ხვიჩა „ბარსელონას“ წინააღმდეგ

გუშინ, შვეიცარიის ქალაქ ნიონში, ჩემპიონთა ლიგის მერვედფინალური ეტაპის წილისყრა გაიმართა.

გაირკვა, რომ ხვიჩა კვარაცხელიას „ნაპოლის“ მერვედფინალურ სტადიაზე თამაში კატალონიურ „ბარსელონასთან“ მოუწევს.

ჩემპიონთა ლიგის მერვედფინალური წყვილები:

“პორტუ” (პორტუგალია) – “არსენალი” (ინგლისი)

“ნაპოლი” (იტალია) – “ბარსელონა” (ესპანეთი)

“პარი სენ-ჟერმენი” (საფრანგეთი) – “სოსიედადი” (ესპანეთი)

“ინტერი” (იტალია) – “ატლეტიკო” (ესპანეთი)

პსვ ეინდჰოვენი (ნიდერლანდები) – “დორტმუნდი” (გერმანია)

“ლაციო” (იტალია) – “ბაიერნი” (გერმანია)

“კოპენჰაგენი” (დანია) – “მანჩესტერ სიტი” (ინგლისი)

“ლაიფციგი” (გერმანია) – “რეალი” (ესპანეთი)

ჩემპიონთა ლიგის მერვედფინალური ეტაპის პირველი მატჩები 13-14 და 20-21 თებერვალს, ხოლო საპასუხო შეხვედრები 5-6 და 12-13 მარტს გაიმართება.

ვეტერანმა იტალიელმა მცველმა ჯორჯო კიელინიმ, კი რომელმაც კარიერა ცოტა ხნის წინ დაასრულა, „Sky Sport“-თან ხვიჩა კვარაცხელიაზე ისაუბრა.

„კვარაცხელია იტალიელი მცველებისთვის მოულოდნელი იყო? ის იმ ნიჭიერ ფეხბურთელთაგან ერთ-ერთია, რომელიც პირველივე დაპირისპირებაზე გაიძულებს თქვა: „მაგრამ ეს ვინ არის? საიდან მოვიდა?“ გასაოცარი ტალანტია, ასეთი რომ იქნებოდა, არავინ ელოდა“, – განაცხადა ჯორჯო კიელინიმ.

საინტერესოა, რომ ხვიჩა კვარაცხელიამ იტალიის „სერია A“-ში საწყის 49 მატჩში 30 გოლში მიიღო უშუალო მონაწილეობა.

2004 წლიდან, რაც ამ სტატისტიკას ითვლიან, კვარაცხელიაზე ახალგაზრდულ ასაკში ნაკლები თამაშის ჩატარება 30 ან მეტ გოლში მონაწილეობის მისაღებად მხოლოდ ორ ფეხბურთელს დასჭირდა: დომენიკო ბერარდიმ 42 შეხვედრაში 31 გოლში მიიღო მონაწილეობა და ალეშანდრო პატომ კი 30 გოლში მონაწილეობა 45 თამაშში მიიღო.

დღემდე კვარაცხელიამ სერია A-ში ჩატარებულ 49 მატჩში 17 გოლი გაიტანა და 13 საგოლე პასი გააკეთა.

გუშინ, ესპანური გამოცემა „Deporte valenciano“ გიორგი მამარდაშვილის ჩინებულ თამაშს გამოეხმაურა და დაწერა, რომ „ვალენსია“ მის სანაცვლოდ მაქსიმალური სარგებელის ნახვას უნდა ეცადოს.

„სხვა მოცემულობის შემთხვევაში, ალბათ, შეიძლებოდა იმის თქმა, რომ გიორგი მამარდაშვილი წლების განმავლობაში „ვალენსიას“ ლეგენდარული მეკარე იქნებოდა. ამას, ალბათ, გუნდის ყველა ქომაგი ინატრებდა, თუმცა, მათაც კარგად ესმით, რომ ეს ნაკლებად სავარაუდოა. დიდი ალბათობით, მამარდაშვილი ის ფეხბურთელი გახდება, რომელსაც „ვალენსია“ ძალიან სარფიანად გაყიდის. „ვალენსიელთათვის“ კარგი იქნება, თუკი ეს, რაც შეიძლება გვიან მოხდება. მაგალითად, მას გასულ ზაფხულსაც არაერთ გრანდს უკავშირებდნენ, თუმცა, გარიგება არ შედგა და კვლავ „მესტალიაზე“ თამაშობს.

მამარდაშვილს ჯერაც გასაუმჯობესებელი აქვს ფეხით თამაში და გამოსვლებზეც მეტი ყურადღება მართებს და როდესაც ეს პრობლემები მოგვარდება, მასში გადახდილი 50 მილიონიც კი აღარ იქნება გაბერილი თანხა. ნათელია, რომ მამარდაშვილი ვერ შეუერთდება კლუბის ლეგენდარულ მეკარეებს ეიზაგირეს, აბელდარდოს, სემპერესა და კანისარესს და მას ვერ ვიხილავთ „მესტალიაზე“ მომავალი 10 წლის განმავლობაში. ეს, ცხადია, ძალიან, ძალიან მტკივნეულია, თუმცა, გიორგის სატრანსფერო ფასი მაინც უნდა იყოს ისეთი, რომ ვალენსიელ ფანებს გულისტკივილმა გადაუაროს.

მანამდე კი, სანამ მამარდაშვილი წავა, კლუბი უნდა ეცადოს, რომ მისგან მაქსიმალური სარგებელი ნახოს. „ვალენსიამ“ იმდენი ქულა მაინც უნდა აიღოს, რომ სეზონის ბოლოს ისევ „ლა ლიგაში“ დარჩენისთვის არ მოუწიოს ბრძოლა. მამარდაშვილთან ერთად ამ ამოცანის გადაწყვეტა ნამდვილად შესაძლებელია, შემდეგ კი უნდა ვადევნოთ თვალი იმას, უახლოეს წლებში როგორ გახდება ეს ბიჭი ევროპის ერთ-ერთი საუკეთესო მეკარე“.