“პრობლემების მეტი რა გვაქვს სოფელში _ უმუშევრობა და სიღარიბეა ჩვენი მთავარი გასაჭირი და კიდევ საბჭოთა დროინდელი გზა. რაც ჩვენს გზას ჭირს, ნაკლებად სადმე სხვაგან თუ ნახავთ ასეთს _ საშინელებაა პირდაპირ.
სიტუაცია წვიმის დროს კიდევ უფრო რთულდება. წლებია, ეს მდგომარეობა გვაქვს და წლებია ადგილობრივ თვითმმართველობას გზის პრობლემის მოგვარებას ვთხოვთ, მაგრამ შედეგი ნულია. ახლაც თუ არ მოგვაქციეს ყურადღება, უკლებლივ ყველა გამოვალთ ქუჩაში, დიდი თუ პატარა, ცენტრალურ მაგისტრალს გადავკეტავთ, ტელევიზიებსაც მოვიწვევთ და საქვეყნოდ ვაჩვენებთ, როგორ პირობებში ვცხოვრობთ!
დაჭაობებულია მთელი ქუჩა. როცა წვიმს, შეუძლებელია მანქანის გარეშე აქ გავლა, მეზობელს, თუ ვინმეს მანქანა ჰყავს, ვეხვეწებით, ცენტრალურ გზამდე მიყვანას. ტაქსის მძღოლებსაც კი ეზარებათ აქ შემოსვლა. ჭაობში ვიძირებით.
სოფლის დეპუტატმა თუ მერის წარმომადგენელმა კარგად იცის ჩვენი პრობლემის თაობაზე, ყველა საქმის კურსში გვყავს ჩაყენებული და ჩვენი უბნის პრობლემის თაობაზე ადგილობრივი ხელმძღვანელობა კარგადაა ინფორმირებული. ადრე კი იყვნენ შესაბამისი სამსახურიდან და აზომეს აქაურობა, მაგრამ იმის შემდეგ არაფერი არ ჩანს, ახლა არჩევნები არაა და უბრალოდ რომ მოვიდნენ და დაგველაპარაკონ, ამისთვისაც არ იწუხებენ თავს”, _ ამბობს სოფელ ხიდმაღალას მოსახლეობის ის ნაწილი, რომელსაც სოფლის შიდა გზის პრობლემა უკვე ბევრი წელია, აწუხებს და ცდილობს, საკუთარი ხმა ადგილობრივი ხელისუფლების ყურამდე მიიტანოს.
აქაური მცხოვრები ზურაბ კუკულავა, რომელიც წინა მოწვევის საკრებულოში სუფსის მაჟორიტარი დეპუტატი იყო, ამბობს, რომ მისი დეპუტატობის პერიოდში მოხდა აღნიშნული ქუჩის აზომვა და დაპროექტებაც.
“მე თავად ვიჯექი მანქანაში, როცა მოხდა ამ ქუჩის აზომვა. დაახლოებით, 900 მეტრია და წესით, როგორც გეგმითაა გათვალისწინებული, მიმდინარე წელს სწორედ ამ ქუჩის რეაბილიტაცია უნდა გახორციელდეს, მაგრამ ამბობენ, უნაგირას უბანში კეთდება გზაო. თუ რეალურად ასეა, გასარკვევია, რატომ?”
საქმე ისაა, რომ სოფლის იმ ნაწილში, სადაც მოსახლეობის თხოვნით, “გურია ნიუსი” რამდენიმე თვის წინაც იმყოფებოდა, სანიაღვრე არხი ან საერთოდ არაა, ან რაცაა, ისიც მოუწესრიგებელია და დამატებით პრობლემებს უქმნის მოსახლეობას. მაშინ, იმის გასარკვევად, პრობლემის მოგვარების მიზნით რამე ქმედითი ღონისძიებების გატარება თუ იგეგმებოდა 2022 წლისთვის, სოფლის დეპუტატსა და მერიის ინფრასტრუქტურის სამსახურსაც დავუკავშირდით და მათი პოზიციებიც მოვისმინეთ.
