16 ივნისს, ოზურგეთის მუნიციპალიტეტის საკრებულოს მორიგი სხდომა გაიმართა.
მიუხედავად იმისა, რომ ოზურგეთის საკრებულოს სხდომებზე ხშირია ჩხუბი და სიტყვიერი, ზოგჯერ კი, ფიზიკური დაპირისპირების მცდელობაც, ახლა “სიახლე” იყო, რაც გამოიხატა იმაში, რომ ჩხუბი საკრებულოს სხდომის დაწყებამდე დაიწყო.
საკრებულოს თავმჯდომარე, დავით დარჩია დღის წესრიგის წაკითხვას აპირებდა, როცა სხდომათა დარბაზში “ქართული ოცნების” დეპუტატი, ქეთი ხომერიკი შემოვიდა.
ის პირდაპირ მივიდა საკრებულოს წევრ, “ნაციონალური მოძრაობის” დეპუტატ თათია ნიკოლაშვილთან და ხმამაღლა მიმართა:
_ წახვალ დღესვე პროკურატურაში, აღნიშნულთან დაკავშირებით შეიტან სარჩელს და მოითხოვ კანონიერ გამოძიებას.
_ აღიარებ, რომ გზა ვერ დაუგეთ მოსახლეობას? თქვენ ისევ ხელისუფლებაში გგონივართ? _ ჰკითხა მას ნიკოლაშვილმა.
_ ხმა ჩაიგდე, როცა ავთანდილ თალაკვაძეზე ლაპარაკობ და მიმართე პროკურატურას _ დაამტკიცე, რასაც ამბობ, _ კვლავ თითის დაქნევით აფრთხილებდა ხომერიკი ნიკოლეიშვილს.
თავიდან ვერავინ გაიგო, რაზე იყო დავა.
“ქართული ოცნების” დეპუტატები ხომერიკს სთხოვდნენ, დაეკავებინა თავისი ადგილი. თუმცა, რაკი მაინც არ დაჯდა, საკრებულოს თავმჯდომარის მოადგილე, ლავრენტი ბიგვავა თავად მივიდა ხომერიკთან და მიუთითა, რომ დამჯდარიყო.
როგორც შემდეგ გაირკვა, თათია ნიკოლაშვილს სოციალურ ქსელში გამოუქვეყნებია ვიდეომასალა, სოფელ მაკვანეთში არსებული გზის მშენებლობის ტენდერის თაობაზე.
ამჯერად სხდომაზე გაიმეორა, რომ ერთ მილიონიანი ტენდერის თანხა იხარჯება და მაკვანეთში გზა ვერ გაკეთდა:
_ ხრეშზე უკვე ბალახია ამოსული, ფაქტები ვნახე, ვამხილე. ოზურგეთის მერმა რომელ კომპანიასაც გაუფორმა ტენდერი, მოსთხოვოს, გზა გააკეთოს. ადგილი აქვს კორუფციას. დარბაზში შემოსული ხომერიკი პროვოკაციაზე წამოვიდა, დაწყებაც არ აცალა სხდომას, _ თქვა ნიკოლაშვილმა.
დავა და ჩხუბი გაგრძელდა მას შემდეგაც, რაც ხომერიკი თავის ადგილზე დაჯდა.
უმრავლესობის წევრები ამბობდნენ, რომ ტენდერში გამარჯვებული ერთ-ერთი პირი საკრებულოს ოპოზოციონერი წევრია და პასუხი მისთვის მოეთხოვათ.
_ თქვენ ისევ ხელისუფლებაში გგონივართ? რას ამბობთ, ანუ ტენდერი თქვენია და შემსრულებელი ოპოზიციონერი საკრებულოს წევრი? კორუფციას აღიარებთ? _ გაბრაზებული სვამდა კითხვებს “ნაციონალური მოძრაობიდან” საკრებულოს დეპუტატი ბესო ქათამაძე.
მან თქვა, რომ მინიშნებებს საკრებულოს წევრ, “ნაციონალ” შალვა თავდიშვილზე აკეთებენ. მას აქვს ტენდერი მოგებული. ქეთი ხომერიკმა კი, ნიკოლაშვილს “ჩაშვების” მცდელობაში დასდო ბრალი, რაშიც, სავარაუდოდ, “ნაციონალებში” შიდა დაპირისპირება იგულისხმა.
