ხმაური იყო პარლამენტის ბიუროს სხდომაზე. საკითხი ეხება ფრაქცია „ნაციონალური მოძრაობის“ მოთხოვნას „უცხოური გავლენის გამჭვირვალობის შესახებ“ კანონპროექტთან დაკავშირებით თავისუფალი ტრიბუნის გამოყენების თაობაზე.
როგორც პარლამენტის თავმჯდომარე შალვა პაპუაშვილმა განმარტა, „ნაციონალურ მოძრაობას“ მიეცემა საშუალება გამოიყენოს თავისუფალი ტრიბუნა, თუმცა, არა უშუალოდ კანონპროექტის მიღების შემდეგ, არამედ, დღის წესრიგით გათვალისწინებული საკითხების ამოწურვის შემდეგ, რასაც ამავე ფრაქციის წევრის თინა ბოკუჩავას მხრიდან სიტყვიერი შელაპარაკება მოჰყვა.
„კიდევ ერთხელ განვმარტავ მოკლედ, რაც შეეხება თავისუფალ ტრიბუნას, პარლამენტის რეგლამენტის მიხედვით, საკითხების ამოწურვის შემდეგ, რაც არის გათვალისწინებული დღის წესრიგით, ამის შემდეგ აქვს ყველას საშუალება, რომ ისარგებლოს თავისუფალი ტრიბუნით და, რა თქმა უნდა, მიეცემა ყველას საშუალება, როდესაც ამოვწურავთ მიმდინარე კვირის დღის წესრიგის საკითხებს, ეს ერთი. რაც შეეხება საკითხს იმასთან დაკავშირებით, თითქოს, თუნდაც ამ პროექტთან დაკავშირებით არ ექნებათ საშუალება, რომ ისაუბრონ, 12:00 საათზე გაიხსნება სხდომა, პოლიტიკური განცხადებების დრო არის თავდაპირველად და ფრაქცია „ნაციონალურ მოძრაობას“ ჯამში 80 წუთი აქვს სასაუბროდ და ისაუბრონ რამდენიც უნდათ. 30 წუთი კი არა 80 წუთი აქვთ და გამოიყენონ, არავინ უშლით მათ, რომ გამოიყენონ და მითუმეტეს, აქამდე ერთ თვეზე მეტია განხილვა მიდის და პირველ და მეორე მოსმენაზეც ჰქონდათ შესაბამისი დრო.
ასე, რომ ესეც აჩვენებს კიდევ ერთხელ, რომ არც თემა აინტერესებთ, არც შინაარსი, არც ქვეყანა, არც არაფერი, ერთადერთი, რაც აინტერესებთ არის სპექტაკლების დადგმა იმისთვის, რომ ზედმეტი ემოციები გამოიწვიონ“,-განაცხადა შალვა პაპუაშვილმა.
წყარო: imedi