“გუბეც არაა ეს, ტბაა, ტბა ჩვენს ქუჩაზე! ქათმები წყალში არ ჩაგვეხრჩოსო და იხვების მომრავლებას მივყავით ხელი. გადასარევად გრძნობენ თავს, მთავარია, წყალი არ მოაკლდებათ. ეზოებში შემოდის წყალი, კატასტროფაა. ყელიანი რეზინის ჩექმა თუ არ ჩაიცვი, ისე სახლის ზღურბლს იქით ვერ გადადგამ ფეხს. ასფალტი და ბეტონის გზა კი არა, სანიაღვრე არხების გაკეთება გვაქვს სანატრელი, რომ ყოველი გაწვიმებისას წყალი ეზოებში არ გვივარდებოდეს და არ გვტბორავდეს”, _ ამბობდა მაშინ მოსახლეობა. სუფსის მოქმედი მაჟორიტარი დეპუტატი ია მოქია კი პირობას იძლეოდა, რომ გამოდარებისთანავე ამ უბანში მინიმუმ, გზის მოხრეშვითი სამუშაოები დაიწყებოდა.
“მე, პირადად, მქონდა შეხება ამ უბნის მოსახლეობასთან და იქ ნამდვილად ჩასატარებელია სამუშაოები _ სანიაღვრეებიც მოსაწესრიგებელია და გზის საფარიც. მართლაც კატასტროფულ მდგომარეობაშია. ვმუშაობთ, რომ რამენაირად მალე და მოკლე ხანში მოგვარდეს ეს პრობლემა. მერიაში ჩემგან მიწოდებულია ამის თაობაზე ინფორმაცია. როგორც კი გამოიდარებს, ამ უბანში, მინიმუმ, გზის მოხრეშვითი სამუშაოები დაიწყება. რთული სიტუაციაა სუფსაში ყველგან, სანიაღვრე არხებიც გაიწმინდება, სადაც ამის საჭიროებაა”, _ პირობას დებდა მიმდინარე წლის დასაწყისში სოფლის მაჟორიტარი.
მერიის ინფრასტრუქტურის სამსახურის ინფორმაციით კი, წელს არჩევანი სუფსაში იმ ქუჩის სასარგებლოდ გაკეთდებოდა, რომელიც უფრო მეტად საჭიროებს რეაბილიტაციას:
“ზოგადად, სუფსაში წელს ერთი გზის გაკეთება იგეგმება, სადაც კატასტროფული მდგომარეობაა ის ქუჩა აირჩევა, ჯერ პროექტიც არაა მომზადებული. ჯერ კონკრეტულს ვერაფერს ვიტყვი, შეიძლება ეს ქუჩა გაკეთდეს, თუ მართლაც კატასტროფული მდგომარეობაა იქ”.
“გურია ნიუსი” ამჯერადაც შეეცადა იმის გარკვევას, როდის და როგორ იგეგმება ხიდმაღალას მოსახლეობის ზემოთ ნახსენები პრობლემის მოგვარება, თუმცა, როგორც აღმოჩნდა, ჯერჯერობით, კონკრეტული არაფერია.
როგორც მერიის ინფრასტრუქტურის სამსახურის უფროსთან ლევან ჩხაიძესთან საუბრისას გავარკვიეთ, სუფსის ადმინისტრაციულ ერთეულში, სადაც წლის განმავლობაში მხოლოდ ერთი გზის რეაბილიტაცია უნდა გახორციელდეს, პრიორიტეტი უკვე გამოკვეთილია და არჩევანი სოფელ ტაბანათში, უნაგირას უბნის გზაზე გაკეთდა. როგორც ჩანს, “მართლაც კატასტროფული მდგომარეობად” არ შეფასდა ხიდმაღალელთა გზის პრობლემა:
“სუფსის ადმინისტრაციულ ერთეულში წელს სოფელ ტაბანათში, უნაგირას უბანში მდებარე გზაზე შეჩერდა არჩევანი. რაც შეეხება მოხრეშვით სამუშაოებს, ჯერ ამ კუთხით სამუშაოები არ დაწყებულა და არც ისაა დაკონკრეტებული, მოსახრეშ გზათა ჩამონათვალში იქნება თუ არა ხიდმაღალას ეს კონკრეტული უბანი გათვალისწინებული”, _ გვითხრა ლევან ჩხაიძემ.
საგულისხმოა, რომ სუფსის ადმინისტრაციული ერთეულის მოსახლეობა უკვე ათეული წლებია ხაზგასმით აღნიშნავს, რომ მათ სოფლებში მწვავედ დგას გზის პრობლემები, რასაც ისიც ამწვავებს, რომ ამ დასახლების რელიეფი იმდენად დაბალია, ნალექის მცირე რაოდენობის შემთხვევაშიც კი გარკვეული დისკომფორტი იქმნება. აქაური მცხოვრებლები კი მეტ ეფექტურობას ითხოვენ პრობლემის მოსაგვარებლად.
ავტორი
