ხუთის ნაცვლად ექვსი ბიულეტენი _ დარღვევა გურიის ფედერაციის არჩევნებზე

დღეს, ლანჩხუთში,  გურიის ფეხბურთის ფედერაციის ოფისში, რეგიონული ფედერაციის ხელმძღვანელის ხელახალი არჩევნები ჩატარდა და ამჯერადაც პრეზიდენტობის პოსტზე მხოლოდ ერთი კანდიდატი დავით  მუჯირი (უფროსი) იყო წარდგენილი.

მართალია, იგი 10 მარტს, ოზურგეთში გამართულ ფედერაციის სხდომაზე  ზარზეიმით აირჩიეს გურიის ფეხბურთის მესაჭედ,  თუმცა, საჯარო რეესტრმა მაშინდელი შედეგები არ დაარეგისტრირა ხარვეზების გამო და  არჩევნების ხელახალი ჩატარებაც ამან გამოიწვია. ამ ჯერზე არჩევნები ლანჩხუთში, ფედერაციის ოფისში ჩატარდა, როგორც თავად დავით მუჯირი ამბობს, არჩევნების მაშინ ოზურგეთში ჩატარების, ახლა კი ლანჩხუთში ჩატარებას გარკვეული მიზეზები აქვს.

მართალია, დღევანდელმა არჩევნებმა მშვიდ ვითარებაში ჩაიარა, მაგრამ ლაფსუსი მაინც მოხდა,  რადგან თითო სუბიექტი თითო ხმის მიცემის უფლებით სარგებლობს. დღევანდელ არჩევნებში ჩოხატაურის „ბახმაროს“ ორმა წარმომადგენელმა _ დავით ჩხიკვაძემ და  ბენია თავბერიძემაც მიიღეს არჩევნებში მონაწილეობა, ეს უკანასკნელი ამავე დროს წინა აღმასკომის წევრიცაა.

წესით, არჩევნებში მონაწილეობა ექვს სუბიექტს უნდა მიეღო, აქედან ოთხი _ ლანჩხუთიდან იყო, მაგრამ რეალურად საფეხბურთო კლუბ ლანჩხუთის „გურიას“ წარმომადგენლი  არჩევნებზე არ გამოცხადებულა და ამდენად, არჩევნებში ხუთ სუბიექტს უნდა მიეღო მონაწილეობა, თუმცა, ხმის დამთვლელმა კომისიამ ექვსი ბიულეტენი დაითვალა.

მართალია, ხმის მიცემის დამთავრების შემდეგ ამტკიცებდნენ, რომ არჩევნებში ბენია თავბერიძეს მონაწილეობა არ მიუღიაო, თუმცა, ფოტო, რომელიც „გურია ნიუსმა“ ობიექტივმა დააფიქსირა,  სხვაზე მეტყველებს.

კომენტარისთვის თავად ბენია თავბერიძესაც დავუკავშირდით, თუმცა, მან მოუცლელობა მოიმიზეზა და ჩვენს კითხვაზე პასუხი არ გაგვცა.

„ახლა არ მცალია, არ ვიცი რამდენ ხანში გავთავისუფლდები, მერე გადმომირეკეთ“, _ გვითხრა მან.