანონიერი, მაგრამ მწვავე პოლიტიკური ბრძოლით, ხელისუფლება ან დავაბრუნოთ კონსტიტუციურ ჩარჩოში, ან საბოლოოდ მოვახერხოთ, რომ სახელმწიფო ინტერესების დაზიანების გარეშე, ქვეყანაში არსებული პოლიტიკური რეალობა შევცვალოთ. ბრძოლას გამარჯვებამდე გავაგრძელებთ. გაერთიანებული ოპოზიციის ტაქტიკა მარტივია, ხელისუფლება მუდმივ პრესინგში იმ დრომდე უნდა ვამყოფოთ, სანამ მათი ბოგინი არ დასრულდება. „ქართულმა ოცნებამ“ ქვეყანაში დემოკრატია დაასამარა.

_ გაერთიანებული ოპოზიცია ხელისუფლებისგან რიგგარეშე საპარლამენტო არჩევნების ჩატარებასა და საარჩევნო კოდექსის შეცვლას ითხოვს. რიგგარეშე საპარლამენტო არჩევნებისგან განსხვავებით, საარჩევნო კოდექსის  შეცვლის  საჭიროებას  მთელი ოპოზიციური სპექტრი ხედავს. როგორ ფიქრობთ, 2020 წელს, რატომ არ სურს  ხელისუფლებას საპარლამენტო არჩევნები მთლიანად პროპორციული საარჩევნო სისტემით  ჩაატაროს?

_ ბუნებრივია, ჩვენი უმთავრესი მოთხოვნა არის ის, რომ საპარლამენტო არჩევნები პროპორციული სისტემით ჩატარდეს, რაც „ქართულ ოცნებას“ არ სურს. ხელისუფლება, რომელმაც იმისათვის, რომ ქვეყანაში ძალაუფლება შეინარჩუნოს, 21-ე საუკუნეში პოლიტიკური რეპრესიები დაიწყო. „ქართულ ოცნებას“ ჰგონია, რომ მუდმივად ხელისუფლების სათავეში უნდა იყოს. ბიძინა ივანიშვილო, დღეს 21-ე საუკუნეა, ცივილიზებულ და დემოკრატიულ საზოგადოებაში ხელისუფლება მუდმივად იცვლება. ამ ქვეყანას ივანიშვილი ისე უყურებს, როგორც საკუთარ ბოსტანს, ხალხს კი საკუთარ ყმებად თვლის, ამიტომ  ხელისუფლებიდან წასვლა არ უნდა.

_“ძალა ერთობაშიას“  შტაბის ხელმძღვანელის, გიორგი ვაშაძის თქმით, სამართალდამცავებმა, დავით კირკიტაძის გარდა, შესაძლოა, ოპოზიციის სხვა ლიდერებიც დააკავონ. თანაგუნდელთა  დაკავებას თქვენც ვარაუდობთ?

_ სიმართლე გითხრათ, დიდი ყურადღება არ გამიმახვილებია, ლიდერებს დააკავებენ თუ არა. პოლიტიკური ბრძოლის პროცესში, შეგუებული ვარ და არასდროს ვფიქრობ ხოლმე დამაკავებენ თუ არა. რისიც მჯერა, მუდამ იმისთვის ვიბრძვი. „ქართული ოცნება“ ხელისუფლებაში ყოფნის ვადებს თავად შეიმცირებს, თუ გაერთიანებული ოპოზიციის სხვა ლიდერებსაც დააკავებს.

_ არსებობს მოსაზრება, რომ საპრეზიდენტო არჩევნებში განცდილი მარცხის შემდეგ, შესაძლოა, გაერთიანებული ოპოზიცია დაიშალოს. დღეს ოპოზიცია ისევე ერთიანია, როგორც საპრეზიდენტო არჩევნების დროს იყო?

_ გაერთიანებული ოპოზიცია არჩევნებში არ დამარცხებულა. ჩვენ  გამარჯვებას მივაღწიეთ. გაერთიანებულმა ოპოზიცია ბოლომდე დაიცავს იმ ხმებს, რომლებიც არჩევნებში მივიღეთ. ჩვენ თავს დამარცხებულად არ ვგრძნობთ. პირიქით, გვაქვს მაქსიმალური შემართება და ისე, როგორც არასდროს ვართ ერთიანი. ჩვენ ვალდებულება და პასუხისმგებლობა გვაქვს იმ ამომრჩევლების მიმართ, რომლებმაც ბიძინა ივანიშვილს უარი უთხრეს, ამიტომ  გამარჯვებას ბოლომდე მივიყვანთ.