ამ წუთებში დაძაბული ვითარებაა კინოთეატრ “ამირანთან“, სადაც ლევან ვასაძისა და “ქართული მარშის“ აქტივისტები არიან მობილიზებული და ცდილობენ ჩაშალონ ჩვენება ფილმისა “… და ჩვენ ვიცეკვეთ“.
როგორც თვითმხილველები ამბობენ, ისმის პიროტექნიკის აფეთქებების ხმა და შეძახილები:“სირცხვილი!“ “სირცხვილი!“
პოლიცია, რომელიც კორდონით კინოთეატრის შესასვლელს იცავს, მეგაფონით ცდილობს, მოქალაქეები გააფრთხილოს, რომ ნებისმიერი სამართალდარღვევის და ძალადობის შემთხვევაში, შინაგან საქმეთა სამინისტრო, მიმართავს კანონით განსაზღვრულ ქმედებებს და მოუწოდებს მოქალაქეებს სიმშვიდისკენ და გადაკეტილი გზის გახსნისკენ.
შს სამინისტრომ დღეს განცხადება გაავრცელა, რომ იწყებს შესწავლას, შეიცავს თუ არა ფილმი პორნოგრაფიის ნიშნებს.
“….და ჩვენ ვიცეკვეთ“ _ ქართულ-შვედური ფილმის ჩვენება საქართველოს კინოთეატრებში 8, 9 და 10 ნოემბერს არის დაგეგმილი, თუმცა, ქართული მარში აცხადებს, რომ ლგბტ პროპაგანდას არ დაუშვებს და კინოთეატრების დირექციისგან ფილმის ჩვენების აკრძალვას ითხოვს.
ფილმის ქართველი პროდიუსერი, ქეთი დანელია კი მუქარის ავტორებს ფილმის ნახვას და მისი შინაარსის გააზრებას ურჩევს.
დანელია იმედოვნებს, რომ კინოთეატრები და შინაგან საქმეთა სამინისტრო პრემიერაზე მისული მაყურებლის უსაფრთხოების სათანადოდ დაცვას შეძლებენ.
შეგახსენებთ, რომ ფილმი შვედეთში გადაიღეს და მასში აღწერილია ორი ქართველი მოცეკვავის ისტორია.
რაც შეეხება, ფილმის აღწერას, მერაბი მეწყვილე მარისთან ერთად, პატარაობიდან ემზადება ნაციონალურ ანსამბლში. მისი სამყარო თავდაყირა დგება, როდესაც ქარიზმატული ირაკლი იმავე ანსამბლს შეუერთდება და მისი ყველაზე ძლიერი კონკურენტი და სურვილი ხდება.
ქართულ-შვედური ფილმის პრემიერია კანის კინოფესტივალზე მაისში გაიმართა და ერთ-ერთ მთავარ სექციაში მოხვდა. რამდენიმე ქვეყანაში უკვე შედგა მისი ჩვენება.
ფილმს არაერთი საერთაშორისო ჯილდო აქვს უკვე მოპოვებული, ამერიკის კინო აკადემიის დაჯილდოების 92-ე ცერემონიალზე საუკეთესო უცხოენოვანი ფილმის კატეგორიაში კი შვედეთის სახელით წარდგება.