თავის მხრივ, კითხვების მაღალ ტონალობით დასმა დაიწყო “ნაციონალმა” დავით მჟავანაძემ: .
_ საზოგადოებრივ ტრანსპორტზე საუბრობთ და მე ის ვიცი, რომ ლავრენტი ბიგვავას გადაეცით ახალი მანქანა, _ განაცხადა მჟავანაძემ.
როგორც ყოველთვის, მჟავანაძე ბიგვავას მუდამ “კენწლავს”, ცნობილი კონფლიქტის შემდეგ, როცა მჟავანაძე ერთ-ერთი სხდომაზე პოლიციამ დააკავა და ის მიზეზად ბიგვავას მიერ პოლიციაში დარეკვას და “საჩივრის დაწერას” ასახელებდა.
გახანგრძლივებული ჩხუბის გამო, სხდომა მოგვიანებით დაიწყო. დავით დარჩიამ კიდევ ერთხელ მიმართა ყველას, მხოლოდ კითხვები დასვითო.
_ წეღან რატომ არ დამასმევინე კითხვა? _ არ დაწყნარდა მჟავანაძე.
_ სხდომა არ იყო დაწყებული. გააქანე თავი! _ მიუგო დარჩიამ.
_ თქვენმა დეპუტატმა რომ დაიწყო სხდომის დაწყებამდე კითხვები და ჩხუბი, მაშინ იყო დაწყებული? _ შეტევაზე გადავიდა მჟავანაძე.
საკრებულოს სხდომის ნახევარზე მეტი დრო, ჩხუბს და დავას დასჭირდა. როგორც იქნა, ისაუბრეს 2023 წლის ბიუჯეტის ცვლილების პროექტზე.
წარმოდგენილი პროექტით, მუნიციპალიტეტის ბიუჯეტის ზრდა გადასახდელებისა და შემოსავლების ნაწილში, 2023 წლის კორექტირებული ბიუჯეტით განსაზღვრულ მაჩვენებელთან შედარებით, 7316,2 ათასი ლარით განისაზღვრა.
_ ბიუჯეტს ზრდიან და ერთი თეთრით ვერ ეხმარებიან გაჭირვებულებს. ტყემლის და გოჭის ფულს კი გამოწერთ სასწრაფოდ, _ წამოიძახა მჟავანაძემ.
უმრავლესობის დეპუტატებმა დავით მჟავანაძეს ერთობლივად დაუწუნეს ზრდილობაც და “მოჩვენებებზე აგებული აზრებიც”.
საკრებულოს სხდომაზე პავლე ჭყონიამ თქვა, რომ ცვლილებების შედეგად, მუნიციპალიტეტის ბიუჯეტი მიმდინარე პერიოდისთვის 70273,5 ათას ლარს შეადგენს.
საკრებულოს გადაწყვეტილებით, დამტკიცდა შემდეგი განკარგულების პროექტი: “მუნიციპალიტეტის საკუთრებაში არსებული მოძრავი ქონების შპს “ოზურგეთის სატრანსპორტო კომპანიისთვის” სარგებლობის უფლებით გადაცემაზე, მერისთვის თანხმობის მიცემის შესახებ”.
ამავე სხდომაზე მიიღეს დადგენილება “მუნიციპალიტეტის ბიუჯეტით გათვალისწინებული “სამოქალაქო ბიუჯეტის” გახორციელების წესის დამტკიცების შესახებ”.
აღნიშნული სხდომის ბოლო ნაწილი, შედარებით მშვიდად დასრულდა. თუმცა, უმეტესი ნაწილი და ასევე, დამატებითი დროც ჩხუბს და დავას დასჭირდა, რაც მოსახლეობის და თვითონ სხდომის მიმდინარეობის თუ დასრულების შემდეგაც დაძაბულობას ზრდის, რაც ძალიან ცუდია. თითქმის, ორი წლის განმავლობაში, ამ მოწვევის საკრებულოში, მხარეებმა ვერ შეძლეს ერთობლივად, თუნდაც ერთი სხდომის მშვიდ ვითარებაში ჩატარება.
ავტორი
